Primeiro foi xogadora e agora é adestradora. Helen Roca atesora un palmarés no que están un Campionato de Europa, un de Liga en España, disputou o Seis Nacións e chegou a xogar Mundiais. Agora forma parte do corpo técnico do CRAT Residencia Rialta. Explica que cando “un staff ou directiva é igualitaria parece que é unha excepción, e non debera selo”.
A.N.: O papel da muller no deporte e xa igualitario ou aínda queda?
Helen Roca: Aínda que se están favorecendo políticas ao respecto ultimamente, estamos a anos de acadar ese tratamento de igualdade no deporte. En cambio ca entrega persoal e profesionalidade no deporte (dentro do amateurismo) de cada muller ou rapaza, si que vemos que sexa igualitario, ou incluso superior, de cara aos esforzos que facemos, con respecto aos homes que teñen máis facilidades e non teñen a mesma entrega que nós.
A.N.: Ao respecto da anterior pregunta, responde Galicia ao patrón estatal ou observas diferencias? En caso de ver diferencias, a situación galega sería mellor ou peor que a estatal?
Helen Roca: Hai diferenzas. Vai máis amodo se cabe, sempre chegan máis tarde as políticas estatais que axuden a regular ou facilitar un deporte igualitario.
A.N.: En que momento da túa vida tropezaches por vez primeira cunha discriminación por xénero no deporte? Que pasou?
Helen Roca: Dende a miña época na selección española de rugby, vimos que as achegas / dietas / premios para a Selección masculina sempre era superior que a nosa: e iso que nos gañabamos os títulos europeos e eles non!
Tamén no meu equipo en A Coruña desapareceu a categoría feminina porque dicían que non merecíamos a pena. Solución: formamos nós un equipo propio na Universidade da Coruña para poder seguir xogando e evolucionando. Agora, de volta co CRAT, fumos campioas da División de Honra – Liga Iberdrola por segunda vez…
Tamén os estereotipos con respecto ao deporte do rugby, ao ser mulleres parecía que non estaba ben visto, que fixemos? seguir xogando e loitando pola igualdade que queríamos. Agora somos o único equipo galego de rugby que gañou División de Honra e aporta continuamente xogadoras a selección española representando a A Coruña e Galicia e a nós mesmas!
A.N.: Observas que por ser muller existen maiores dificultades para a práctica deportiva a niveis de competición?
Helen Roca: Hai dificulades nos horarios de adestramentos, nas cesións de boas instalacións, e na busca de patrocinios. A nivel deportivo sobre todo cando te adicas a nivel profesional e non se remunera o teu esforzo; segues sendo amateur pero con vida deportiva profesional que sacrificas da túa vida persoal (con sacrificio de tempo e economía persoal).
A.N.: Na túa opinión, hai límites ou teitos de cristal para o acceso da muller a diferentes postos no mundo do deporte á marxe do papel de deportistas (adestradoras, directivas, preparadoras físicas, etc)?
Helen Roca: Haino si. Por exemplo, está demostrado que para ostentar algún cargo técnico tes que facerte valer o dobre que eles, e na maioría dos casos cas mesmas titulacións ou experiencias elixen primeiro a un home solo por esta característica.
Cada vez que un staff ou directiva é igualitaria parece que é unha excepción, e non debería selo.
A.N.: Con respecto a cando empezaches a túa vinculación co deporte, hai agora menos trabas?
Helen Roca: Si que vexo que agora as mulleres temos máis presenza no deporte, pero foi a base de sacrificios nosos, non axudas pola igualdade. Rompemos ca nosa forza ese teito que nos quería dentro e caladas, e agora xa non temos límite. Imos a por todas, a seguir abrindo camiños e autoestradas sen peaxes para esa evolución!
Helen Roca, adestradora de rugby: “Segues sendo amateur pero con vida deportiva profesional que sacrificas da túa vida persoal”
Helen Roca: “Coas mesmas titulacións ou experiencia elixen a un home”
A.N.: Cales consideras que son os principais atrancos que ten hoxe unha muller para desenvolver unha carreira deportiva?
Helen Roca: Témome que aínda hai preferencias para elixir antes nun posto deportivo a homes ante a mesma titulación.
Como dicía no exemplo, está demostrado que para ostentar algún cargo técnico tes que facerte valer o dobre que eles, e na maioría dos casos cas mesmas titulacións ou experiencias elixen primeiro a un home só por esta característica.
Helen Roca, adestradora de rugby: “Para ostentar algún cargo técnico tes que facerte valer o dobre que eles”
A.N.: Pódese vivir do deporte sendo muller?
Helen Roca: Si, partindo desas premisas que falabamos: Loitar máis para acadar o mesmo, ou incluso con menos opcións.
A.N.: Que mudarías do deporte actual para camiñar cara a unha igualdade plena?
Helen Roca:
- Oportunidades en todos os postos deportivos sen mirar o sexo do currículum.
- Educación en igualdade dende todos os ámbitos públicos, deportivos ou non.
- Eliminación de estereotipos machistas por deportes practicados.
- Igualdade nos medios, insistindo na TV, que é a que da maior visibilidade e posibilidades de patrocinios.
Helen Roca, adestradora de rugby: “Propoño unha educación en igualdade dende todos os ámbitos públicos, deportivos ou non e a eliminación de estereotipos machistas por deportes practicados”.
A.N.: Hai quen avoga polo deporte mixto máis aló da base como unha posibilidade? Es partidaria?
Helen Roca: No meu deporte non, pero hai deportes no que sería moi boa idea.
Helen Roca, adestradora de rugby: “Habería que dar oportunidades en todos os postos deportivos sen mirar o sexo do currículum”
A.N.: Cres que o deporte feminino está a vivir un momento doce?
Helen Roca: Non creo que se poidan tirar aínda foguetes. Si que se ve unha evolución, pero queda moito por loitar.
A.N.: Ao fío desta última pregunta valora de 0-10 (sendo 10 o mellor) o momento actual do deporte feminino nestes ámbitos:
Helen Roca:
- Resultados deportivos _____________________ 10
- Visibilidade en xeral na sociedade _________ 6
- Repercusión mediática _____________________ 4
- Apoio de seareiros/as ______________________ 5
- Patrocinios _________________________________ 4
- Apoio das diferentes administracións ______ 6
