Segundo explicaba Rocío Candal, a responsable do Dépor ABANCA, o equipo coruñés empeza con ilusión a competición que arrancará esta fin de semana en Abegondo ante o Rayo Vallecano, pero das súas palabras despréndese tamén incertidume xa que aínda non consta oficialmente o formato de competición de cara a definir o segundo equipo que ascenderá. E subir de categoría e, xustamente, o obxectivo das coruñesas que adestra Irene Ferreras.
“A día de hoxe non temos confirmación oficial por parte da Federación Española. O que se nos traslada na circular meses atrás é que o campión de Primera Federación FutFem ascende directo e do segundo ao quinto ían disputar un play-off de ascenso con final a dobre partido onde ascenderían os dous campións desas dúas hipotéticas finais. Esta semana comunican a través do CSD que só vai haber dous ascensos”.
De todos os xeitos, segundo explica a responsable da sección “non recibimos aínda esa circular que rectifique como será o segundo ascenso. Entendo e isto é pura opinión que será a través do play-off, porque no calendario de competición da Federación Española xa figuran esas datas, pero non podo dicir moito máis do formato porque de maneira oficial aínda non nos consta”.
O Dépor ABANCA arrinca a competición en Abegondo ante o Rayo Vallecano co ascenso como meta
A Cidade Deportiva de Abegondo acolle o vindeiro domingo 11 de setembro ás 12:00 horas o cruce entre Dépor ABANCA e Rayo Vallecano. Será a primeira xornada da Liga 2022-23 na Primera Federación para ambos equipos. O primeiro paso das branquiazuis de cara ao ansiado ascenso e regreso á elite.
“É un comezo moi ilusionante. Recibimos en Abegondo ao Rayo Vallecano, equipo recentemente descendido da máxima categoría, que independentemente do cadro que teña, do corpo técnico que teña todas as temporadas é un equipo moi competitivo, moi de Vallecas no bo sentido”.
Para Rocío Candal o Rayo Vallecano é “outro dos proxectos fortes da categoría, quizais máis incógnita que outros rivais directos pero con toda a ilusión do mundo. Esperamos que Abegondo teña unha boa entrada porque é outro dos factores diferenciais doo Dépor ABANCA, que sempre na Cidade Deportiva hai moitísima xente, moi bo ambiente. Aproveito que estou aquí para resaltar a importancia dese factor. Dentro dun obxectivo tan ambicioso como o que temos (o ascenso) esta temporada, #ANOSAFORZA debe ser diferencial”.
