O cruce de Liga Iberdrola entre Dépor ABANCA e Real Betis adíase. O aprazamento vén de ser concedido polo Xuíz de Competición da Real Federación Española de Fútbol a solicitude do Real Club Deportivo debido a que quince das futbolistas da entidade branquiazul deberán estar illadas por ter sido contacto estreito dunha persoa positiva por COVID-19.
Andaluzas e galegas tiñan previsto xogar partido de Liga o vindeiro domingo 10 de xaneiro ás 12:00 horas en Abegondo.
Polo mesmo motivo que se adía este enfrontamento, o club galego ten solicitado tamén á RFEF o aprazamento do cruce co Rayo Vallecano que estaba fixado para o mércores 13 de xaneiro en Madrid. Nese caso trátase dun partido que xa fora adiado na sétima xornada. Agárdase a resolución do Xuíz de Competición da Real Federación Española de Fútbol a este respecto.
Mentres, as quince futbolistas afectadas, “permanecerán os próximos días en illamento, tal e como estipulan as autoridades sanitarias”, informa o RC Deportivo.
