Irene Ferreras, adestradora do Dépor ABANCA compareceu na previa do inicio de competición na sala de prensa de Abegondo acompañada por Kevin Cabado, responsable da sección feminina do Club. Fixérono xuntos a pouco máis de 48 horas de debutar en Primera Federación Iberdrola. O partido das Nosas deportivistas será mañá, domingo 10 de setembro ás 11:00 horas no campo Nou Sardenya de Barcelona (canle de twitch de Betevé) ante o CE Europa.
A adestradora deportivista confesou que a pretemporada “se lle pasara moi rápido. Cando estás a gozar do día a día e cando todo sae todo tan rodado porque as sensacións eran moi boas fai que se me pasara moi rápido. Goceina moito pero xa con ganas de empezar. O deportista vive da tensión competitiva e esta semana notouse que había outra sensación por dentro. Xa pensando no partido ante o CE Europa, en iniciar ben a liga”.
Asegura que “estamos preparadas, con moitas ganas. Agora a manifestar esas ganas desde dentro do campo e a traernos os 3 puntos”.
Preguntada polo CE Europa lembra que “nas primeiras xornadas é esa incógnita porque é un equipo que acaba de ascender. Coñecemos cousas que veñen facendo a temporada pasada, algunha cousa de pretemporada pero neses primeiros pasos aínda os equipos teñen moito que percorrer a nivel de xogo, a nivel de traballo. Imos ver que nos atopamos”.
Advirte a adestradora do Dépor ABANCA que o que o rival das Nosas é un equipo “con bo trato de balón, con moita experiencia nas súas filas, con xogadoras que saben competir moi ben e xestionar os momentos de partido. E logo un contexto que lles favorece porque xogan en casa, un campo que aperta moito, con moita cultura de fútbol. Imos vivir unha contorna bonita onde nos temos que sobrepor e ter madurez para xogar ese partido como temos que facelo”.
A adestradora do Dépor ABANCA quere “ir paso a paso”
Da temporada pasada, Irene Ferreras comenta que “fixemos moita análise e moita reflexión sobre todo, a nivel de xogo, emocional, de vestiario, infraestrutura, medios… Valoramos cada unha das cousas que nos poden facer un pouquiño mellor. O importante é que desas experiencias leves leccións que che poidan axudar para conseguir obxectivos no futuro. Temos que utilizar esa experiencia como pequena vantaxe polo menos en vivir momentos de tensión, en verte moi preto dun obxectivo que todos queriamos”.
Ferreras: “Temos que utilizar a experiencia como vantaxe polo menos en vivir momentos de tensión, en verte moi preto dun obxectivo que todos queriamos”
Pide Irene Ferreras que “todo iso nos faga máis fortes, fáganos un equipo máis preparado e afrontar as cousas con ilusión, con tranquilidade tamén porque isto é moi longo. Hai que ir paso a paso. Agora só pensamos nesta primeira xornada e tentar comezar con bo pé”, engade.
Kevin Cabado apunta á importancia da base
Pola súa banda, Kevin Cabado agradeceu a Rocío Candal, a súa antecesora no posto, “todo o traballo previo e a todas as persoas que estiveron antes no Dépor ABANCA. Tentaremos aproveitar polo ben do Club todo ese traballo previo e seguir construíndo o noso camiño”.
Así mesmo, opina que “temos un cadro para optar ao máximo” e pide “centrarse no CE Europa, en sacar os 3 primeiros puntos pero estamos moi contentos co cadro. Falado con Irene, co staff debemos deixarlle paso á xente do fútbol base. Temos xogadoras preparadas para sumar xa”.
Pon como exemplo ás futbolistas que actúan como centrais no Dépor ABANCA, con só tres pero “Elena Vázquez e Paula Monteagudo pódennos axudar. Só temos tres mediocentros puras pero cremos o mesmo de Carmen Carballada que de Marta Rico. E en cuestións ofensivas temos mozas chamando á porta como Laura Otero, Lucía Rivas”.
