O debú non foi o esperado. As coruñesas do Hockey Club Borbolla caían derrotadas na casa pola mínima diante do CP Alcorcón (1-2). A falta de definición no remate é, posiblemente, unha das cuestións a mellorar nas filas coruñesas. Con todo, as galegas deron moi boa imaxe no seu retorno á elite. Buscaron o triunfo en todo momento e estiveron moi concentradas.
Xa o dicía o seu adestrador, Santi Martínez, ao termo do encontro: “Saímos tristes polo resultado, pero creo que imos no bo camiño”. Non lle falta razón. Perder nunca é do agrado de ninguén, pero cando se fai dándoo todo e ofrecendo unha boa imaxe, se cadra, doe menos.
O xogo das galegas foi máis incisivo na primeira metade. Liderando ás galegas, Julia Cabanas, con máis experiencia nas súas pernas. No bando contrario, á caza do gol, unha Marina Monge que buscaba a meta de Eden sen descanso. A novísima porteira do HC Borbolla tivo unha boa actuación.
Abriría o marcador o CP Alcorcón unha xogada cun disparo lonxano no que o rechace favorece ás amarelas e acaba perforando a meta de Eden Avecilla.
Durante o primeiro período asinaron ocasións de gol pero déron de fuciños con Irene, a gardameta visitante. O gol resístiuselle ás coruñesas, que, sen embargo, en defensa estiveron moi concentradas, metidas no partido e sen parecer en absoluto unhas debutantes. Unha boa circulación de bóla e una gran actitude, adornaron o xogo dun HC Borbolla que buscaba o triunfo en Monte Alto sen éxito.
A porteira das madrileñas estivo excepcional e foi quen de salvar un directo e unha pena máxima, por non falar do seu acerto baixo os paus ao longo de todo o partido.
A segunda metada foi moito máis igualada e as madrileñas foron as que acadaron o triunfo. Lara Yáñez devolvía as taboas ao marcador 1-1. As galegas aproveitaban os minutos de superioridade numérica (4 para 3) por unha exclusión das madrileñas. Lara Yáñez remataba en boca de gol un pase en profundidade dunha compañeira.
De novo Marina Monge anotaría para as visitantes, mentres que as galegas non foron quen de transformar unha directa ou un penalti que erraba Bea Pereira.
FICHA TÉCNICA
HC BORBOLLA: Eden Avecilla (P), Julia Cabanas, Lara Yáñez, Bea Pereira, Lucía Yáñez – quinteto inicial – Antía Rivadas, Alba Díaz, Marta Vilas (C), Florencia de Girolamo (P)
CP ALCORCÓN: Irene de Santiago (P), Dolo Cancelas (C), Anna Carranza, María Castelo, Marina Monge – quinteto inicial – Andrea González, Gabriela Delgado, Patricia Sanz (P)
RESULTADO: 1-2
GOLES:
0-1: Marina Monge; 1-1: Lara Yáñez; 1-2: Marina Monge
COLEXIADOS: Árbitro: Francisco Javier López Quintero sendo o árbitro auxiliar Diego Garriodo Areas.
INCIDENCIAS: Pavillón de Monte Alto (A Coruña). Partido correspondente á primeira xornada da OK Liga feminina da Federación Española de Patinaxe.
O PARTIDO FOI TRANSMITIDO A TRAVÉS DA CANLE DE YOUTUBE DE HOCKEY GLOBAL
Santi Martínez, HC Borbolla: “Saímos tristes polo resultado, pero creo que imos no bo camiño”
