- A gran campaña da central estremeña Inma Lavado levoulle á Selección Española, coa que prepara actualmente o preuropeo.
- Urrea, formada no Xuvenil Teis, confirmouse este curso como un dos grandes talentos do vóley galego do presente e do futuro.
“É unha excelente noticia porque seguimos contando con xogadoras que xa coñecen como funciona o equipo. Saben como traballamos, como queremos xogar e melloraron moitísimo en todos os aspectos, especialmente no físico”, afirmaba o adestrador do CV Arenal Emevé, José Valle ao respecto da continuidade de Inma Lavado e Sara Urrea baixo as súas ordes. Ambas as dúas xogadoras sumarán así tres anos como loitadoras.
O proxecto do CV Arenal Emevé para a liga Iberdrola 21-22 segue afianzando o seu persoal e no día de hoxe confirmou a renovación de dúas importantes pezas da súa engrenaxe: Inma Lavado e Sara Urrea. A xogadora estremeña, recentemente convocada pola Selección Española, e a súa compañeira viguesa estenden a súa vinculación coas Loitadoras unha tempada máis.
Os labores de conformación do plantel que dirixirá José Valle a próxima tempada na Liga Iberdrola de voleibol continúa a velocidade de cruceiro coas renovacións confirmadas no día de hoxe. O técnico de Abadín terá de novo á súa disposición a dúas das súas máis prezadas pupilas, que seguirán crecendo baixo as súas ordes.
Proba da evolución de ambas as nas filas do CV Arenal Emevé é a convocatoria de Inma Lavado para a preselección do combinado nacional, coa que Pascual Saurín traballa estes días en Guadalaxara para preparar o preuropeo.
Pola súa banda, Sara Urrea confirmouse, tras a súa volta a Galicia, como un dos grandes talentos de presente e de futuro que ten este deporte na súa terra natal.
Así ve José Valle as renovacións de Urrea e Lavado
A continuidade de ambas é un feito que celebra o seu adestrador, José Valle, que sinala que “é unha excelente noticia porque seguimos contando con xogadoras que xa coñecen como funciona o equipo. Saben como traballamos, como queremos xogar e melloraron moitísimo en todos os aspectos, especialmente no físico. O seu bo traballo valeulles para formar parte da convocatoria previa da Selección Española, no caso de Inma Lavado, e estou seguro de que Sara tamén terá oportunidades como esa porque é moi nova”, afirma o técnico do CV Arenal Emevé.
O arduo traballo levado a cabo nas oficinas do club lucense fai que o CV Arenal Emevé confirmase xa a nove caras para a tempada 21-22: as renovacións de Inma Lavado, Sara Urrea, Marta Otero, Lidia Figueira, Ainara Burgo e Carolina Camino, ás que hai que sumar as chegadas de Jimena Fernández Gayoso, Eliana González e Yael Castiglione.
