Se durante os últimos partidos o HC Deportivo Liceo tiña no seu debe a puntería e a efectividade, neste partido final da primeira volta sacouse a espiña dun tirón. Para certificar a súa clasificación cara á Copa da Raíña, o equipo liceísta goleou ao Orkla Bigues i Riells 10-4.
Alba Garrote, con cinco goles, e María Sanjurjo, con tres goles, foron as máis enchufadas cara á porta rival. O equipo que adestra Stanis García abriu a lata dos goles e empezou a transformar ocasións dun xeito que se botaba de menos en xornadas previas. Cos tantos anotadas nesta xornada a coruñesa María Sanjurjo suma 12 goles e aparece na lista de máximas goleadoras da Ok Liga Iberdrola no posto 7º.
Non pasaran máis que segundos de partido cando Alba Garrote abriu a súa conta anotadora. Foi a través da transformación dunha pena máxima. Logo chegaría o 2-0 por medio de Cris Diz. Recurtaría distancias o Orkla Bigues i Riells por medio de Erika Ghirardello (2-1). Volveo anotar Alba Garrote (3-1) e María Sanjurjo (4-2). Antes do descanso anotaría outro tanto máis o equipo visitante por medio dunha falta directa transformada por Marta Borrás (4-2) e Alba Garrote colocou o electrónico 5-2 antes de poñer rumbo a vestiarios.
No segundo acto volveu anotar Alba Garrote de falta directa (6-2). E respondeu o Bigues i Riells a través de Rocío Ramón (6-3). Aínda anotaría un gol máis Alba Garrote (7-3). Tomaría o relevo nas locais a galega María Sanjurjo que marcou o 8-3 mailo 10-3. En medio, tamén anotaría para as liceístas Ale Martín o 9-3). Polo Bigues i Riells anotou o último tanto do partido (10-4) Rocío Ramón.
HC Deportivo Liceo, sétimo
Con este resultado o HC Deportivo Liceo sela o seu billete cara a participar na Copa da Raíña 2023 de hoquei a patíns ocupando á sétima praza na clasificación neste final da primeira volta. Suman as galegas 19 puntos. Acumulan tantas vitorias como derrotas (seis) e un empate.
FICHA TÉCNICA:
10) HC DEPORTIVO LICEO: Viky Caretta, Bea Gaete, María Sanjurjo, Alba Garrote e Marlena Rubio – quinteto inicial -. Tamén xogaron: Ale Martín, Lara Yáñez, Cris Diz, Luchy Paz e Adriadna Escalas.
4) ORKLA BIGUES I RIELLS: Helena Saldaña, Gal-la Solé Marquès, Marta Borras, Erika Ghirardello e Rocío Ramón – quinteto inicial -. Tamén xogaron: Natalia Ylla Iglesias, María Igualada e Julia Villarrasa.
GOLES: 1-0: min. 1 Alba Garrote (penalti). 2-0: min. 16 Cris Diz. 2-1: min. 19 Erika Ghirardello (penalti). 3-1: min. 20 Alba Garrote. 4-1: min. 22 María Sanjurjo. 4-2: min. 22 Borrás (falta directa). 5-2: min. 24 Alba Garrote. 6-2: min. 27 Alba Garrote (falta directa). 6-3: min. 26 Ramón. 7-3: min. 39 Alba Garrote. 8-3: min. 43 María Sanjurjo. 9-3: min. 44 Martín. 10-3: min. 44 María Sanjurjo. 10-4: min. 49 Ramón.
EQUIPO ARBITRAL: Pablo Nicieza Elosegui, principal. Carlos Chouciño Fernández, auxiliar. David Martos Rodríguez, cronometrador. Amosaron cartón azul a Bea Gaete polo HC Deportivo Liceo, e a Rocío Ramón, Erika Ghirardello e María Igualada nas filas do Orkla Bigues i Riells.
INCIDENCIA: Partido correspondente ao último partido da primeira volta da Ok Liga Iberdrola (xornada 13ª) disputado no Pazo dos Deportes de Riazor na Coruña.
