A primeira derrota do Dépor ABANCA ten unha “lectura doada” segundo declaraba Irene Ferreras, a adestradora do conxunto coruñés, tras o partido á canle do Cacereño Feminino TV. “Penso que a lectura é sinxela. Foron mellores en practicamente todo. Hai que felicitar ao rival. Nós temos que identificar que pasou hoxe e tentar mellorar de fronte ao próximo partido”, dixo sen medias tintas a preparadora deportivista.
Irene Ferreras explicaba que o CP Cacereño non sorprendeu ao Dépor ABANCA. “Viñamos co respecto que o rival merecía. Criamos que estaban a facer as cousas moi ben”, admitía tras o 4-0.
Tal e como declarou a preparadora madrileña do equipo branquiazul: “Non nos sorprenderon a nivel de plantexamenton nin de competitividade, o equipo estaba mentalizado, pero en momentos puntuais do partido non fomos quen de repoñernos a nivel mental. Elas crérono e estiveron efectivas en todas as situacións e nós tivemos erros impropios que xeraron un resultado máis avultado. So nos quedaba seguir no partido do xeito máis digno posible e pensar no seguinte”, dixo a adestradora deportivista.
Consultada sobre como vía as posibilidades do CP Cacereño na Primera Federación, Irene Ferreras advertía: “Vai haber moita competitividade, cada partido é un mundo. Un so resultado nun partido non serve para sacar conclusións, pero si creo que o CP Cacereño é un equipo moi completo, moi traballado e que ten un empaque veñen dun proxecto de durabilidade. As xogadoras coñécense ben e están automatizadas e iso é un punto ao seu favor fronte aos rivais. Logo xa os pequenos detalles decidirán onde estarán na clasificación”.
