Boa imaxe e ADN Liceo de manual. Así se pode cualificar o partido de presentación do conxunto feminino do HC Deportivo Liceo, as ascendidas a OK Liga. As verdibrancas foron superiores a un serio e perigoso Sporting de Portugal (5-4).
Todo iso despois de que, ó principio, se fixera valer a gran categoría do rival. O Sporting de Portugal amosou calidade e apenas tardou dous minutos en colocar o 0-1, obra de Margarida tras unha boa xogada colectiva. Resultado enganoso tendo en contra a posta en escea do HC Deportivo Liceo que adestra o técnico galego Carlos Loureiro, que estreaba galas e incorporacións.
A pesar da resposta local, o conxunto luso logrou aumentar a vantaxe (minuto 7) desde o punto de castigo. Catarina superou a Katy e deixou un marcador duro, pero as verdibrancas asumiron o reto. Melloraron o seu rendemento e puxeron en problemas ó Sporting de Portugal ata que Naiara, en menos dun minuto, igualou o duelo (2-2).
O 3-2 puido chegar en múltiples ocasións, pero foron as portuguesas as que se adiantaron de novo mediante Rita Batista e Ana Catarina (2-4). Con esta situación chegouse ao tempo de descanso.
A perseverancia do HC Deportivo Liceo
Lonxe de rendirse, o HC Deportivo Liceo regresou á pista coa mesma actitude do 2-2 parcial. Amosouse ambicioso e con oportunidades a pesar do gol anulado que anotou o Sporting de Portugal (logrado co patín tras un rexeite de Viki Caretta, que tomou o lugar de Katy). Nunca amedrentou.
Instantes despois, Alba Garrote marcou o 3-4 cunha definición potente. A falta de doce minutos, ela mesma logrou o 4-4. Viki foi chave para conservalo tras salvar tres oportunidades claras do rival, finalmente superado polo hat trick de Naiara Vaamonde. O seu gol, vital para a remontada, chegou a dous minutos da clausura.
FICHA TÉCNICA
HC DEPORTIVO LICEO: Katy Guscin; Ale Martín, Luchy, María Sanjurjo e Alba Garrote – quinteto inicial -. Tamén xogaron: Andrea Ojeda, Naiara Vaamonde, Lara Yáñez, Lucía Yáñez, Cris Diz, Isa Barros e Viki Caretta.
SPORTING PORTUGAL: Claudia Vicente; Inês Arrais, Rute Lopes, Margarida Florêncio e Ana Catarina – quinteto inicial -. Tamén xogaron: Inês Açoreira, Inês Vieira, Rita Batista e Alice Vicente.
ÁRBITROS: Nicolás Morandeira e Diego Garrido. Non amosaron cartóns azuis.
GOLES: 0-1 (Margarida Florêncio, min. 2). 0-2 (Ana Catarina, min. 7). 1-2 (Naiara Vaamonde, min. 14). 2-2 (Naiara Vaamonde, min. 15). 2-3 (Rita Batista, min. 22). 2-4 (Ana Catarina, min. 25). 3-4 (Alba Garrote, min. 27). 4-4 (Alba Garrote, min. 38). 5-4 (Naiara Vaamonde, min. 48).
INCIDENCIAS: Partido de presentación do HC Deportivo Liceo 21/22. Pazo dos Deportes de Riazor ante as seareiras verdibrancas. Tamén se presentou o equipo masculino da entidade.
