Chegou o día. A Primeira Nacional feminina da o pistoletazo de saída un ano máis. Neste curso 2021-22 o Grupo 1, no que se ubican os conxuntos da nosa autonomía, haberá nove equipos galegos:
- Peluquería Mixta Friol
- RC Deportivo ABANCA B
- Sárdoma CF
- SD Villestro
- UD Mos
- Umia FC
- Viajes InterRías FF
- Victoria CF
- Victoria FC
Xunto a estes clubes estarán tamén os equipos asturianos do Real Sporting de Gijón SAD B, Oviedo Moderno B, Gijón Fútbol Femenino e o CF Versalles A de Avilés. A eles súmase o conxunto leonés do CD Olímpico de León.
Nesta xornada de arranque da competición na Primeira Nacional os partidos repártense entre sábado e domingo do seguinte xeito:
SÁBADO 4/9/21
- 18:00 Victoria CF vs Sárdoma CF
- 18:30 Viajes InterRías Fútbol Femenino vs Dépor ABANCA B
- 19:00 Umia CF vs SD Villestro Femenino
DOMINGO 5/9/21
- 11:30 Victoria CF vs UD Mos
- 12:00 Real Sporting de Gijón SAD B vs Versalles A
- 12:00 CD Olímpico de León vs Oviedo Moderno CF B
- 17:00 Gijón Fútbol Femenino vs Peluquería Mixta Friol
Deste xeito todos os equipos galegos xogan entre si agás o Peluquería Mixta Friol, que acaba de descender a esta categoría desde a Reto Iberdrola, e que inicia o curso 2021-22 fóra da casda na cancha do Gijón Fútbol Femenino.
Santa Isabel, primeiro escenario co Victoria FC – Sárdoma
O partido no que rodará primeiro o balón xógase en Santa Isabel (sábado 4/9/21 – 18:00h). É o que medirá ao conxunto santiagués do Victoria FC co Sárdoma que adestra David Ferreiro.
O Sárdoma finalizou a tempada pasada como o mellor do grupo pola permanencia, este ano, aínda que non terá a Paula Monteagudo (fichada polo Dépor ABANCA), si contará con outras incorporacións, incluída, por exemplo, a de Sara Álvarez que retorna desde o Dépor. Cambio de cromos.
As santiaguesas, adestradas por Chivi García, coñecen perfectamente a categoría na que levan militando xa cinco campañas. Até o de agora foron un dos equipos que amosaban mellor fútbol neste Grupo 1, pero este ano perden algunhas xogadoras. No Victoria FC seguen a confiar a súa sorte ao traballo coa canteira compostelá. Trátase dunha filosofía de club.
Viajes InterRías FF e Dépor ABANCA B xogan en Villalonga
Se avanzamos cronoloxicamente topámonos no calendario de partido co Viajes InterRías FF vs Dépor ABANCA B (sábado 4/9/21 – 18:30 h Campo Novo San Pedro de Villalonga).
As de Sanxenxo sempre presentan un equipo competitivo e este ano non vai ser menos. En pretempada vencía ao PM Friol na Reigosa 0-3.
Sobre o filial branquiazul, pouco que apuntar.Son un bloque pensado para surtir de futbolistas ao primeiro equipo coruñés, que este ano militará na Liga Reto, así que intentan contar coas mellores futbolistas galegas ao seu alcance.
Umia e Villestro xogarán na Bouza
Seguinte parada no calendario da Primeira Nacional Grupo 1 é na parroquia de Barrantes, no concello de Ribadumia. Umia CF Feminino A e SD Villestro Femenino enfróntanse no Campo Municipal ‘A Bouza’ a partir das 19:00 horas do sábado 4/9/21.
A SD Villestro, acabada de ascender, é unha incógnita na súa adaptación á categoría. Pero o que parece obvio é que chega a esta nova etapa cheo de ganas, ilusión, con moito que gañar e pouco que perder. Dispostas, polo tanto, a dar a sorpresa ás ordes de Pere Tobaruela.
No banco do Umia CF estará Jorge Quintana Jito, que xa adestrou as vermellas o pasado curso. Neste farao coa meta, en primeiro lugar, de conseguir a permanencia sen atrancos. Logo, xa a competición dirá se as de Ribadumia poden aspirar a máis neste novo curso. Polo que respecta ás incorporacións, hai continuidade no bloque de futbolistas que repiten ás ordes de Jito.
As Cebras contra as abellas
A mañá do domingo enfronta ao Victoria CF, coñecidas como as cebras, contra da UD Mos, que por vestir de amarelo chámanlles as abellas. Así que cebras e abellas veranse as facianas este domingo 5 de setembro ás 11:30 horas no campo coruñés da Grela 1.
O Victoria CF o ano pasado rozaba o soño do ascenso á Liga Reto Iberdrola baixo a batuta da ex futbolista Cris Oreiro. Faltoulles moi pouco para acadar unha meta que sería todo un paso para a entidade coruñesa que leva anos traballando á base do futfem na cidade.
A adestradora que foi quen de levar ao bloque ás portas da segunda categoría estatal, Cris Oreiro, é quen segue á fronte do primeiro equipo das coruñesas. Empezan polo tanto este curso coa bitola de ser unha das favoritas a loitar polo ascenso, xunto co descendido PM Friol.
As mosenses, pola súa banda, están adestradas este ano polo técnico Edu González que empeza a tempada lonxe do banco por mor dun asunto de saúde.
Debut do PM Friol fóra da casa
As lucenses do Peluquería Mixta Friol empezan o seu traxecto nesta categoría da Primeira Nacional, logo de descender da Liga Reto Iberdrola, fóra de Galicia, lonxe da Reigosa. Tócalles visitar ao Gijón Fútbol Femenino ás 17:00 horas do domingo 5/9/21 no Campo La Cruz. O conxunto lucense reforzouse con bastantes fichaxes este ano, polo que busca claramente recuperar a categoría o máis rápido posible.
Este encontro da Primeira Nacional vai ser transmitido ao vivo na canle de Area21 TV. As asturianas están adestradas por Martín Rodríguez e teñen dúas baixas por lesión.
Mediodía domincal con dous choques
Os outros dous partidos xóganse ás 12:00. Trátase do Real Sporting de Gijón SAD B, que adestra Carlos Herrero, que se enfrontará ao conxunto avilesino do Versalles A. O partido terá lugar na Escuela de Fútbol de Mareo. E o CD Olímpico de León que recibirá no Complejo Olímpico de León ao filial do Oviedo Moderno.
As futbolistas do Real Sporting de Gijón SAD B, sendo como son un filial, teñen como obxectivo medrar e manter o nivel competitivo para surtir de xogadoras ao primeiro equipo. No caso do Versalles A, estamos diante dun equipo que acaba de chegar á categoría polo que, como no caso do Villestro, a súa adaptación é, aínda unha incógnita. No seu banco estará Pedro Arboleya.
No que atinxe ao outro partido, o CD Olímpico de León está adestrado por Itziar Abascal. Cambia de grupo xa que en anos previos estaba encadrado no Grupo V da Primeira Nacional. O seu rival é un equipo con xogadoras mozas pero que xa se coñecen polo que conforman un bloque sólido.
Consulta aquí a seguinte xornada da Primeira Nacional Grupo 1 da RFEF e clasificación
