A alcaldesa da Coruña, Inés Rey, visitou esta mañá, venres 27 de novembro) os campos de fútbol de San Pedro de Visma acompañada da concelleira de Deportes, Mónica Martínez, o presidente da Federación Española de Fútbol, Luis Rubiales, e o presidente da Federación Galega, Rafael Louzán. No acto a rexedora coruñesa destacou o papel das pioneiras coruñesas do balompé e defendeu que “chegou a hora de que as mulleres ocupen o lugar que lles corresponde na xestión directiva dos clubs e as federacións”.
Para a alcaldesa Inés Rey, falar de fútbol coruñés tamén “é falar de igualdade”, porque “fomos pioneiros no fútbol feminino, mediante nomes como a porteira Irene ou o Karbo nos anos 80, até o boom actual. E do mesmo xeito que o fútbol feminino chegou para se quedar, tamén chegou a hora de que as mulleres ocupen o lugar que lles corresponde na xestión directiva dos clubs e as federacións”, sinalou.
Inés Rey, alcaldesa da Coruña: “Na Coruña fomos pioneiros no fútbol feminino, mediante nomes como a porteira Irene ou o Karbo nos anos 80, até o boom actual”
Defendeu diante das persoas asistentes ao acto que A Coruña “é unha capital futbolística de nivel internacional, por moitas razóns que van da elite á base e que desembocan en recintos como estes campos de San Pedro de Visma, onde cada fin de semana centos de mozas e mozos soñan pero, sobre todo, se divirten mediante unha actividade saudable”. Para iso, dixo, “contamos cun enorme tecido social, as persoas representantes dos nosos múltiples clubs, que representan unha longa tradición cívica, os que chamamos ‘os modestos'”.
A alcaldesa destacou, durante su visita ás instalacións deportivas, o enorme labor dos clubs da cidade coruñesa no desenvolvemento dun fútbol con valores.
Inés Rey, alcaldesa da Coruña: “En campos como os de San Pedro de Visma, cada fin de semana centos de mozas e mozos soñan pero, sobre todo, se divirten mediante unha actividade saudable”
Rey quixo mencionar o labor da Asociación de Fútbol Afeccionado da Coruña, a AFAC, que coas súas máis de 5.000 fichas de equipos femininos e masculinos “converteu á Coruña en exemplo de organización e implicación social neste deporte”. E lembrou a entrega histórica de persoas anónimas do fútbol modesto que dedicaban moitas horas a estes clubs modestos, clubs que se converteron en auténticos motores de integración e socialización nos barrios.
Rey anuncia unha cuberta para Visma
Segundo adiantou a rexedora, o Concello da Coruña construirá unha cuberta para a bancada do campo de fútbol de San Pedro de Visma. Rey anunciou a intención do Concello de construír unha cuberta para a bancada do campo principal, que se sumará a outras actuacións como a marquesiña para que as persoas afeccionadas estean baixo cuberto no campo e as gaiolas en que os equipos gardan o seu material que o concello xa habilitou.
Por outra banda, lembrou o compromiso do Goberno local co fútbol modesto e lembrou que comezarán en decembro as obras do campo de Eirís para que se una así aos de Visma, ao da Grela e aos da Cidade Deportiva da Torre, onde se cambiará a herba artificial en varios campos e acometeranse diversas melloras.
Fútbol con valores
A rexedora Inés Rey destacou o enorme labor dos clubs no desenvolvemento da práctica do fútbol na nosa cidade, dun fútbol con valores, “porque falar de fútbol na Coruña é facelo da Coruña mesma, das entidades que en cada barrio funcionan como centros de reunión e convivencia, unindo así a responsabilidade social á deportiva” e “tamén é facelo deses directivos e directivas que rascan os seus petos e sacan tempo de onde sexa para se preocuparen pola ficha daquel cadete ou animaren a que as mozas proben no fútbol feminino”.
Agradecemento á RFEF polo apoio no caso Fuenlabrada
A alcaldesa insistiu na necesidade de que as administracións e as entidades colaboren na defensa dun fútbol con valores. Neste senso, quixo agradecerlle publicamente á Real Federación Española de Fútbol e o seu presidente, Luis Rubiales, o seu apoio no caso Fuenlabrada, “non esquecemos que estivo ao lado dos auténticos valores do fútbol, os que defendemos todas e todos os que estamos aquí, e, en especial, as e os usuarios de campos como este”.
No transcurso do acto, Inés Rey recibiu de Luis Rubiales unha camiseta da Selección Española de Fútbol ‘La Roja’ co seu nome na espalda.
