Coa terceira xornada da fase de ascenso, o Victoria CF segue sumando puntos para ter opcións de pasar ao play-off. As coruñesas recibiron en casa ao Racing de Santander B, o colista do grupo 1C da Primeira Nacional. Con todo, as visitantes lograron manterse dentro do partido e empatar cun 1-1 un duelo dominado polas galegas.
As cebras volvían a casa despois da primeira xornada fóra de Galicia, onde colleitaron un empate 1-1 ante o Real Oviedo Femenino B. No partido de A Grela, o marcador mantívose igual, nun partido marcado pola borrasca Lola na segunda metade, o que dificultou moito o xogo en ambos bandos. Ao longo do encontro, o dominio das cebras foi total, con ata sete ocasións moi claras protagonizadas por Bita, Ceti e María e varios man a man coa porteira rival e tiros ao pao en tres ocasións.
O Victoria CF tivo a vitoria na súa man
Os plans de partido nos dous bancos eran distintos. Nos primeiros minutos, puidose ver a un Victoria CF enchufado, saíndo a polo partido desde o primeiro momento. Pola contra, o Racing de Santander B seguiu a táctica de pecharse atrás, agardando a súa oportunidade ao contraataque.
Na primeira metade, Bita tivo moi preto o gol cun man a man contra a gardameta cántabra, no que o disparo foi fóra. Tamén Ceti tivo a súa ocasión ante a porteira rival, pero desta vez a defensa evitou o tanto case sorbe a liña de gol. O ritmo aumentaba no verde e tamén o facía a tensión. O ataque das galegas era cada vez máis frecuente e nunha acción, unha xogadora cántabra interceptou o balón coa man desde o chan, na súa área, provocando protestas por un posible penalti.
Co marcador a ceros chegou o descanso, despois de 45 minutos dun Victoria CF incansable e un Racing de Santander pechado no seu campo, esperando as contras montadas polas súas futbolistas desde as bandas.
Na segunda parte, o cadro local botouse máis arriba aínda apra buscar o gol que parecía non chegar. As visitantes seguían esperando ás contras e tiveron unha única ocasión perigosa, na que chegou o premio. No minuto 66, Valentina Lucumi abriu a lata do partido, cun 0-1 a favor das cántabras.
Co tanto en contra e a choiva cada vez máis forte, o Victoria de Cris Oreiro non baixou os brazos e seguiu traballando para puntuar, controlando os tempos do partido. As ocasións sucedíanse, pero María, con as oportunidades máis claras, encontrábase continuamente cos paos. A mesma futbolista fsufriu unha falta na área, que porén o equipo arbitral non considerou como penalti.
Finalmente, o gol coruñés chegaría ao bordo do final, mediante unha falta sacada por Bita. O balón semellaba non querer entrar a favor das cebras, e despois de dar no traveseiro e, por fin, Alba García aproveita o rechazo para anotar. 1-1 e final en A Grela.
FICHA TÉCNICA
VICTORIA CF: Clara Taboada, María Sánchez, Iria Santos, Rosario Etcheverría, Laura Cetina, Tatiana Tenreiro, María Nogueira, Ana Gómez (min.58, Mirian Garabato), Andrea Díaz, Paloma González (min.62, Carla García), Alba Suárez.
RACING DE SANTANDER B: Paula Muñoz, Paola Crespo, Claudia González, Laura Viñas, Naara Miranda, Naiara Ordax (min- 56, Irene Canal), Gabriela González (min.45, Sofía Bolado), Irene Campo (min. 61, Julia Ceballos), Aroa Peña (min. 69, Andrea Muñoz), Irene Arias, Valentina Lucumi.
GOLES: 0-1 (min. 66, Valentina Lucumi); 1-1 (min- 83, Alba García).
CORPO ARBITRAL: Óscar López, Daniel Naya e Yannick Juncial do colexio galego. Amonestaron con tarxeta amarela a Naara Miranda, do Racing Féminas, e con cartón amarelo a Iria Santos, do Victoria.
INCIDENCIAS: Partido da terceira xornada do grupo 1 C de ascenso a Reto Iberdrola disputada no campo de fútbol da Grela I na cidade de A Coruña.
