O salón de plenos do pazo municipal de María Pita na Coruña acolleu esta mañá de xoves 20 de maio o sorteo das Copas do Rei e da Raíña de hoquei a patíns. Ambas as dúas competicións deportivas terán lugar no Pazo dos Deportes de Riazor do 10 ao 13 de xuño deste ano. A alcaldesa da cidade lembrou que os logros do Liceo ano tras ano competindo ao máximo nivel no continente supoñen unha fazaña prodixiosa. “É un dos nosos emblemas máis importantes”.
A alcaldesa da Coruña, Inés Rey, participou esta no sorteo da Copa da Raíña e do Rei 2021 de hoquei a patíns, que tivo lugar no salón de plenos coa presenza da concelleira de Deportes, Mónica Martínez; do presidente da Real Federación Española de Patinaxe, Carmelo Paniagua; e do delegado provincial de Deportes da Xunta, Roberto García.
A alcaldesa, Inés Rey. deulles a benvida a todos os equipos e agradeceulle á Federación Española de Patinaxe a elección da Coruña para acoller un torneo moi arraigado na cidade.
Inés Rey lembrou que “os logros do Liceo ano tras ano competindo ao máximo nivel no continente supoñen unha fazaña prodixiosa. É un dos nosos emblemas máis importantes. O Liceo leva o nome da cidade alá por onde vai. Estamos moi orgullosos do que representa para a cidade. Saben que lle seguiremos apoiando sempre”.
A rexedora herculina destacou o feito de que sexa a primeira vez que se disputa na cidade a final da Copa da Raíña “unha cita que resulta especial para min. Sabedes que é unha prioridade para min e para o Goberno local que o deporte feminino desta cidade alcance a plena igualdade en todas as competicións e o mesmo recoñecemento”.
Tal e como salientou Rey en xuño, na cidade da Coruña “van competir as mellores xogadoras do país, por iso é un dobre orgullo ser sede desta competición e que as dúas o fagan en igualdade de condicións”. Unha competición, engadiu, que terá como escenario o Pazo de Deportes de Riazor que o ano pasado celebrou o seu 50 aniversario, “un espazo que forma parte da nosa historia”
Inés Rey, alcaldesa da Coruña ao respecto da celebración Copa da Raíña: “Aquí xogarán as mellores xogadoras do país”
A Coruña, dixo, reforza hoxe coa presentación desta competición o seu significado deportivo, “porque Coruña é sinónimo de deporte. É unha satisfacción acoller na nosa cidade a Copa do Rei e da Raíña de hoquei, máis aínda nun ano en que o hoquei nos está dando grandes alegrías”.
Inés Rey, alcaldesa da Coruña sobre a Copa da Raíña: “É unha cita que resulta especial para min. Sabedes que é unha prioridade para o Goberno local da Coruña o deporte feminino desta cidade alcance a plena igualdade en todas as competicións e o mesmo recoñecemento”.
Destacou a alcaldesa da cidade coruñesa que a Copa será o primeiro grande evento deportivo que terá lugar na cidade desde o fin do Estado de Alarma, o que “vén confirmar que, a pesar de que a pandemia non acabou, imos retomando a normalidade. E parte do éxito de que regrese ás nosas vidas esa normalidade é a volta do deporte profesional con público nas súas bancadas”.
Pola súa banda, a concelleira de Deportes, Mónica Martínez, destacou o que supón o Liceo para o deporte coruñés e para o hoquei español. “Hai que poñer en valor o feito de que sexa un equipo capaz de tratar de ti a ti ao Barça, como fixo unha vez máis esta tempada… unha tempada que, por certo, leva números de récord e que aínda que se escapou o título de Liga, queda esta Copa para rematala da mellor maneira posible”, dixo.
Pola súa banda, o presidente da federación Española de Patinaxe (FEP), Carmelo Paniagua, apuntou que “A Coruña é un sitio idílico para a celebración das copas de hoquei sobre patíns, as mellores competicións da tempada. Quero mandar o meu máis sincero agradecemento ao Deportivo Liceo, ao Concello da Coruña e á Xunta de Galicia pola súa iniciativa e colaboración para organizar ambas as competicións. Espérannos catro días dun gran evento e quero desexar sorte aos dezaseis equipos participantes”.
Carmelo Paniagua, presidente da Federación Española da Patinaxe, apuntou que “A Coruña é un sitio idílico para a celebración das copas de hoquei sobre patíns, as mellores competicións da tempada (…) Espérannos catro días dun gran evento e quero desexar sorte aos dezaseis equipos participantes”
Así quedaron os cruces da OKCopa
Canto aos choques deportivos, a OKCopa comezará a disputarse o xoves 10 de xuño con dous partidos en cada categoría.
Na masculina, o HC Deportivo Liceo enfrontarase ao Club Patí Voltregà Stern-Motor, mentres que o Recam Làser Club Hoquei Caldes o fará co CE Lleida Llista Blava.
No cadro feminino, o conxunto do Magic Studio Club Patí Manlleu buscará un posto en semifinais enfrontándose contra o Telecable HC de Gijón, no que milita a deportista coruñesa, formada no Hockey Club Liceo, María Sanjurgo, internacional coa Selección Absoluta feminina Española. Mentres que o Club Patí Voltregà Stern-Motor xogará co PHC Sant Cugat.
A competición seguirá o venres cun primeiro encontro no cadro masculino entre o Reus Deportiu Miró e o Garatge Plana Girona CH, e un segundo encontro entre o Barça e o CE Noia Freixenet. E no cadro feminino será a quenda do Generali HC Palau de Plegamans contra o CHP Bigues i Riells, e o Cerdanyola CH co CP Las Rozas.
