Que bonito é ver nacer proxectos desde cero. Que bonito é que, ademais, estas iniciativas estean amadriñadas por auténticos referentes. É o caso do I Torneo Féminas Fútbol 8 de Vilagarcía. Unha iniciativa que, polo que lles consta aos seus responsables, o C.D. Bamio e o Concello de Vilagarcía baixo a dirección de Tino Buján, sería a primeira deste nivel en Galicia, e a segunda do noroeste español.
Un carácter pioneiro que contará coa mellor xogadora arousá, Mari Paz Vilas, como madriña de excepción na súa primeira edición. Unha das futbolistas top galegas da historia que virá co seu actual equipo da man, o Valencia C.F. Clae Viajes levará o peso patrocinador do evento. Esta axencia de viaxes será o primer patrocinador e organizador do evento.
Ademáis do conxunto che, o torneo contará coa presenza confirmada do Rayo Vallecano e do Levante. Tres conxuntos da elite do fútbol que estarán sobre o verde do Manuel Jiménez e do estadio de Fontecarmoa entre o 26 e o 28 de xuño. O primeiro conxunto en confirmar a súa presenza foi o Valencia, un anuncio que chegou só un día despois de que Mari Paz Vilas igualase ao mítico Mario Kempes e superase ao guaje Villa como futbolista con máis goles en partidos oficiais na historia do club do Turia, marcando o seu tanto número 130 coa camisola valencianista.
Valencia, Rayo e Levante son os equipos de primeiro nivel desvelados ata a fecha pola organización, pero aseguran que pode haber máis sorpresas. Quen tamén estará no torneo será o Umia e o Atlético Arousana.
Ademais, a intención dos responsables do evento é reunir un combinado de xogadoras de equipos mixtos da comarca, toda vez que o seu organizador, o Bamio, carece dun conxunto alevín propio.
O CD Bamio e Mari Paz como inspiración
O Bamio é probablemente o club máis peculiar de todo o Concello de Vilagarcía. Fundado en 1994 na pequena localidade de Bamio, este modesto club, cunha estrutura practicamente familiar, pasa por ser a única entidade da comarca que non ten, na súa base, unha filosofía deportiva de carácter competitivo. O seu obxectivo é claro, única e exclusivamente formar e gozar do fútbol.
Formar deportistas pero tamén formar persoas e educalas na igualdade. Con esta intención xorde no seo do club o equipo senior feminino fai un par de tempadas. Ademais, o club abre as portas en todos os seus equipos de base a todas as nenas que queiran xogar ao fútbol coa intención de, aos poucos, xerar tamén unha estrutura de canteira de mulleres.
Todo isto non sucede por casualidade. A influencia de Mari Paz Vilas tivo moito que ver nesta evolución do CD Bamio cara ao fútbol feminino nestes últimos anos. Nada en Bamio e con estreitos lazos de amizade desde a súa infancia coa xente que dirixía o club, Mapi milita desde o 2013 no Valencia CF tras pasar por Levante CF, FC Barcelona e RCD Español e ser internacional ata en 11 ocasións.
Pasa por ser na actualidade unha das xogadoras de referencia da máxima categoría do fútbol feminino a nivel nacional. Mari Paz é a madriña do club e segue fortemente vinculada á localidade que a viu nacer e dar as súas primeiras patadas a un balón cando o fútbol feminino non gozaba, por desgracia, da mesma visibilidade.
Como xurdiu esta idea?
A idea vén de hai uns anos atrás, pero é no 2019 cando a organización decidiu a creación dun torneo completamente feminino. Unha gran maneira de empoderar e visibilizar o fútbol feminino que contará co apoio de institucións como a Real Federación Galega de Fútbol, a Deputación de Pontevedra e as Concellerías de Deportes e de Igualdade do Concello de Vilagarcía.
Por que feminino?
Iniciativas coma esta, que axudan a que o camiño cara á igualdade sexa máis doado, a intención é necesaria. É precisamente o que fai a organizacion deste torneo, loitar por unha igualdade de competicións e eventos que hoxe en día non existen a un nivel igualitario. Desde a dirección non entenden esta iniciativa como unha discriminación cara aos homes, senón como unha oportunidade de medrar. Sobre todo vendo os últimos pasos nas respectivas Federacións, onde están a crearse as ligas femininas. Cada vez máis concretas en idades co fin de chegar a conseguir unha total igualdade de categorías, competicións e, neste caso, torneos respecto aos que optan os homes.
É unha necesidade dar visibilidade a torneos femininos para así poder, aos poucos, igualar aos diferentes equipos e categorías dentro dos clubs de fútbol deste país.
I Torneo Internacional
O torneo nace coa idea de colocarse á cabeza deste tipo de competicións dentro da Península Ibérica. Tras cumprirse esta tempada o 25 aniversario da entidade, o CD Bamio afronta o proxecto máis ambicioso na súa xa dilatada existencia. O proxecto conta con todos os factores necesarios para que todo saia ben. Unhas instalacións adecuadas, un persoal colaborador necesario con experiencia acumulada doutros torneos de éxito e unhas ganas infinitas de crear un evento deportivo distinto que deixe pegada en todos aqueles que participen no mesmo.
Trátase de que as nenas teñan a oportunidade de vivir o fútbol en toda a súa dimensión. Compartir vestiario, compartir campos e disputar partidos con outras nenas da súa mesma idade. O FF8 Vilagarcía irrompe no mundo dos torneos de fútbol coa intención de deixar pegada e ser exemplo.
