Empezar con bo pé era moi importante para o HC Deportivo Liceo por varios motivos así que esta vitoria 5-1 ante o Bigues i Riells ten un valor importante.
O primeiro motivo é que o equipo verdibranco volvía á elite do hoquei a patíns estatal e querían dar unha boa imaxe desde o principio, máis aínda no Pazo de Riazor e diante do seu público. O segundo motivo por que non ter o casilleiro a cero da folgos.
O terceiro motivo que facía importante puntuar neste primeiro choque ligueiro é por que o calendario é moi duro para as verdibrancas que van recibir nas próximas catro xornadas aos catro grandes favoritos deste curso: Martinelia CP Manlleu, Telecable HC, Cerdanyola CH Feníe Energía e Generali HC Palau de Plegamans. Con elas medirase as coruñesas nesa orde. É moi factible que non se puntúe en todos os cruces, polo que sumar neste arranque, era vital.
Pese ao que poida facer pensar o resultado (5-1) o triunfo das liceístas foi traballado. As herculinas foron de menos a máis. Para empezar recibir un gol que as colocaba por detrás no marcador, que as descolocaba o xusto sen chegar a noquealas en absoluto. A intelixencia do bloque estivo en manter o tipo e rexurdir cando tiveron oportunidade.
Dúas metades, o rexurdimento do HC Liceo
Houbo dous partidos. Un na primeira metade, outro na segunda. Chegou o HC Liceo con vida ao descanso e, a partir de aí, recompúxose. Antes do descanso o HC Deportivo Liceo recibía un gol aos dez minutos de xogo.
O equipo galego estaba mandando na posesión pero o Bigues i Riells era moi incisivo nas contras gañando a partida nese aspecto do xogo ao equipo que adestra Carlos Loureiro. As rápidas transicións sobre as que xa advertira na preparación do partido o técnico galego estaban aí, e facían dano.
Varias foron as ocasións nas que a italiana Viki Caretta tivo oportunidade de demostrar a súa enorme calidade baixo paus.
O conxunto coruñés so deixou pasar un minuto para empatar o partido cun gol dunha das bigoleadoras da tarde, Adriana Soto (1-1). Erika Ghirardello puido volver poñer as visitantes por diante desde o punto de penalti, pero Viki Caretta impediullo desde a portaría coruñesa.
O HC Deportivo Liceo colocábase por diante no minuto 21 tamén con gol de Adriana Soto (2-1). Chegaron así ao descanso por diante no electrónico do Pazo dos Deportes de Riazor. Puideron chegar cun 3-1 se Lucía Yáñez tivera anotado o penalti do que dispuxo a 2 minutos do descanso. Pero a gardameta visitante, Julia Vilarrasa, fixo ben o seu traballo.
A segunda metade foi outra historia. O equipo galego acendeu o mecanismo dos goles e Viki Caretta seguiu parando todo o que lle chegaba. Así, as coruñesas foron poñendo distancia no marcador e festexando tantos. O 3-1 chegou no minuto 41 a través de Alba Garrote. Un minuto despois, no 42, Bea Gaete subía ao marcador o cuarto das verdibrancas, esta xornada con camiseta negra letras douradas e plantalón branco, deixando o verde para as visitantes.
O colofón foi un auténtico golazo de Alba Garrote no minuto 46 de partido (5-1). A patinadora anotaba unha falta directa con este punto de calidade que recollía en vídeo a compañeira María Varela de La Opinión de A Coruña
Habéis visto lo que acaba de hacer @albagarrote7 ??!!! @HockeyClubLiceo @HCLiceoFem #hockeysobrepatines pic.twitter.com/IV6k6Dd7vW
— Maria Varela (@MeriVarela) November 6, 2021
Son estos os primeiros tres puntos da campaña 2021-22 para o equipo que adestra Carlos Loureiro. Tres puntos que falan de esforzo, de capacidade de refacerse e de condicións para facerlle fronte a calquera rival.
Froito da goleada, o HC Deportivo Liceo ocupa a primeira posición na táboa. Está seguido polo Cerdanyola CH Feníe Energía.
A seguinte cita ligueira para as herculinas será o vindeiro sábado 13 de novembro ás 18:00 horas na cancha do Martinelia CP Manlleu.
FICHA TÉCNICA
5) HC DEPORTIVO LICEO: Viki Caretta; Naiara Vaamonde, Luchy Paz, María Sanjurjo, Alba Garrote – quinteto inicial -. Tamen xogaron: Ale Martín, Bea Gaete, Adriana Soto e Lucía Yáñez.
1) BIGUES I RIELLS: Julia Vilarrasa; Sofía Reyes, Aina Serra, Marta Borràs, Erika Ghirardello – quinteto inicial -. Tamen xogaron: Daniela Cañadó, Gemma Camp, Marlena Rubio e María Igualada.
GOLES: 0-1 (Sofía Reyes, min. 10). 1-1 (Adriana Soto, min. 11). 2-1 (Adriana Soto, min. 21). 3-1 (Alba Garrote, min. 41). 4-1 (Bea Gaete, min. 42). 5-1 (Alba Garrote, min. 46).
ÁRBITROS: Lorenzo Bosch Sande (colexidado principal) e Iñigo López-Leitón Zapico (colexiado auxiliar). Cronometradora Valentina de Girolamo Ordóñez. Sen cartóns.
INCIDENCIAS: Jornada 1 da OK Liga Feminina 21/22 da FEP. Pazo dos Deportes de Riazor (A Coruña).
🏑 #Hoquei
Amosámoste en 9 segundos o gol de falta de @albagarrote7 que daba o 5-1 ao @HCLiceoFem e a celebración na pista e no banco. Por certo, a xogadora achegouse á banda a festexar con alguén do equipo, podes ver aquí a quen foi apertar 👇 pic.twitter.com/EINvwD8QXp— As Nosas – Xornal Deportivo (@asnosasdeportes) November 7, 2021
- CP Las Rozas – Martinelia CP Manlleu 0 – 3
- CP Voltregá Stern Motor – Igualada Feminí HCP 1 – 3
- PHC Sant Cugat – Garatge Plana Girona CH 3 – 0
- HC Deportivo Liceo – CHP Bigues i Riells 5 – 1
- Generali HC Palau de Plegamans – Telecable HC 0 – 2
- Lidergrip CH Mataró – Cerdanyola CH Feníe Energía 0 – 4
- CP Vilanova – CP Vila-Sana 2 – 4
SÁBADO 13/11/2021
- 18:00 Martinelia CP Manlleu – HC Deportivo Liceo
- 19:00 CP Vila-Sana – CP Voltregá Stern Motor
- 19:15 Telecable HC – CP Las Rozas
- 20:30 Cerdanyola CH Feníe Energía – Generali HC Palau de Plegamans
- 21:00 Igualada Femení HCP – PHC Sant Cugat
- 21:00 CHP Bigues i Riells – CP Vilanova
DOMINGO 14/11/2021
- 16:05 Garatge Plana Girona CH – Lidergrip CH Mataró
Carlos Loureiro: “Hai equipo para meterse nos seis primeros da competición”
