Na Liga Feminina 2 aínda quedan 18 puntos en xogo, moi necesarios para equipos que se atopan atrancados na cola da clasificación. Dous deles son o Ulla Oil Rosalía e a AD Cortegada, que se citarán este sábado, 30 de xaneiro, ás 17:00 horas en terras compostelás.
Estes clubs galegos ocupan a antepenúltima e penúltima praza respectivamente e chegan ao duelo nun momento complicado. As anfitrioas perderon sete dos últimos oito partidos que xogaron.
O Rosalía só foi capaz de vencer ás colistas do Magec Tías, na recuperación da décima xornada. Dous puntos vitais nesta competida loita por permanecer na división de prata.
Pola súa banda, as de Vilagarcía acumulan catro derrotas consecutivas e levan sen xogar dúas semanas, xa que o encontro que tiñan previsto para a 17ª xornada ante o Celta Zorka Recalvi tivo que se adiar ao detectar as celestes casos de COVID-19 no plantel.
O Rosalía fíxose co primeiro duelo entre galegas
Na táboa, compostelás e arousás están separadas só por dous puntos, os que lograron as xogadoras de Chiqui Barros no partido de ida, o que foi a súa primeira vitoria da tempada.
Na primeira volta, as brancas do Rosalía foron quen de darlle a volta ao ritmo do partido. O Cortegada comezou dominando no primeiro cuarto, pero perdeu fol e as entón visitantes achegábanse cada vez máis a elas no marcador.
Para a segunda parte do encontro, as compostelás saíron moi enchufadas á pista e desarmou por completo o ataque arousán. A falta de dez minutos, as brancas xa gañaban de cinco puntos. Pero o último cuarto foi mostra dun duelo igualado e competido, pero que finalmente caeu para o Rosalía.
Baixas e altas
No plantel dirixido por Chiqui Barros faltará Alba Rama. A 13 mancouse no partido ante o Celta e continúa de baixa, polo que polo de agora non poderá volver ás pistas.
No banco do Cortegada, hai unha nova incorporación. A pasada semana o club informaba da fichaxe de Mercy Wanyama, que chega para reforzar ao equipo neste tramo final de tempada e cubrir a marcha de Teodora Saric. Esta é unha pívot con experiencia xa na categoría, onde xogou nos dous últimos cursos coa ADBA.
O Rosalía logra a súa primeira vitoria cun 48-55 contra o Cortegada
