O HC Borbolla impose en Monte Alto ao Garatge Plana Girona CH por un marcador de 4-0. O triunfo, ademais de ser o primeiro das ‘tomatitas‘ (que nesta ocasión vestían de azul) na súa casa, supón un importante paso para as coruñesas na súa loita por manterse ao final de tempada na Ok Liga Feminina.
Pode que o HC Borbolla leve so dous partidos gañados no que vai de competición, pero atinou á hora de elixir os rivais aos que impórse. A domicilio, as coruñesas impuxéronse ao CP Alcorcón na xornada 8ª (2-3). Agora, recuperan o partido pendente da sexta co Garatge Plana Girona CH e vencen por 4-0 en feudo propio. Alcorcón e Girona son xustamente os dous equipos que acompañan ás galegas na zona baixa da táboa.
Como noutras ocasións acontecera no sentido contrario, o marcador de 4-0 non reflicte o acontecido no partido. O HC Borbolla tivo que loitar con ansia para impórse a o conxunto visitante que adestra Andreu Graupera. Non foi un triunfo tan doado como pode facer pensar o avultado resultado que recolleou o luminoso ao final do tempo regulamentario.
O adestrador local, Santi Martínez, explicaba que o equipo que prepara levou o “control do partido. Por fortuna saíu, máis ou menos, como tiñamos planeado. Pero foi moi difícil. Erramos moitas ocasións de gol o que en moitos casos lévache á derrota. Pero hoxe saíunos ben”, apuntaba o técnico das galegas.
Quedaban dez minutos para o final do primeiro período cando chegou o gol co que o HC Borbolla abría o marcador. Asinouno Lara Yáñez. Na previa do encontro co Garatge Plana Girona CH, Santi Martínez xa advertía do bo momento de xogo que atravesaba a patinadora. Facío ao trasladar as dúbidas sobre o seu concurso no partido de hoxe martes logo de recibir un golpe no nocello no cruce anterior ante o Manlleu. Por sorte, puido ser da partida, xa que a súa aportación en forma de goles non remataría neste primeiro tanto.
Pese a ter un lanzamento de falta directa para as locais, o marcador non se movería dese 1-0 ao final dos primeiros 25 minutos. A falta de sete minutos para o descanso, a raíz de que Xantal Piqué vise o cartón azul, Marta Vilas puido tentar sorte nun man a man co Virginia Díaz, pero o intento da xogadora coruñesa non fructificou.
Actuación destacada de Fernanda Tapia baixo paus
Á volta de vestiarios o HC Borbolla tardou en facer valer o seu xogo e en mellorar en efectividade ante o marco rival aumentando a súa ventaxa. Antes tivo que loitar duro para manter a súa curta vantaxe. O Girona contou con varias ocasións a xogo parado.
Dúas delas consecutivas a 18 minutos do final. A primeira unha falta directa lanzada por Alba Romaguera que detén en dous tempos a arqueira chilena Fernanda Tapias. O traballo da cancerbeira non remataría aí. A actuación da porteira local á hora de defender ese disparo de Romaguera foi sancionada polo colexiado Diego Garrido Areas cun penalti.
Así foi como nun mesmo minuto a gardamallas, internacional coa selección marcianita, tivo que enfrontarse a dous cara a cara. O penalti tirou Laura Vall e detivo co corpo Fernanda Tapias. A porteira do Borbolla detería tamén o rechace co que se fixo a propia Laura Vall que vía así como unha e outra vez os seus intentos de perforar a meta galega tornábanse infructuroso. Nun mesmo minuto, dous intentos consecutivos coa bóla parada, tres disparos, Ningunha das dúas xogadoras catalás conseguiron bater a Fernanda Tapias.
Os goles locais chegaron nos últimos cinco minutos
Seguiu aguantando en defensa o HC Borbolla e buscando a meta rival sen éxito ata que a falta de cinco minutos para a conclusión abriuse a caixa dos goles. O 2-0 anotouno de novo Lara Yáñez, que como adiantábamos previamente, non se conformou co seu primeiro tanto.
Na recta final do choque as coruñesas tiraron partido da presión das visitantes e a través de varios roubos de bóla artellaron contragolpes que serviron para aumentar a súa renta. Anotaron o 3-0 por medio de Lucía Yáñez e o 4-0 a través dun disparo de Fernanda Muñoz a menos dun minuto para que a bucina anunciase o final do choque.
É a primeira vez que o HC Borbolla anota goles nesta tempada 2020 – 2021 na Ok Liga Feminina. Tamén é a primeira das ocasións que as tomatitas que adestra Santi Martínez manteñen a súa portería imbatida ao final dos 50 minutos de xogo.
O Borbolla, pensando na seguinte fase competitiva
Como apuntaba o técnico local, unha vitoria, xusta pero moi traballada, diante dun rival duro. Un triunfo que significa moito para as galegas en termos de moral, que sirven para medrar ante un rival directo, e que contan, e moito, de cara á segunda parte da competición na máxima categoría do hoquei a patíns estatal.
Réstanlle ás coruñesas catro encontros para finalizar esta etapa competitiva encadradas no Subgrupo A. Ten por diante a visita ao Cerdanyola e a o Girona, e acudirá ás canchas do Telecable de Gijón e do CP Las Rozas. É dicir, salvo o Garatge Plana Girona CH todos os seus rivais de aquí ao final desta parte da competición serán da zona alta. No Subgrupo B os postos de cola os ocupan os conxuntos de: Vilanova, Igualada e Areces.
OS MELLORES MOMENTOS DO CRUCE BORBOLLA – GIRONA DA MAN DE HOCKEY GLOBAL
FICHA TÉCNICA
HC BORBOLLA: Fernanda Tapia, Lara Yáñez, Fernanda Muñoz, Bea Pereira e Lucía Yáñez – quinteto inicial -. Tamén xogaron: Julia Cabanas, Antía Rivadas, Alba Díaz e Marta Vilas. Eden Avecilla (P.S.)
GARATGE PLANA GIRONA CH: Virgina Díaz, Alba Romaguera, Julia Canal, Laura Vall e Xantal Piqué Lorente – quinteto inicial -. Tamén xogaron: Estel Forns e Jana Crespo. Ainoa Pastor (P.S.)
GOLES: 1-0: Lara Yáñez Vázquez. 2-0: Lara Yáñez Vázquez. 3-0: Lucía Yáñez Vázquez. 4-0: Fernanda Muñoz.
ÁRBITROS: Diego Garrido Areas, auxiliado por Nicolás Morandeira Sánchez. Foron amonestadas con cartón azul polas visitantes as xogadoras Alba Romaguera Camps, e a Xantal Piqué Lorente.
INCIDENCIAS: Partido correspondente á sexta xornada do Grupo A da OK Liga Feminina da FEP. Disputado no pavillón de Monte Alto, na cidade da Coruña.
Santi Martínez: “As rapazas merecíanse un triunfo como este”