Un campionato no que se meterán goles contra o cancro
O I Torneo de fútbol 8 de Vilagarcía aspira a ser un referente a nivel internacional pero tamén contará cunha parte solidaria. Os seus promotores farán unha campaña de captación de fondos para a Asociación Pablo Ugarte, que traballa no apoio de estudos contra o cancro infantil, a través da venda de pulseiras solidarias a modo de entrada durante o campionato. Esta Asociación é a que máis cartos aporta en España e a que máis proxectos financia para a investigación do cancro infantil.
A organización do Torneo habilitará a posible compra de pulseiras por 1 euro a modo de entrada para os adultos que asistan ao torneo. Os cartos recaudados serán destinados á Asociación. Non queda ahí a parte solidaria xa que a cita deportiva tamén contará coa iniciativa “EUROS X GOLES EUROS XTODAS”, e basicamente trátase diso, que empresas patrocinadoras ou colaboradoras destinen unha cantidade de euros por cada un dos goles que se encaixen na fase final do torneo. Cada empresa pode patrocinar un partido, unha fase ou ben todos os goles do torneo.
“Queremos seguir celebrando este torneo co paso dos anos, e destinar cada un dos campionatos a unha acción social” explicou o organizador do evento, Tino Buján, que destacou a importancia de que estes torneos tamén conten cunha perspectiva social.
Tino Buján, director do torneo: “Queremos seguir celebrando este torneo co paso dos anos, e destinar cada un dos campionatos a unha acción social”.
Mariano Ugarte, o presidente da Asociación, amosouse contento con esta colaboración e explicou que desde a entidade xa se colaborara con outras accións deportivas coa última finalidade de recaudar fondos para a investigación contra o cancro infantil. “O deporte é o que máis move á xente”, destacou Ugarte, mentres explicaba que este evento se suma a outros torneos de fútbol, carreiras e outro tipo de accións deportivas que permitiron aos seus participantes gozar dunhas xornadas divertidas e colaborar coa investigación da enfermidade.
Mariano Ugarte, presidente Asociación Pablo Ugarte: “O deporte é o que máis move á xente”.
Datas e participación
O torneo está dedicado a nenas de categoría alevín, nadas en 2008 e 2009 ainda que como excepción permitirase en cada equipo a participación dun máximo de 4 xogadoras de categoría infantil de primeiro ano, nadas en 2007.
O pistoletazo de saída terá lugar o venres 26 de xuño e acabará o domingo 28. Unha fin de semana chea de fútbol, onde se poderá ver e gozar do talento das xogadoras que alí se dean cita. A competición en fase de grupos empezará sobre as 18:00 h. da tarde ata as 22:00 h. aprox do venres 26.
Sábado 27: Esta segunda xornada de fase de grupos desenvolverase desde as 9:30 h. e ata as 22:00 h. aprox. A media mañá aprox. celebrarase o desfile‐presentación de todos os equipos e xogadores no terreo de xogo.
Domingo 28: De novo, a competición empezará ás 9:00 h. da mañá. Desenvolverase a partir desa hora tanto a Fase polo título como a fase de Consolación. A final xogarase ao redor das 18:00 h
Como será a competición?
Todas as participantes quedarán encadradas en grupos de 6 equipos, polo tanto todas xogarán un mínimo de cinco partidos en fase de grupos. Unha vez terminada a Fase de Grupos a competición partirase en dous:
–Fase polo Título: Empezará a partir de 1/8 de final. Xogarase xa co sistema de eliminatoria directa. O equipo que perda quedará apeado da competición e o gañador irá avanzando ata chegar á final.
-Fase de Consolación: Empeza a partir de 1/4 de final e tamén se xogará polo método de enfrontamento directo entre os equipos clasificados.
Todos os equipos serán aloxados pola organización a través da súa axencia oficial Clae Viajes. A forma de participar no torneo é única e exclusivamente por medio de invitación directa da organización. Cada equipo poderá inscribir un máximo de 15 xogadoras e as entradas á competición terán o precio de 10€ por día e un bono para os 2/3 días de 15€. As nenas e nenos menores de 12 anos poderán entrar e gozar do fútbol de balde.
Todo luxo de detalles
Nada se deixará ao azar e o torneo contará cun total de 100 balóns personalizados. 30 deles serán para o torneo e os que se usen durante o mesmo serán regalados ao CD Bamio. Os 70 restantes poñeranse á venda (nun prezo aproximado de entre 3 e 5 euros) e todo o recadado na venda deses balóns será para a Asociación Pablo Ugarte. Asociación coa que a organización colaborará na venda de pulseiras.
Todo luxo de detalles para que o torneo brille con luz propia e as protagonistas poidan gozar de un finde de ensoño.
Premio á mellor afección
O torneo busca ser a festa máis importante do fútbol base feminino de toda a península. Diversión e deportividade, ese debe ser o lema de todas as afeccións. A inchada destacada neste sentido terá o seu recoñecemento na cerimonia de entrega de medallas.
Un detalle para que o fútbol sirva dun dos grandes propósitos que ten, unir lazos baixo un deporte e gozar de grandes momentos. Fútbol e afección deben camiñar da man para que as protagonistas sexan elas, porque o futuro está nas súas botas.
