Irene Ferreras López de Lamela (Fuenlabrada, Madrid, 4 de marzo de 1989) será a adestradora do Dépor ABANCA nesta nova Temporada 2022-2023. Así o confirma o club herculino. Será a primeira vez que unha muller sexa primeira entrenadora no club herculino. Substitúe no cargo a Miguel Llorente.
A preparadora madrileña vén de ser segunda adestradora do Real Madrid CF, onde na campaña 2021-2022 exerceu como axudante de David Aznar primeiro e de Alberto Toril despois.
Con anterioridade, Irene Ferreras acumulou experiencia como máxima responsable técnica nos bancos de Olímpico de Moratalaz (2015-2016), FF La Solana (2016-2017), Rayo Vallecano B (2017-2018), Rayo Vallecano (2018-2019) e Valencia CF (2019-2020). Cos tres primeiros equipos fíxoo na segunda categoría nacional e cos dous últimos na división de honra.
Como futbolista, Irene Ferreras foi gardameta de Rayo Vallecano B, Rayo Vallecano, CF Pozuelo de Alarcón e Atlético de Madrid B, equipo no que se viu obrigada a retirarse en 2015, con só 26 anos, debido a unha lesión de costas.
Os bos desexos de Athenea del Castillo e a mensaxe de Mari Paz Vilas
Mari Paz Vilas e Athenea del Castillo, que teñen traballado con ela, desexáronlle sorte. No caso da galega, coincidiron no Valencia. Mari Paz Vilas comenta no anuncio de Irene Ferreras de que ficha polo Dépor “Non digo nada e dígoo todo” ao que suma un corazón azul. A galega, estaría actualmente sen equipo. Anunciou en xuño que deixaba o Real Betis Féminas, pero aínda non se coñece o seu próximo destino. Terá unha segunda lectura deportivista esa frase de Mari Paz Vilas?
Coa ex do Dépor ABANCA, Athenea del Castillo, Ferreras vén de coincidir no Real Madrid CF. A internacional cántabra tamén coloca un corazón azul e a frase “Toda a sorte do mundo”.
Ver esta publicación en Instagram
A que futbolistas adestrará Irene Ferreras?
Aínda que o bloque de xogadoras que dirixirá está por conformar, parece claro que o obxectivo das branquiazuis ten que ser volver a élite e deixar atrás a Reto Iberdrola. Para este fin xa están confirmadas xogadoras como Raquel García, Cris Martínez, Eva Dios, Ainhoa Marín, Paula Gutiérrez ou Inés Altamira. Todas elas coñecen xa o nome de quen as vai adestrar: Irene Ferreras. Presumiblemente a incorporación da adestradora fará que se coñecen novas incorporacións ás filas do Dépor ABANCA 2022-23.
