O Dépor ABANCA visita a mañá domingo 15 de xaneiro a Ciudad Deportiva do Granada CF. As xogadoras que adestra Irene Ferreras xogan a partir das 12:00 horas. O partido poderá verse na canle de YouTube do Granada CF.
A adestradora das galegas prognosticaba na previa do partido que se verá: “un partido bonito porque é un gran rival. Demostrou que é un dos equipos que para o meu gusto mellor fútbol practican da categoría. É un equipo proactivo. Imos ter unha loita por quen ten o balón”.
Considera a técnica deportivista que o Granada CF “ten a vantaxe de ser un proxecto xa asentado de varias temporadas, cun adestrador que leva tamén certo tempo no cargo e que se coñecen moi ben. Teñen uns patróns de xogo moi asentados, que sen mirarse atópanse. Este ano, ademais incorporaron en último terzo xogadoras diferenciais como poden ser Naima e Ángeles, que ademais tiven a sorte de adestralas”.
Irene Ferreras explicaba en rolda de prensa que “a priori vai ser un partido moi igualado, na liña tamén do que vimos vendo en temporada. Imos estar sempre no arame da máxima igualdade. Imos tentar xogar o noso fútbol, quitarlles a pelota e xerar o máximo posible”.
Na opinión da adestradora do Dépor ABANCA, nunha competición tan igualada como é a Primera Federación FutFem, “se nós somos capaces de gañar alí, vémolo como unha oportunidade de descolgar a un equipo que para o meu gusto e a priori ten que estar arriba e ten que pelexar por iso; sabendo tamén que calquera tropezo que teñamos, como está a suceder ás veces, permítenos tamén seguir aí porque o resto de equipos tamén falla”.
Propón Irene Ferreras que en Granada o Dépor ABANCA deberá “tentar aproveitar isto que temos. Creo que a presión a teñen elas. Imos nun momento bo, con ganas de deixar atrás esas etiquetas que nos están pondo de que nos custa fóra de casa. Co bo traballo que fixemos esta semana temos unha oportunidade moi bonita de deixalas un pouco aí, a distancia, que nos pode pór as cousas moi de cara”.
Irene Ferreras avisa de que as deportivistas teñen por diante “unha xeira de partidos moi duros. Pero tamén que o equipo me demostrou que neste tipo de partidos está a responder ben. Non queremos mirar máis aló do Granada. Para nós o Granada é pechar a primeira volta, que é así como o marca o calendario e a partir de aí pois faremos un reset, miraremos despois Cacereño, despois Osasuna… Cada semana prepararémolo sempre con ilusión e dándolle un pouco ao reinicio porque o que si que está claro é que non podemos depender do resultado de cada semana para afrontar as seguintes”.
Di a adestradora das coruñesa que o bloque de xogadoras que adestra ten que “fixarse no que facemos e en que podemos mellorar, cambiar, seguir asentando e non angustiarnos con todo o que nos vén agora porque igual que a nós nos vén, nós imos aos rivais e aos rivais vanlles a outros rivais. Temos que estar coa mente tranquila, co foco posto no Granada”.
Irene Ferreras é moi optimista: “Creo que imos facer un bo partido, teño moi boas sensacións, as xogadoras están a facer unha semana moi boa de traballo. Especialmente esta semana nótoas cunha seriedade e unha concentración de equipo que quere facer algo importante, que sabe o que vén e que sabe a importancia que ten de cara ao noso futuro inmediato. Entón, desde esa ilusión e desde ese presente imos competir e a partir de aí xa avaliaremos e volveremos iniciar de cara ao seguinte partido”.
Reiteraba Irene Ferreras que neste mercado de inverno o cadro do Deportivo ABANCA “non vai sufrir ningunha modificación, pero si que é verdade que ata que se cumpra o prazo estamos abertos a unha posibilidade de incorporar unha xogadora zurda porque nos daría certa solvencia en saída de balón, en inicios de xogo. Non descubro nada cando vedes que todos os rivais oriéntannos cara aí, que nos tentan xerar aí un pouco as dificultades. Daríanos unha alternativa máis. Que se pode dar? Fenomenal. Que non se pode dar? Imos ir co que temos porque son as que demostraron que que nos están pondo a 1 punto do líder e que aínda temos moito que dicir”.
Admitía Irene Ferreras, ao respecto do peor balance do Dépor ABANCA lonxe de Abegondo, que é “o que di a estatística. É unha realidade. Agora dentro deses números e dentro de que está claro que non estamos a ser tan fiables fóra de casa, creo que hai que naturalizalo, non poñernos nerviosas porque o que conta é o cómputo da túa competición”.
Irene Ferreras apela á paciencia: “Non estamos se cadra conseguindo eses +3, +3, +3, pero estamos a perder pouco e estamos a competir ben. Hai que ser paciente. Todo o vórtice de ao redor xérache certas dúbidas na cabeza ou che pode xerar certas crenzas limitantes que che custa un pouquiño máis, igual que se xerou unha crenza de que aquí en Abegondo somos súper sólidas e gañamos e todos temos esa sensación de que vai saír ben”.
A adestradora do Dépor ABANCA ve os partidos fóra de casa, empezando polo do domingo en Granada, como “un reto máis ao que hai que enfrontar, que temos que mentalmente superalo e neste 2023 ímolo a facer. É unha materia pendente, estamos a estudar moito e ben para tentar aprobala. Non imos coa angustia ou a ansiedade de ter que facelo xa porque se non se acaba o mundo, porque tampouco é determinante”.
Tal e como apunta a técnica deportivista queda “aínda unha segunda volta completa. Imos tentar aproveitar cada oportunidade que teñamos de coller vantaxe respecto de calquera rival. Para nós a semana pasada foi fundamental a vitoria porque o CD Alba Fundación Femenino paréceme un equipo moi serio, que lle quitou tamén puntos á xente de arriba e que podía estar aí tamén, entón todo o que sexa nese duelo individual con cada equipo poder coller vantaxe e poder ir crecendo como equipo mentres tanto fenomenal”.
