Hoxe arrinca a competición na máxima categoría do hoquei a patíns feminino en España. O primeiro rival das coruñesas do HC Borbolla neste seu debú na Ok Liga 2020-21 é o CP Alcorcón.
As madrileñas visitan a cancha das galegas hoxe, sábado 26 de setembro ás 20:00 horas. Na cancha do pavillón de Monte Alto na cidade da Coruña, por mor do protocolo de prevención da COVID-19, so poderán entrar 30 persoas á bancada. É dicir, que o aforo do recinto deportivo, que son 100 localidades, redúcese ao 30%.
O partido entre Hockey Club Borbolla e Club Patín Alcorcón será arbitrado polo colexiado Francisco Javier López Quintero sendo o árbitro auxiliar Diego Garriodo Areas.
O HC Borbolla, á procura de manterse
O técnico das herculinas, Santiago Martínez, que afronta a tempada con “ilusión e esperanza en acadar a permanencia”, explicaba que para este primeiro partido “temos as baixas da porteira Fernanda Tapia e da xogadora Fernanda Muñoz”.
O equipo da Comunidade de Madrid desprázase á Coruña en autobús e leva xa un mes de preparación para o seu concurso nesta tempada liguera no hoquei rodado.
As galegas buscarán iniciar con bo pé o seu arranque de rodaxe neste curso na elite estatal. Polo que se espera que intenten facer valer o factor cancha e imporse ao CP Alcorcón. Acadar un primeiro triunfo na xornada inaugural daría azos as coruñesas de cara a facer un bo papel nesta primeira fase competitiva ligueira.
O encontro poderá seguirse en liña a través da canle en YouTube dun dos patrocinadores das coruñesas: HockeyGlobal.
Visita da alcaldesa e da concelleira de Deportes da Coruña
Coa fin de trasladarlles os seus azos, esta semana as coruñesas recibiron unha visita especial nun dos seus adestramentos de cara a preparar o partido de hoxe. Á cancha de Monte Alto acudiron a alcaldesa da cidade da Coruña, Inés Rey, e a concelleira de Deportes, Mónica Martínez.
As dúas representantes municipales amosaron así o apoio do Concello da Coruña a este equipo que esta tempada é o máximo representante coruñés feminino no hoquei a patíns, unha disciplina deportiva con moitas seguidoras na cidade herculina.
A primeira Xornada da OK Liga Feminina conta con estos cruces:
GRUPO A
Sábado 26 de septiembre
Ene Oposiciones Cuencas Mineras – CP Las Rozas (18:30h)
HC Borbolla – CP Alcorcón (20:00h)
Cerdanyola CH – Telecable HC (20:30h)
Domingo 27 de septiembre
Magic Studio CP Manlleu – Garatge Plana Girona CH (16:05h) (En directo por OK Liga TV)
GRUPO B
Sábado 26 de septiembre
PHC Sant Cugat – CP Voltregà (18:15h)
CP Vilanova – Areces Ecopilas Asturhockey (20:30h)
CHP Bigues i Riells – CP Esneca Vila-sana (21:00h) (En directo por OK Liga TV)
Domingo 27 de septiembre
Igualada Femení HCP – Generali HC Palau de Plegamans (12:15h) (En directo por OK Liga TV)
