Logo do anuncio do conselleiro de Sanidade, Julio García Comesaña, de que se suspendía a actividade deportiva federaca en Galicia, o secretario xeral para o Deporte, José Ramón Lete Lasa, mantivo unha reunión telemática con todas as federacións. No transcurso da mesma explicou as medidas que o seu departamento vai adoptar. Na mesma participou o presidente da Federación Galega de Atletismo, Isidoro Hornillos, que lle trasladou dúbidas sobre como interpretar as normas de mobilidade entre concellos para os atletas de nivel nacional que deban desprazarse ata outros concellos.
No que atinxe ao atletismo, todas as competicións programadas para esta fin de semana en Pontevedra e Ourense son canceladas, segundo informa a Federación Galega de Atletismo.
Outro tema importante tratado nesa reunión co secretario xeral para o de porte, foi o dos adestramentos. Segundo traslada a Federación Galega de Atletismo, estes poderán seguir desenvolvéndose pero cun máximo de catro deportistas e o seu adestrador, respectando tanto a hora de queda como os peches perimetrais.
É precisamente o aspecto dos peches de concellos o que suscita dúbidas. Por iso, o presidente da FGA, Isidoro Hornillos, mostrou as súas dúbidas ante o mandatario autonómico en materia deportiva, sobre “a interpretación da mobilidade por parte dos atletas de nivel nacional que deban desprazarse ata outros concellos”.
Segundo explica a FGA, Jose Ramón Lete Lasa informaba de que a Secretaria Xeral para o Deporte estaría a traballar “na elaboración dunha guía con todas aquelas casuísticas que poidan servir para despexar todas estas dúbidas”.
