- O calendario de bandeiras da Liga Galega de Traiñeiras soltará estacha o vindeiro día 28
- A Liga Feminina é a que máis medra
A conta atrás para o inicio da temporada 2025 da Liga Galega de Traiñeiras vai chegando á súa fin. As tres categorías que forman parte desta competición comezarán a remar o vindeiro día 28 e o calendario abarca case dous meses de regatas que espallarán a emoción polas rías da nosa comunidades. En xogo estarán tres camisolas de líderes do Trofeo Xunta de Galicia das que este luns se deu a coñecer o seu deseño.
A competición arrincará o próximo 28 de xuño coa XI Bandeira Concello de Redondela da Liga A, a III Bandeira Chapela-Wofco da Liga B e a X Bandeira Feminina Concello de Redondela. En total, serán case unha trintena de regatas nas que participarán 27 equipos.
🚣♀️ @DiegoCalvoPouso, presentou xunto co presidente da @Ligalgt, Javier Rodríguez, o maillot que levarán os líderes das competicións A, B e feminina da @Ligalgt
🤝 Tamén lle trasladou o apoio da @Xunta á competición, que este ano conta con 27 equipos
🔗 https://t.co/kenUzgeCZB pic.twitter.com/2AKKrFBgEw
— Presidencia, Xustiza e Deportes (@ConsPresidencia) June 16, 2025
O acto celebrado na sede central da Xunta de Galicia en San Caetano (Santiago de Compostela) contou coa presenza de Diego Calvo, conselleiro de Presidencia, Xustiza e Deportes; de José Ramón Lete Lasa, secretario xeral para o Deporte; e de Javier Rodríguez, presidente da Liga Galega de Traiñeiras (LGT). O máximo responsable da competición agradeceu a implicación que a Xunta de Galicia demostra un ano máis con este histórico certame, segunda informa a Liga Galega de Traiñeiras (LGT).
Os detalles da temporada que está a punto de arrancar serán desvelados este sábado, día 21, na presentación oficial d LGT 2025, que terá como escenario A Pobra do Caramiñal. En total, o calendario ofrece 27 bandeiras. As tres Ligas soltarán estacha o último sábado do presente mes no campo de regatas de Chapela.
A Liga Feminina da Liga Galega de Traiñeiras é a que máis medra
A categoría que máis crecemento experimenta na cifra de participantes é a Liga Feminina. Hai dez embarcacións inscritas:
- Amegrove
- Cabo de Cruz
- Salgado-Perillo
- Tirán-Pereira
- Rianxo
- Castropol
- Cesantes-Bueu-Cefycal-Simei
- Mecos
- A Cabana de Ferrol
- E a defensora do título Chapela-Wofco
A Liga A masculina contará con once traiñeiras.
- Narón
- Cabo da Cruz
- Castropol
- Cesantes-Rodavigo
- Chapela-Wofco
- Mecos
- Urme
- Samertolameu-Oversea
- Tirán-Pereira
- Bueu
- Mugardos
Serán as candidatas a suceder no palmarés a Ares.
Tamén está vacante o trono da Liga B. Sen a tripulación de Cedeira, a vencedora no 2024, pugnarán pola camisola Xunta de Galicia da segunda división masculina os remeiros de Bueu-Simei B, Salgado-Perillo, Puebla, Chapela -Wofco B e A Cabana Ferrol.
