Dous cruces da Liga Senior Feminina de hoquei sobre patíns van ter lugar esta fin de semana. Nun deles enfróntanse as primeiras clasificadas contra das últimas, HC Borbolla – APG Bierzo. Será no pavillón Ángel Pestaña de Ponferrada ás 18:15 horas do sábado. Unha hora antes empezará en Compostela un partido que, sobre o papel, podería ser máis axustado e no que medirán forzas 3º contra 4º, CH Raxoi – Club Compañía de María en Vite.
O Bierzo recibe ao líder, HC Borbolla, que viaxa con catro baixas
Esta fin de semana na Liga Senior Feminina de Hoquei a patíns o calendario fará medir forza ás primeiras clasificadas contra as últimas. Sobre o papel podería parecer que o HC Borbolla, líder invicto, podería ter ante si un partido asequible. Pero nada é doado no deporte. Ademais as ponferradinas teñen un partido menos disputado, polo que a táboa tampouco reflicte uns parámetros que permitan tirar conclusións fiables.
Unha complicación para o equipo que adestra Santiago Martínez Cancelo ven dada polas baixas. As galegas suman ás dúas ausencias da pasada xornada as de Edén e Ainhoa. Así que en total serán baixa para o partido catro xogadoras.
No caso das leonesas, sucede o contrario: recuperan efectivos. Hoxe estaba previsto que voltase aos adestramentos Laura Pumar. O técnico da APG Bierzo é optimista pero ao mesmo tempo, precavido. “Hoxe vai ser o seu primeiro adestramento. Mañá (polo sábado), valoraremos que tal está”, apunta Álvaro Sariol. Non en tanto, segue a ser baixa, Carla.
Martínez, HC Borbolla: “O Bierzo ten evolucionado moito é difícil de bater”
Nunha lectura positiva do partido, Santiago Martínez, explicaba que ter “tantas baixas, vainos servir para comprobar se somos capaces de manter o nivel de xogo alcanzado ata agora pese as baixas que temos”.
O adestrador do HC Borbolla comentaba que as coruñesas afrontan este partido de hoquei “como todos. É un paso máis na evolución do equipo e unha etapa máis no difícil camiño cara ao obxectivo final que nos temos marcado”, apuntaba en referencia á disputa da fase de ascenso á OK Liga.
Santiago Martínez, HC Borbolla: “Este partido é un paso máis na evolución de cara ao obxectivo final que nos temos marcado”
Martínez Cancelo fala da APG Bierzo como un rival a ter en conta pola progresión do bloque. “Esta semana tócanos a APG Bierzo, rival complicado como todos, e na súa pista aínda máis. É un equipo que ten evolucionado moito nos últimos anos, é difícil de bater, que se deixa todo na pista e que pode complicar o partido a calquera rival”, advirte o técnico do HC Borbolla.
Santiago Martínez, HC Borbolla: “O Bierzo é un equipo que se deixa todo na pista e que pode complicar o partido a calquera”
Álvaro Sariol, APG Bierzo: “Imos tentar poñerllo difícil a calquera equipo”
Desde o banco da APG Bierzo, Álvaro Sariol lamenta as ausencia de Carla, “mérmanos”, di. Pero admite que sobre a pista do Ángel Pestaña de Ponferrada, as locais disporán dun “equipo completo polo que a nivel físico debéramos ir ben.
Sobre o rival, explica que precisamente contra o HC Borbolla esta tempada, por destraza, “nunca puidemos contar co equipo ao completo en ningún dos cruces. Mañá sábado, tampouco será así. Pese a todo, esperamos ser un equipo competitivo e darlles moita guerra”.
Álvaro Sariol, APG Bierzo: “Esperamos dar moita guerra”
O adestrador da APG Bierzo, Álvaro Sariol, explicaba que mentres as xogadoras do Borbolla “están pelexando por xogar a fase de ascenso, nós imos tentar poñérllo difícil a calquera equipo”.
A igualdade marcará o CH Raxoi vs Compañía de María
O pavillón de Vite acolle o cruce entre CH Raxoi e o Club Compañía de María mañá sábado a partir das 17:15 horas dentro desta xornada na Liga Senior Feminina de Hoquei a Patíns. So dous puntos separan a terceiras (as compostelás) e cuartas (as coruñesas) na táboa.
No Compañía de María non haberá ausencias respecto a partidos anteriores. Seguen sen poder contar con Meritxell, sancionada. O que si preocupa de cara ao partido ao adestrador, Álvaro Franqueira, é que levan un par de semanas “con bastantes baixas nos adestramentos por mor de que moitas xogadoras estaban con exames e outras, enfermas. Así que non temos podido entrentar moito xuntas”.
Álvaro Franqueira, Compañía de María: “Tivemos xogadoras de exámenes e enfermas. Non puidemos adestrar xuntas”
Pola parte do CH Raxoi xa adestraron de novo co resto do equipo as tres xogadoras de hoquei coas que as compostelás non puideron contar o pasado fin de semana contra o Bierzo, “en concreto Laura Vigoya, Antía Rivadas e Noa Fuentes”, explicaba o técnico Pedro Siaba.
Sobre o rival, o Compañía de María, Siaba comentaba que se trata dun “equipo moi complicado, en primeiro lugar porque teñen moitas xogadoras de bo nivel e non se adoitan notar os cambios, teñen un nivel táctico alto e unha moi boa portaría”. Na opinión do adestrador do Raxoi “vai ser un partido moi complicado, como adoita selo contra este rival, pero non imposible”.
Pedro Siaba, HC Raxoi: “Será complicado, pero non imposible”
O adestrador das compostelás, valora o feito de que xoguen “na casa. Sabemos que temos posibilidades de gañar se facemos un gran partido, como xa aconteceu na ida da Copa”, explica ao respecto dun cruce que di que afrontarán “coma sempre, con ilusión e confianza, intentando dar o mellor nivel posible e seguir progresando”.
Pedro Siaba, HC Raxoi: “Afrontaremos o partido coma sempre, con ilusión e confianza, intentando dar o mellor nivel posible e seguir progresando”
No outro bando, o técnico do Compañía de María opina que o HC Raxoi é un bloque que “coñecemos ben. Xa temos xogado moitas veces contra elas e sempre son partidos entretidos e intensos. Tentaremos competir o máximo posible e levarnos os tres puntos”.
Álvaro Franqueira, Compañía de María: “Os partidos contra o Raxoi son entretidos e intensos. Tentaremos competir o máximo posible e levarnos os tres puntos”
