O éxito é das valentes. E no HC Deportivo Liceo non lle temen a ningún rival. Sentidiño, cabeza, traballo e fouteza. As verdibrancas levan un triunfo, un empate e unha derrota logo de tres xornadas no seu retorno á Ok Liga. O arranque de competición tiña para as galegas un calendario complicado que aínda non rematou. O seguinte coco ao que terá que plantarlle cara é o Cerdanyola CH Feníe Energía ao que se miden mañá, sábado 27 de novembro, a partir das 20:30 horas. Arbitrará o partido o colexiado Franciso Moreno Tudela.
O conxunto liceísta visita así a un dos equipos máis fortes da máxima categoría do hoquei a patíns español. Nesta cuarta xornada ligueira o HC Deportivo Liceo quere refrendar o seu bo arranque de competición. Facelo ante un dos grandes, e na súa cancha sería unha confirmación do estado de forma das galegas.
O rival das coruñesas ocupa a sexta praza na clasificación, é dicir, está xusto por encima das representantes galegas na OK Liga. So perdeu co Generali HC Palau de Plegamans (1-3) pero a derrota foi dolorosa xa que o seu público aínda non as viron gañar. Colleitou vitorias ante o Lidergrup CH Mataró na primeira xornadae co CP Las Rozas na terceira, ambas as dúas por un marcador de 0-4.
O HC Deportivo Liceo, tras tres xornadas, xa catou o triunfo (Bigues i Riells, 5-1), a derrota (Martinelia Manlleu, 3-1) e o empate (Telecable HC, 5-5). Suma así catro puntos de nove posibles. Pero na súa lista de rivais xa van fóra dous dos clubs que aspiran a todo nesta tempada. Outro deles, será, como dicíamos, o seu contrincante nesta cuarta xornada.
Bea Gaete regresa ao equipo como MVP e campioa no Panamericano
Na lista de convogadas para este compromiso o HC Deportivo Liceo, que recupera o concurso da xogadora internacional chilena Bea Gaete que regresou á cidade herculina logo de impoñerse coa súa selección no Panamericano.
Bea Gaete colgouse a medalla de ouro ao pescozo e ademais foi proclamada MVP do torneo. Sen ela as coruñesas empataron ao Telecable e incluso se puxeron por diante. O seu concurso aumentará as posibilidades do conxunto liceísta.
Como soñar non custa nada, se o HC Deportivo Liceo vence na cancha do Cerdanyola, as galegas subirán un posto na táboa colocándose sextas e poñendo por debaixo ás súas rivais desta xornada. Sobre o papel debera ser unha tarefa complicada para un equipo acabado de ascender, pero non imposible. Quen dixo medo?
O HC Deportivo Liceo xa ten adestrador: Stanis García
Segundo vén de anunciar o conxunto verdibranco, o primeiro equipo feminino liceísta contará con novo adestarador a partir do vindeiro luns. Trátase de Stanis García, que substituirá á dupla conformada no banco coruñés por Noemí Uzal e Marc Godayol que seguirán a desempeñar as súas tarefas previas no staff do conxunto galego (delegada e preparador físico).
O técnico asturiano Estanislao García Requejo Stanis, que ocupará o lugar ao que renunciou logo dunha xornada de competición disputada Carlos Loureiro, xa dirixira ao equipo feminino no pasado. García, neste momento, xa formaba parte do corpo técnido do HC Deportivo Liceo xa que estaba á fronte do conxunto masculino de OK Liga prata do HC Deportivo Liceo. Trátase, polo tanto, dun home da casa.
Ver esta publicación en Instagram
Mirando máis aló desta xornada, o quinto oso a roer polas galegas será na seguinte quenda. Na xornada quinta visita o Pazo dos Deportes de Riazor o Palau, será o 4 de decembro. Pero imos primero co partido de Cerdanyola. Un pasiño de vez.
Noemí Uzal: “Para ter opcións todo pasa por que fagamos unha defensa forte e dura”
