- A alcaldesa da Coruña, Inés Rey, declarou constituído formalmente o primeiro Consello Municipal do Deporte da historia cidade ao que asistiron 120 persoas representantes de 93 entidades deportivas, 12 institucións e 7 entidades sociais, “que desde hoxe intervirán na práctica deportiva da Coruña”
A rexedora herculina, Inés Rey, referiuse ao novo Consello Municipal do Deporte da Cidade da Coruña como un “espazo de reflexión e decisión sobre a organización da estrutura deportiva coruñesa en que lles daremos voz ás diferentes dimensións do deporte, desde o ámbito máis local e de base, ao de elite e de maior proxección internacional” xa que, apuntou, “para mellorar, dinamizar e potenciar o deporte da cidade é necesaria a participación de todos os axentes deportivos”.
📣Por primeira vez na historia da cidade A Coruña conta hoxe cun Consello Municipal do Deporte.
🗣 Un espazo de participación en que se lles dará voz ás diferentes dimensións do deporte coruñés, “desde o ámbito máis local e de base ao de elite e de maior proxección internacional” pic.twitter.com/AOb7WdIu3r— Concello da Coruña (@ConcelloCoruna) April 6, 2021
O estadio de Riazor da Coruña, nomeadamente a súa grada de Tribuna Inferior, acolleu o pleno constitutivo do Consello Municipal do Deporte. Estaba previsto que o acto se celebrase no Pazo dos Deportes de Riazor, pero finalmente para aumentar as medidas de prevención diante da pandemia de COVID-19, optouse pola posta en escea no recinto anexo, máis grande e ao aire libre.
Ao pleno constitutivo asistiron 120 persoas e estivo presidido pola alcaldesa da Coruña, que preside deste novo ente, así como a concelleira de Deportes e vicepresidenta primeira do consello, Mónica Martínez; o vicepresidente segundo, Fernando Blanco; e o secretario do consello, Pablo Castedo.
Representación de entidades e institucións deportivas e sociais, Xunta, Deputación, UDC, COLEF, etc
Á sesión constitutiva tamén asistiron persoas representantes de 93 entidades deportivas, 12 organismos e institucións e 7 entidades sociais, “que intervirán desde hoxe na práctica deportiva da cidade do futuro e, por tanto, na Coruña que queremos e na que cremos”, sinalou a alcaldesa.
O CMD será un espazo de decisión e de reflexión. Sabedes que é vontade deste Goberno Local velar polo deporte nas as súas múltiples manifestacións.
O Deporte corrixe desequilibrios sociais, impulsa a cultura do esforzo e a cohesión social. Son valores que van máis aló das canchas pic.twitter.com/Zykf4WbrQg— Inés Rey García (@inesreygarcia) April 6, 2021
Ademais de todos os clubs, asociacións e federacións deportivas da cidade tamén están representadas neste consello institucións e organismos como a Xunta de Galicia, Deputación da Coruña, Autoridade Portuaria, Demarcación de Costas, Universidade da Coruña, Fundación Emalcsa, Federación provincial de ANPAS e o Colexio Oficial de Licenciados en Educación Física de Galicia (COLEF).
O Consello Municipal do Deporte, que a alcaldesa propuxo ao chegar a María Pita, será “unha ferramenta útil para captar as necesidades e demandas específicas deste ámbito co fin de podermos reflexionar conxuntamente sobre as mellores propostas para atendermos as devanditas necesidades”, indicou a alcaldesa.
Inés Rey, alcaldesa da Coruña: “O Consello Municipal do Deporte será unha ferramenta útil para captar as necesidades e demandas específicas deste ámbito co fin de podermos reflexionar conxuntamente sobre as mellores propostas para atendermos as devanditas necesidades”
Investimentos en infraestruturas deportivas na Coruña
A rexedora lembrou o compromiso do Goberno local co deporte e destacou os investimentos en infraestruturas deportivas levados a cabo no pasado exercicio cunha execución de máis de 5 millóns de euros.
Destacou o complexo deportivo do Castrillón, a reforma da cuberta da piscina de Riazor, a reparación da piscina de Santo Amaro, a construción do campo de Eirís ou a reforma dos campos de fútbol da Cidade Deportiva A Torre Arsenio Iglesias. Tamén a reforma dos vestiarios no polideportivo de Labañou, a marquesiña dos campos de fútbol de Visma, a ampliación do rocódromo do Frontón de Riazor ou a climatización da sala de esgrima da Casa da Auga.
“Este consello que inicia a súa andaina é parte do noso compromiso co deporte. Compromiso que adquirín ao dedicar unha concellería en exclusiva ao deporte desta cidade”. Un compromiso que está a plasmar con feitos como a concesión de 65 bolsas a deportistas por un importe total duns 122.000 euros ou as subvencións ás entidades que fomentan a realización de actividades físicas e deportivas con 280.000 euros -un 233,33% máis que no exercicio anterior.
Mónica Martínez, concelleira de Deportes da Coruña: “se logramos excluír os individualismos e apostar por todo aquelo que nos é común, conseguiremos os resultados que nos propoñemos”
“Ao mesmo tempo, desbloqueouse o uso de instalacións deportivas municipais, que non se renovaba desde 2016 e puxéronse a disposición das entidades deportivas coruñesas 52 instalacións de dominio municipal, con máis de 600 franxas horarias semanais. En canto aos convenios deportivos, o Concello investiu un millón de euros pese á perda de ingresos xerada pola COVID-19”.
Inés Rey lembrou que “A Coruña xa era un referente en España polas súas instalacións deportivas, por ser pioneira na posta en marcha das escolas deportivas e pola súa aposta pola cultura do deporte” e hoxe, sinalou, “con este Consello Municipal do Deporte que teño a honra de presidir, damos un paso máis, o de implicar directamente o sector do deporte na toma de decisións sobre políticas deportivas”.
A vicepresidenta do hoxe constituído Consello Municipal do Deporte do Concello da Coruña, Mónica Martínez, amosou a súa convicción de que “se logramos excluír os individualismos e apostar por todo aquelo que nos é común, conseguiremos os resultados que nos propoñemos”.
A Concelleira de Deportes dixera previamente a este acto que, que xustamente se celebrou o 6 de abril, Día Internacional do Deporte, que este Consello Municipal do Deporte será “o que o deporte coruñés queira que sexa”.
‼️ Xa temos constituido o Consello Municipal do Deporte 👏👏 no Día Internacional do mesmo
A alcaldesa, @inesreygarcia lembra o compromiso do Goberno local co deporte pic.twitter.com/5e66LqKoCa— A Coruña Deportes (@coruna_deportes) April 6, 2021
