O tramo final da Liga Feminina Endesa e a Copa da Raíña achéganse e o Durán Maquinaria Ensino prepárase para afrontalo. Para lograr os obxectivos, o plantel dirixido por Carlos Cantero ten unha nova incorporación, a alero Helena Oma.
“Quero agradecer ao club esta oportunidade. Estou moi agradecida por isto e, sobre todo, moi ilusionada”, declaraba a catalana na súa presentación como xogadora do Ensino.
Entre as filas do club lucense tamén semella haber moita ilusión con esta nova cara. “Cando fichas a unha xogadora, preguntas nos clubs nos que estivo e compañeiras coas que xogou e creo que é a primeira vez na miña carreira que non atopo a ninguén que fale mal dela. Xa cando se anunciou no equipo foi todo caras alegres”, recorda o seu novo adestrador, Carlos Cantero.
Carlos Cantero: “A súa excompañeira Bea falou moi ben dela e confío moito no que di sempre”
Ademais, o técnico móstrase contento coa nova incorporación confiando nas palabras da súa xogadora Bea Sánchez: “A súa excompañeira Bea falou moi ben dela e confío moito no que di sempre”, declarou.
Helena Oma, nos plans do Ensino
Esta nova fichaxe xa levaba meses nas mesas de negociacións. Tal e como explicou o presidente do club lucense, Manuel Durán, “hai tempo que queriamos que estivera con nós, pero as negociacións son longas e é un proceso complicado”.
A súa incorporación forma parte da intención do Ensino de “españolizar” o seu plantel, contando con máis xogadoras estatais. “A principio de tempada conseguimos un grupo nacional bastante forte, que é o núcleo duro do club, xunto con estranxeiras que están completamente integradas na Liga”, apuntou o presidente.
Manuel Durán (presidente): “A principio de tempada conseguimos un grupo nacional bastante forte, que é o núcleo duro do club, xunto con estranxeiras que están completamente integradas na Liga”
Así entrou Oma nos plans do club lucense. A alero chega procedente do SPAR Girona, conxunto do que formou parte nos últimos cinco anos, e no que non estaba a disputar moitos minutos.
A catalá espera reencontrarse a si mesma nas filas do Ensino. “Sei que non veño aquí a xogar tantos minutos, isto o terei que gañar cada día no adestramento. Pero veño coa ilusión de sentirme con máis confianza. En Girona levaba moito tempo e creo que os cambios mentalmente veñen ben e isto axudarame a atoparme a min mesma e a confianza que perdera”, sinalou a xogadora.
Helena Oma: “Creo que os cambios mentalmente veñen ben e isto axudarame a atoparme a min mesma e a confianza que perdera”
Helena Oma chega a unha cidade e un equipo novo para ela, pero se mostra ilusionada e considera que “todo pasa por algo”. “Creo que durante estes anos (no SPAR Girona), perdín cousas que ao mellor noutro equipo podería ter feito e aportar. Creo que este é un momento no que teño que pensar en mi, desfrutar, que é unha cousa que deixei de facer e sobre todo, sentirme xogadora”, recalca.
Ademais, o equipo galego era un atrativo para a catalá. “Sempre dixen que o Ensino é un club moi atrativo, polas instalacións e toda historia do club. Están facendo as cousas moi ben e o ano pasado gañaron ao Girona, o que é un plus. O plantel con xogadoras nacionais gústame moito porque di moito dun club e da cidade, e por iso estou moi agradecida e contenta de estar aquí”, asegura.
Xogadora polivalente
Malia ser alero, Helena Oma é unha baloncestista que chega ao Ensino para sumar en distintas facetas. “É unha xogadora completa. Desde a defensa, na que vai aportar o punto físico defensivo, no rebote, no ataque ten bo tiro exterior… Todo iso son cousas máis que suman e van aportar”, declara o técnico, Carlos Cantero.
O adestrador móstrase optimista co futuro do equipo grazas á boa dinámica que leva estas últimas semanas e a incorporación dunha nova xogadora. “Non teño dúbidas de que vai sumar. Nestas últimas oito xornadas creo que se mantemos a dinámica máis o que sume ela podremos afrontar ben os play offs e a Copa da Raíña“, asegura.
“Somos un equipo que pode poñer en problemas a todo o mundo, e creo que estas xornadas que quedan e na Copa da Raíña imos dar guerra”, afirma sen dubidar a nova alero do Ensino.
Helena Oma: “Somos un equipo que pode poñer en problemas a todo o mundo”
Oma agradécelle ás súas novas compañeiras a clasificación para disputar a Copa, unha competición na que está desexando participar. “é un gran reto e é unha competición moi atrativa de xogar. Estou moi contenta, con ganas de xogar xa e creo que faremos un bo papel”, declara.
