Hai partidos que se sabe que van ser históricos antes de que soe a bucina de inicio. O que xogará esta tarde, a partir das 18:00 horas, o HC Deportivo Liceo contra o Martinelia CP Manlleu dentro da WSE Champions League é un deles. Trátase do debut en competición europea das verdibrancas que pasan a ser o primeiro equipo galego feminino de hoquei sobre patíns en disputar un torneo continental. O partido poderá verse ao vivo no Pazo dos Deportes de Riazor na Coruña, e tamén a través en liña a través do streaming da World Skate Europe.
O conxunto que adestra Stanis García afronta o partido con ilusión e sabedoras de que o seu nome xa vai entrar na historia. Confírmase que, por moitos pasos que o deporte feminino teña dado nos últimos anos, aínda hai fitos por alcanzar e xogadoras que se convirte en pioneiras.
Esta primeira etapa da competición xógase en formato de fase de grupos. A aspiración das galegas é quedar primeiras de grupo para pasar con máis garantías á cuartos de final e á fase de eliminatorias.
No Martinelia CP Manlleu a xogadora estrela é Anna Casarramona, capitá da Selección Española de hoquei sobre patíns que ven de proclamarse subcampioa do Mundo en San Juan (Argentina). Unha intervención cirúrxica fai que a deportista sexa baixa nas filas do rival do HC Deportivo Liceo.
Extrapolando a situación na competición doméstica, OK Liga Iberdrola, tanto das galegas como das catalás, vemos que o Martinelia CP Manlleu ocupa a cuarta praza da clasificación con 26 puntos. Gañou sete partidos, perdeu catro e non rematou ningún en táboas. O conxunto que adestra Jordi Boada anotou 39 goles e encaixou 24 unha cifra elevada que fai da zaga o seu punto feble. No caso do HC Deportivo Liceo, as galegas son sétimas con 16 puntos (dez menos que as catalás), gañaron tantos partidos como perderon, cinco, e empataron 1. Suman 24 goles a favor e 28 en contra. No caso das verdibrancas, falta gol.
A casualidade fixo que precisamente o seguinte partido da OK Liga Iberdrola destes dous conxuntos sexa o que os vai enfrontar na xornada 12, aínda que será en terras catalás. O partido está marcado para o vindeiro mércores 11 de xaneiro a partir das 21:00 horas.
Así é a WSE Champions League Women 2023
A WSE Champions League Women xógase esta tempada cunha nova fórmula con 12 equipos rexistrados dispostos en catro grupos de tres equipos cada un e seis xornadas que se xogan de xaneiro a marzo. Clasifícanse para a seguinte fase, cuartos de final, os dous mellores equipos de cada grupo. Está previsto que os partidos de ida de cuartos de final se xoguen o 1 de abril e os de volto o 15 de abril. O formato é de eliminatoria. Os catro conxuntos vencedores acceden á Final Four que se celebrará os días 29 e 30 de abril de 2023.
O favorito é o Generali Palau Plegamans, dúas veces campión de Europa nesta WSE Champions League Women. Na competición están cinco equipos españois (o asturiano Telecable HC Gijón, os cataláns: CP Vila-Sana, CP Manlleu, Cerdanyola; e o por primeira vez un equipo galego, o HC Deportivo Liceo), un francés (Nantes Atlantique), un portugués (Academico De Feira) e un italiano (H.C. Valdagno).
Debután tamén nesta competición continental da WSE Champions League Women o Vila-Sana (España), o Académico da Feira (Portugal), e o Valdagno (Italia).
Primeira xornada da WSE Champions League Women sábado 7 de xaneiro 2023
- Grupo A – 19:00 horas – C.P. Vila-sana (España) vs Academico De Feira (Portugal). Arbitran: Loic Le Menn (Francia) e Stephane Rizzotti (Francia) – Sigue o partido ao vivo en Streaming esta ligazón.
- Grupo B – 18:00 horas – HC Deportivo Liceo (España) vs Martinelia C.P. Manlleu (España). Arbitran: Pedro Silva (Portugal) e Silvia Coelho (Portugal) – Podes seguir o partido ao vivo en Streaming nesta ligazón.
- Grupo C – 19:15 horas – Telecable H.C. Gijon (España) vs H.C. Valdagno (Italia). Arbitran: Porfirio Fernandes (Portugal) e Carlos Correia (Portugal) – Sigue o partido ao vivo en Streaming nesta ligazón.
- Grupo D – 18:00 horas – Cerdanyola C.H. Fenie Energia (España) vs Nantes Atlantique (Francia). Arbitran: Filippo Fronte (Italia) e Simone Brambilla (Italia).
