A estrea do Autos Cancela Zalaeta neste curso ligueiro na Superliga Femenina 2 (SLF2) de voleibol é como local. As xogadoras que adestra, un ano máis, Jorge Barrero, reciben no polideportivo do Barrio das Flores ao VB Almendralejo Extremadura. Será ás 19:00 horas de hoxe, sábado 8 de outubro.
As coruñesas son o único representante galego na categoría de prata do volei estatal. Boa parte das xogadoras empregaron o adxectivo “ilusionante” para definir este curso 2022-23 que agora comezan.
As xogadoras do Autos Cancela Zalaeta
Para esta temporada 2022-23, o conxunto herculio do Autos Cancela Zalaeta recupera algunha xogadoras para este curso 2022-23 como Emma Ordóñez o Inés Rivas. Outras incorporacións que son novidade e non retorno son as deportistas: Sara Urrea e Cecilia Thon. Continúan xogadoras como Alba Quirós, Claudia Gómez, Laura Vázquez, Carmen Carbajal, María Forteza-Rey, Eleonora Guzzi, Andrea Rivas, Irene Yáñez, Paula Lorenzo, Patri Santos ou Noa Sánchez.
Emma Ordóñez retorna ao club coruñés tras unha etapa nas Illas Canarias. Formouse no Boiro, e xogou nestes anos no CV Haris de Tenerife e no CV Sayre Mayser de Gran Canaria. A de Boiro defende que: “Como en casa, en ningún sitio. Teño moitas ganas de voltar ao xogar no fortín e gozar desta tempada, penso que vai ser moi interesante e bonita”.
Ver esta publicación en Instagram
A central Inés Rivas volve a casa logo do seu paso polo CV Arenal Emevé de Lugo onde a de Monte Alto xogou mentres estudiaba. Di estar “con moitas ganas de aportar ao equipo todo o aprendido nestes últimos anos para poder axudar a chegar ás metas tan ambiciosas que temos propostas, pero sobre todo ilusionada de volver a casa”.
Ver esta publicación en Instagram
A portoriqueña Cecilia Thon xoga como colocadora. Aterra non Autos Cancela Zalaeta logo de estar un ano no Club Voleibol Bruxas. Compaxinará os adestramentos co estudo dun mestrado na USC. Thon está “emocionada” co feito de “continuar a miña carreira no voleibol co Zalaeta e ter unha tempada chea de esforzo e paixón polo volei”.
Ver esta publicación en Instagram
Sara Urrea é unha xogadora de Vigo saída da canteira do Xuvenil Teis que conta con varias convocatorias internacionais en categorías inferiores. Xogou tamén no CV Haris e no CV Arenal Emevé Lugo desde onde chega ao Autos Cancela Zalaeta.
A deportista xoga de oposta e chega á Coruña “coa intención de continuar nas mellores condicións os seus estudos de INEF e dar a súa mellor versión no Barrio das Flores”, explican desde o club herculino. A propia Sara Urrea declaraba nas redes do Autos Cancela Zalaeta chegar: “Con moitas ganas e ilusión a este club. Veño a dalo todo e coido que podemos chegar moi loonxe. Estou desexando empezar!”
Ver esta publicación en Instagram
Entre as xogadoras que continúan ás ordes de Jorge Barrero, Patri Santos declaraba que espera “iniciar a tempada de mellor maneira posible, con boas sensacións e cohesión grupal que nos vai levar a conseguir os obxectivos que nos propoñamos”.
A líbero Noa Sánchez declaraba antes do inicio da competición “tras 15 anos no club, coido que é un dos anos con máis ilusión e ganas de comezar. O bo grupo que fixemos, engadido ás caras novas que se presentan, sen esquecer ao noso amplo corpo técnico, fai deste un ano cheo de soños, coido que este é o ano”.
Paula Lorenzo, tamén líbero, decía estar “desexando volver empezar” e loita por impedir que “a pelota toque o chan no noso fortín”.
Eleonora Guzzi manifestaba que logo de varias tempadas mantendo “os nosos obxectivos pero con altos e baixos, ten chegado o momento de apuntar máis alto con todo neste novo proxecto”. Pola súa parte, a lucense Irene Yáñez afronta a súa segunda tempada defendendo a elástica do Autos Cancela Zalaeta “con moitas ganas de empezar esta nova tempada. Novas incorporacións e novas sensacións”. A coruñesa Andrea Rivas e outra das centrais do club herculino que tamén manifestaba a súa ilusión neste curso: “un novo proxecto emocionante e un grupo que non defrauda xamáis”.
Ver esta publicación en Instagram
Na posición de punta-receptora repiten nas filas do Zala xogadoras como Laura Vázquez que define este ano con dúas palabras “motivación e curiosidade”, Carmen Carvajal que tras superar a súa lesión de xeonllo chega “coas pilas cargadas”, e María Forteza-Rey que asegura chegar “preparada para afrontar este ano e pór ao servizo do equipo todo o que teño”.
Na posición de oposta, Jorge Barrero contará este curso con Alba Quirós que di estar “con máis forzas, ganas e ilusión que nunca de conseguir todo o que nos propoñamos, este vai ser o noso ano”, anuncia a grancanaria que comparte posto con Claudia Gómez. A de Boiro tamén está “Desexando empezar esta tempada, que ten moi boa pinta”.
A SLF2 conta cun total de 36 equipos, repartidos en tres grupos que loitarán polos dous billetes cara á próxima edición da Liga Iberdrola. As galegas do Zala está no Grupo A compartindo sorte con clubs como o seu rival desta primeira xornada o VB Almendralejo Extremadura e tamén:
- CV Torrejón
- Santa Cruz Cuesta Piedra
- VP Madrid
- CV Leganés.com
- Fedes Ascensores La Laguna
- Vóley Torrelavega
- Vóley Sanse Live Vuvuzela
- Extremadura Arroyo
- RCG Covadonga
- CV Oviedo
