- O CP Esneca Fraga consegue impoñerse ao HC Coruña 2-3 nun partido emocionante no que ambos os dous conxuntos dominaron unha das partes. A falta de acerto local condenounas á primeira derrota da tempada nesta OkLiga Iberdrola 2024-25.
O partido iniciou cun ritmo trepidante, ambos os conxuntos buscando a portería rival e facendo empregarse a fondo ás gardametas contrarias. No conxunto local, Inés Severino e Laia Juan tiveron as ocasións máis claras no primeiros cinco minutos do encontro. As coruñesas saíron cun punto máis de intensidade que nos anteriores partidos e iso permitiulles manter o tenteo inicial a cero diante un CP Esneca Fraga moi vertical. Con todo, Julieta Fernández aproveitaría un desaxuste na saída de balón da defensa branquiazul para abrir o marcador para as oscenses.
O adestrador das galegas, Stanis García, pediría tempo morto tras o gol para tratar de axustar ao equipo dando entrada a Efe Muñoz e Anna Bulló. Estes cambios provocaron máis orde nas locais, e é aí onde emerxeu a figura de Bea Gaete. A capitá fixo unha explosiva arrancada buscando a meta rival e, tras un forte disparo, lograría poñer a igualada no marcador cando restaban nove minutos para a conclusión da primeira metade.
Un novo erro defensivo por parte das locais permitiu ao conxunto de Huesca volver poñerse en vantaxe no marcador por mediación da súa capitá, Adriana Gutiérrez.
O dano psicolóxico para o HC Coruña Feminino foi tremendo. Falta de coidado no ataque e posesións en defensa conlevaron a unha grandísima internada por banda dereita da internacional coruñesa María Sanjurjo. A xogadora do CP Esneca Fraga conectou un pase medido a Adriana Soto para poñer o 1-3 no marcador co que se chegaría ao final da primeira parte.
Coa continuación, o HC Coruña Feminino sairía con enerxías renovadas. O disparo desde o seu campo de Alba Garrote, nada máis comezar o segundo período, supuxo o 2-3 no marcador e a sensación de que o HC Coruña Feminino podía facer dano ao CP Esneca Fraga.
Más intensidade no seu xogo e unha maior circulación de bóla permitiron ao HC Coruña Feminino limitar as virtudes das actuais campioas de Europa. Fernanda Muñoz erixiuse como a principal responsable da melloría branquiazul. A xogadora chilena, no seu primeiro partido da tempada, achegou pernas frescas e claridade no ataque do HC Coruña Feminino. Aínda así, o CP Esneca Fraga soubo sufrir as ondas do equipo galego e logrou manter a vantaxe, pechando o encontro co definitivo 2-3.
Este resultado é a primeira derrota da tempada 2024-25 na OkLiga Iberdrola. Na primera xornada vencían 3-2 ao Oxigen PHC Sant Cugat, na segunda empataban 2-2 a domicilio na pista do Orkla Bigues I Riells, e nesta terceira xornada da OkLiga Iberdrola caían como locais 2-3 coas aragonesas do Fraga.
