O nome de Irene está escrito na historia do fútbol galego e español como unha das mulleres pioneiras na práctica do fútbol. Esta porteira coruñesa compartíu época co mítico Zamora, ao que admiraba, e terreo de xogo con futbolistas da talla do recordado deportivista Chacho.
O seu nome é Irene González Basanta e naceu no Campo da Leña aló polo 1909. De cando debutou sobre un terreo de xogo, non se ten constancia, pero dela falan xa as crónicas xa no ano 1924. Así se recolle na obra que hoxe, martes 15 de decembro, se presentaba no Pazo dos Deportes de Riazor e que fala da súa vida e da súa época.
“Irene y las puertas del fútbol. Historia de una pionera”, é o título desta obra que asinan os xornalistas herculinos Rubén Ventureira e Juan Luis Rodríguez Cudeiro. Nas máis de 170 páxinas deste libro recupérase a historia dunha pioneira no balompé nacional que fai un século irrompeu neste deporte para competir con homes.
No acto de presentación, ademais dos autores da obra, participaron a alcaldesa da cidade, Inés Rey, a concelleira de Deportes, Mónica Martínez, o presidente da Federación Galega de Fútbol, Rafael Louzán, e a sobriña de Irene González, Matilde Regaldíe.
A alcaldesa da Coruña, Inés Rey, encargada de escribir o prólogo desta historia, afirmou durante a presentación que o ensaio une “deporte, literatura e igualdade, o que os modernos chaman transversalidade” e dixo que non deixa de ser “a historia de moitas outras pioneiras” que racharon “barreiras” e eliminaron “prexuízos”.
“Irene abriu as portas para moitas mulleres”, indicou a alcaldesa Inés Rey, para quen este libro “fai reflexionar sobre o papel da muller no deporte e a sociedade”, onde “aos poucos” vaise “conseguindo esa igualdade”. De feito, a rexedora leu un anaco da obra para incitar a esa reflexión.
En la presentación de “Irene y las puertas del fútbol” leí una crónica que da cuenta del tratamiento que tenían las deportistas no hace tanto. Que las futbolistas de ahora sepan lo que pasó y nadie las llame “marimachos” ni “Zamoritas del sexo débil”. Si algo somos es fuertes. pic.twitter.com/gPvhi3Aryr
— Inés Rey García (@inesreygarcia) December 15, 2020
Entre o público, moitos rostros coñecidos do deporte e do xornalismo deportivo, e tamén outras persoas históricas do balompé coruñés como Mañana, outroura adestrador do Karbo, e unha das súas estrelas, Lis Franco.
Foi momento tamén para cancerbeiras do pasado e do presente. Traxectorias e historias que se mezclaban no Pazo dos Deportes de Riazor coa asistencia da deportivista Esther Sullastres, que comparte posto no terreo de xogo coa protagonista do libro e xoga na Coruña un século despois.
O libro fórxase ao fío da exposición do Gaias sobre o fútbol galego
Rubén Ventureira explicou que o libro recibiu o “impulso” de Louzán e a Federación e Rodríguez Cudeiro engadiu que o proxecto xurdiu por mor da exposición no Museo Gaiás, en Santiago de Compostela, sobre o fútbol galego, onde viu unha fotografía da gardameta, tras a que os autores descubriron unha “historia apaixonante”.
Irene compartiu portería con Rodrigo García Vizoso, quen logo militou no RC Deportivo e o Real Madrid, e chegou a ser a fundadora, porteira e capitá do seu propio club, que levaba o seu nome. Ademais, foi “imaxe icónica da época”, xa que unha fotografía súa estivo exposta en plena rúa Real da Coruña antes de morrer de tuberculose en 1928, con 19 anos.
Para aquelas persoas que desexen saber máis da historia desta cancerbeira galega que fixo historia, hai unha web na que poder coñecer máis a obra e incluso mercala. O libro, recordemos titúlase: “Irene y las puertas del fútbol”,está escrito por Rubén Ventureirae Juan Luis Rodríguez Cudeiro, pertence á Colección Noroeste da editorial Vía Láctea. A súa edición está promovida pola Asociación da Prensa da Coruña, Fundación Wenceslao Fernández Florez, e colaboran o Concello da Coruña e a Real Federación Galega de Fútbol.
