O Concello de Burela recibiu esta semana ao Pescados Rubén Burela FS no consistorio da localidade mariñá para homenaxear o histórico 9 de xaneiro, data gravada xa na Historia Laranxa pola consecución do dobrete de títulos, coa Supercopa de España Feminina e a XXIX Copa de Galicia Masculina.
O alcalde do Concello de Burela, Alfredo Llano, e o concelleiro de Deportes, Ramiro Fernández, fixeron entrega en nome do concello dun obsequio conmemorativo aos capitáns, Peque e Edu, en compañía do presidente laranxa, Manuel Blanco.
No acto de recoñecemento do Concello á entidade laranxa, que tivo que aprazarse en xaneiro debido ás restricións autonómicas polo COVID-19, o alcalde Alfredo Llano tamén desexou moita sorte aos burelistas nesta Fin de semana Laranxa, con regreso de público a Vista Alegre.
Hoxe, sábado 13 de marzo, o equipo feminino recibirá Torreblanca Melilla ás 18.30 horas) na 18ª xornada da Primeira División do fútbol sala estatal.
Esta cita deportiva poderá seguirse en directo vía streaming a través da canle do equipo galego: BurelaFS.tv. As novas norma para os acontecementos deportivos en Galicia, e a situación epidemiolóxica de Burela, permiten tamén, nesta ocasión, que as persoas socias do Pescados Rubén Burela poidan acudir esta xornada a Vista Alegre que terá restrición de aforo, pero poderá gozar do alento do público desde a bancada.
