O HC Liceo vén de facer público a través dun comunicado que se da inicio a unha “nova etapa na xestión do equipo feminino e cesión da súa praza de OK Liga“.
Durante semanas o ruxe ruxe estaba na cidade da Coruña. O HC Liceo non estaba en condicións de manter o seu equipo feminino na máxima categoría. Pero na entidade herculina tampouco se quería que o esforzo de chegar ata a elite cun club galego feminino de hoquei a patíns quedase en nada. Así que se buscaron opcións para intentar que a cesión da súa praza fose para algunha entidade coruñesa ou galega. Hoxe chega a confirmación en forma de comunicado do club coruñés.
Explican desde a entidade verdibranca que “debido á complicada situación que atravesa temporalmente a institución o Hockey Club Liceo chegou a un acordo final para a cesión da praza de OK Liga Feminina a unha nova entidade que, desde o inicio da próxima tempada, farase cargo da xestión deportiva e económica do equipo”.
Aseguran desde o HC Liceo que a decisión, “baseada unicamente en motivos económicos que fan inviable a continuidade do proxecto, pon fin a unha etapa na que o Hockey Club Liceo dedicou innumerables esforzos económicos para conseguir que os seus dous primeiros equipos lograsen grandes éxitos deportivos”.
O equipo queda na Coruña pese a non ser do HC Liceo
Amosan desde o club coruñés o seu “agradecemento á Xunta de Galicia polo compromiso que mostrou para garantir a estabilidade desta nova iniciativa, conseguindo desta forma que Galicia e A Coruña sigan representadas na máxima categoría do hóckey sobre patíns feminino”.
Segundo indican desde o HC Liceo, “o acordo, produto de múltiples negociacións entre as partes implicadas, recolle a boa vontade do Hóckey Club Liceo que, a pesar de contar con opcións economicamente máis satisfactorias, fixo prevalecer a continuidade do proxecto nesta cidade”.
No comunicado feito público polo Hockey Club Liceo relátase que mediante este acordo, ceden “totalmente e con efecto inmediato a xestión global do equipo feminino. Aínda que o HC Liceo farase cargo dos compromisos económicos derivados da xestión realizada ata o final da presente tempada e negociados cos novos responsables, para un mellor inicio da nova xestora”.
Cambio de nome
O que é inevitable é o cambio de nome do novo equipo ao deixar a entidade verdibranca. Tal e como explican desde o club coruñés: “O acordo recolle que a entidade xestora entrante terá potestade para elixir a nova identidade visual e corporativa do proxecto, que deixará de denominarse Hockey Club Liceo Feminino”.
Desde a entidade liceísta agradecen “a xogadoras e corpo técnico o compromiso mostrado co equipo a pesar das dificultades sufridas, así como o respaldo recibido polas entidades públicas e privadas e o apoio dunha afección que sempre estivo á beira da entidade”.
O Hockey Club Liceo “lamenta que a falta de medios impedisen seguir adiante coa óptima xestión dun proxecto polo que a entidade apostou de forma incondicional e sen ningún tipo de dúbidas, a propósito das dificultades económicas que iso supoñería para o conxunto do club”.
Desde o histórico club coruñes se desexa “a mellor das sortes ao novo proxecto que agora arrinca para que o hóquei feminino desta cidade poida seguir crecendo nun contexto máis favorable e cheo de éxitos deportivos como tivo ata o de agora”.
O Hockey Club Liceo militou este curso 2022-23 na Ok Liga Iberdrola, a máxima categoría do hóquei a patíns española, rematando a liga regular na quinta praza, a un paso de entrar no play-off polo título. Conseguiu gañar 13 partidos, empatou tres e perdeu dez.
Este curso o conxunto herculino facía historia ao debutar en competición europea e ser así o primeiro equipo galego feminino de hoquei sobre patíns en disputar un torneo continental. Nesta a súa primeira vez na Liga Europea feminina a Champions League de hóquei a patíns, as verdibrancas chegaron a cuartos de final.
