Helena Mariño, figura clave no baloncesto de Vilagarcía, faleceu a finais do 2020. Ex xogadora da AD Cortegada e adestradora e directiva do Giraldo Vilagarcía, Mariño viviu vinculada ao baloncesto e agora este devólvelle parte do sementado.
O CB Vilagarcía ven de anunciar o renomeamento do clásico torneo arousán, que agora recibirá o nome VBCUP Helena Mariño, honrando á baloncestista.
Tal e como recordan desde o club, Mariño foi vital na creación e desenvolvemento desta festa do baloncesto galego, formando parte dela desde a súa primeira edición. “Ela foi, é e será sempre unha peza clave dentro do noso equipo que, máis que equipo, é familia”, declaraba a entidade nun comunicado.
Como homenaxe á xogadora, o CB Vilagarcía quixo facer pública esta decisión no que sería o do seu aniversario. Lamentablemente, a primeira edición do torneo baixo este novo nome deberá agardar xa que a actual situación sanitaria por mor da COVID-19 non permite a súa celebración.
Malia terse adaptado a distintos formatos, e chegar a distintos puntos de Europa, neste 2021 deberase esperar para retomar a competición. O torneo ligado á Semana Santa non poderá volver este ano, pero no club de Mariño manteñen a ilusión e ganas do primeiro día. E a partir de agora o farán sempre ligados á figura desta muller do baloncesto galego, a “alma da Basket Cup” de Vilagarcía como apuntan desde o club.
