Que o HC Borbolla vai estar no grupo que loita pola permanencia é sabido. Queda coñecer que conxuntos estarán con as tomatitas nesa pugna por seguir na Ok Liga feminina o vindeiro curso. Un deses equipos pode ser precisamente o seu rival de hoxe, sábado 23 de xaneiro. As coruñesas reciben en Monte Alto ao CP Las Rozas ás 19:00 horas no último partido desta fase da competición.
Salvo para aquelas escuadras que teñen partidos aprazados (a COVID-19 non entende de horarios unificados), a primeira fase de competición da Ok Liga remata hoxe sábado 23 de xaneiro cos partidos que terán lugar ás 19:00 horas. Ás xogadoras que adestra Santi Martínez teñen posta a súa mirada na seguinte competición, pero sen perder de vista que este partido tamén pode contar nesa lea.
O técnico galego Santi Martínez non ten baixas para este cruce no que buscará mellorar o seu triunfo da primeira volta na que caeron pola mínima (2-1).
O Borbolla mira de esquello á seguinte fase
No Grupo A, ao que pertence o HC Borbolla teñen un partido pendente de disputa o Manlleu e o Girona (1), mentres que acumulan dous o CP Alcorcón e CP Las Rozas, que é o rival das galegas esta última xornada.
Todo esto fai que o CP Alcorcón, aínda que é penúltimo, puidese escapar da loita polo descenso. Ademais, están adiados nesta última xornada os cruces entre o ENE Oposiciones Cuencas Mineras – Garatge Plana Girona CH e o Magic Studio CP Manlleu – Telecable HC, mentres que o CP Alcorcón – Cerdanyola CH xogarase o 31/1/21.
A loita pola salvación será para os equipos que ocupen en ambos grupos os postos do quinto ao oitavo. Os resultados contra conxuntos que estén nesta lea, arrástranse. Polo que importa, e moito, os marcadores desta fase, ante rivais directos, de cara á seguinte.
Nesa loita, o HC Borbolla xógase a vida, pero mantén intactas as súas posibilidades de seguir xogando entre as mellores do hoquei español nunha das tempadas máis atípicas que recordará este deporte e outros moitos por mor da pandemia de COVID-19 que marca e desvirtúa os ritmos competitivos e supón un atranco máis na concentración e posta apunto das deportistas.
Póderase ver o partido entre HC Borbolla e CP Las Rozas a través de Hockey Global