Do 4-0 recibido en Cáceres na primeira volta só queda no Dépor ABANCA as ganas de demostrar sobre o tepe de Abegondo que “foi un accidente”. Na rolda de prensa previa ao partido, que terá lugar mañá sábado 21 ás 12:00 na Cidade Deportiva (TVG2), Irene Ferreras declaraba que o bloque que adestra afronta o cruce co Cacereño “con moita ilusión”. A adestradora deportivista advería: “Imos tentar por unha vez manter o liderado varias xornadas consecutivas. Facémolo ante un gran rival, probablemente o equipo que nos fixo mostrar nosa peor versión na primeira volta”.
Xustamente por ser o rival que sacou das Nosas a súa “peor versión”, as futbolistas branquiazuis, líderes da Primera Federación FutFem, afrontan o cruce con “moitas ganas de demostrarnos que o partido da primeira volta en Cáceres foi un accidente e que temos nivel para sacar tres puntos en casa outra vez”.
Aprender dos erros é algo que Irene Ferreras intenta trasladar ás xogadoras que dirixe. “Cando tes un partido como o que tivemos na ida, que para este equipo foi positivo porque nos doeu moito e dos momentos dolorosos un ten que sacar esa aprendizaxe, agora despois de tres meses queremos volver xogar contra elas, volver medirnos, saber que temos que facer cousas moito mellor do que o fixemos e quitarnos un pouquiño esa sensación de que o rival foi moi superior”.
Para a adestradora do Dépor ABANCA “a sensación que tivemos é que a primeira volta foi boa en liñas xerais, competimos todos os partidos menos ese e esa é a espina que tiñamos cravada. Por sorte o fútbol dáche desquites e afrontámolo agora con esas ganas de demostrar que somos un equipo diferente ao de hai tres meses, que queremos facer gozar aquí a en Abegondo á afección e utilizar esta oportunidade que temos para seguir crecendo”.
A evolución do Dépor ABANCA na primera volta
Ve Irene Ferreras unha “evolución en canto a xogo” nas filas do Dépor ABANCA. Considera a técnica madrileña que o equipo galego ten “moito máis marcados os nosos acenos de identidade e aquelas cousas que queremos que nos definan; pero se me tivese que quedar con algo, probablemente quedaríame co aspecto mental, coa capacidade emocional que estamos a mostrar de saber xestionar mellor certos momentos de partido. Os últimos dous partidos foron tamén unha oportunidade de que o equipo se vexa en situacións máis axustadas ou máis comprometidas, onde saímos vitoriosas”.
Ante os medios, Irene Ferreras fixo fincapé no partido da pasada fin de semana ante o Granada CF o Dépor ABANCA tivo “unha situación moi difícil durante o primeiro tramo de partido con circunstancias adversas. No descanso o que me saía dicirlles era que superaramos o peor momento. O equipo soubo responder, estivemos a defender durante ese tempo ata que nos volvemos a atopar. Soubemos soportar. Cando un equipo é capaz de facer isto, xa empezas a ter algo especial como colectivo. Esa é a parte que máis me gusta, que estamos a saber tamén gañar partidos que non teñen un resultado tan solvente e aínda así o equipo amosa capacidade de entender o que toca e de sentirse cómodo”.
Irene Ferreras, entrenadora deportivista: “En Granada o equipo soubo responder. Soubemos soportar. Cando un equipo é capaz de facer isto, xa empezas a ter algo especial como colectivo. Esa é a parte que máis me gusta, que estamos a saber tamén gañar partidos que non teñen un resultado tan solvente e aínda así o equipo amosa capacidade de entender o que toca e de sentirse cómodo”
Irene Ferreras non pensa que o Dépor ABANCA estea no seu mellor momento da temporada: “Temos moita marxe de mellora. Tivemos partidos moi bos a nivel de xogo pero non lle demos unha continuidade en canto a ese rendemento, sobre todo se me fixo máis na fluidez ofensiva e en ser capaz de manter esa identidade durante moitos minutos nos partidos”.
Irene Ferreras quere manterse no camiño aberto en Granada
“O noso reto é ser un pouquiño máis estables en canto a que sexamos igual de reconocibles en cada partido”, declaraba Irene Ferreras ante os medios.
“É verdade que o rival xoga, ponche en dificultades e non sempre podes estar da mesma maneira, pero dentro de que as cousas van ben e que temos que estar tranquilas coa base que asentamos imaxino a este equipo xogando mellor, competindo mellor, corrixindo moitas cousas que temos que facer no día a día e que aínda non temos sequera idea de cal é o teito”.
A adestradora branquiazul opina que a vitoria ante o Granada CF “achanda o camiño desas pantasmas. Cando fas unha cousa e repítela varias veces, a túa cabeza xa di que es capaz de facelo. Sempre custa xerar ese primeiro percorrido. Cando o camiño está marcado, esas crenzas limitantes son moito máis fráxiles. Para nós foi importante por como foi, polo sufrido que foi, por como se deu o partido costa arriba, polo carácter que mantivo o equipo, porque fixemos gol e conseguimos manter a identidade do equipo até os últimos minutos”.
Asegura Irene Ferreras que no cruce de Granada viu “moitas cousas para quedarme contenta, sobre todo en canto a esforzo e sacrificio. Mellorable en xogo, sobre todo a nivel técnico e de execución. Tiñamos boas intencións pero en moitos momentos non ían a bo porto porque non estivemos con esa finura que quizais sexa tamén motivado por esa alta de soltura que estamos a ter ás veces fóra de casa”.
Irene Ferreras, adestradora do Dépor ABANCA: “a primeira vitoria do 2023, márcanos o camiño a seguir. Foi moi importante animicamente para nós e queremos darlle continuidade con outros tres puntos en casa que nos farían entrar nunha dinámica moi boa, que aínda non vivimos e que emocionalmente para o equipo pode ser un plus”
Recalca que esa vitoria, “a primeira do 2023, márcanos o camiño a seguir. Foi moi importante animicamente para nós e ademais queremos darlle continuidade con outros tres puntos en casa que xa nos faría entrar nunha dinámica moi boa, que aínda non vivimos e que emocionalmente para o equipo pode ser un plus”.
