Triunfo rotundo por 4-0 e con triplete de Millene para o Dépor ABANCA no regreso á competición logo do parón. A Cidade Deportiva de Abegondo foi escenario dun novo triunfo das futbolistas que adestra Irene Ferreras que se impoñían desta volta ao RCD Espanyol.
O triunfo, con hat trick de Millene e un gol de Ainhoa Marín, coloca ao Dépor ABANCA como segundo clasificado. Ao estar de primeiro o Barcelona B (filial sen dereito ao ascenso) de rematar hoxe a competición o equipo galego sería o que ascendería directamente. Non é o caso. Queda aínda competición por diante e moito que sachar.
Un mes levaba o Dépor ABANCA sen pisar o tepe de Abegondo en competición oficial. Houbo parón por partidos internacionais. O conxunto branquiazul quería, precisaba e sabíase capaz de retomar o camiño dos triunfos logo de dúas saídas perdendo pola mínima como antecedentes ao choque con RCD Espanyol. Conseguirono con Abegondo e a súa afección (#ANosaForza) como aliado unha vez máis.
Aos seis minutos de xogo chegaba o primeiro tanto. Asinouno quen, finalmente, sería a goleadora do partido: Millene. O primeiro dos tres que anotaría foi froito dunha boa xogada persoal da futbolista que rematou dentro da área ao pau dereito da portaría do RCD Espanyol.
Repetíronse as chegadas deportivistas con accio´ns de Ainhoa, Charle, Paula Gutierrez… O dominio branquiazul era evidente. Con todo, as pericas non viñeran a Galicia para ser convidadas de pedra e superado o cuarto de hora de xogo protagonizaron unha xogada que meteu o medo no corpo á afección local. Non pasou a cousa do susto, pero avisaron as visitantes.
Foron os seguintes minutos con ocasións para ambas as dúas escuadras. Con chegadas polo Dépor ABANCA de Laura Fernández ou da capitá, Cris Martínez (que vén de renovar hai pouco). Yohana tivo que atallar un envío das visitantes en dous tempos. Raquel García tirou algo desviado e logo chegou o segundo. Laura Fernández gañou a liña de fondo, encarou portaría e mandou o esférico ao primeiro pau para que Millene transformara a ocasión deportivista no 2-0.
O terceiro foi obra de Ainhoa Marín que, unha vez máis, tirou partido da súa concepción do fútbol vertical e buscando sempre avanzar cara á porta rival. A futbolista colleu a redonda, avanzou metros e metros ata prantarse nun cara a cara con María Pi (porteira visitante) e batela na súa saída (3-0).
Triplete de Millene
O triplete de Millene, cuarto gol deportivista, chegaría logo de recibir o balón precisamente das botas da súa compañeira e goleadora tamén esta xornada: Ainhoa Marín. O tiro cruzado de Millene puxo o definitivo 4-0 no marcador da Cidade Deportiva de Abegondo, outorgando un merecido triunfo ás galegas do Dépor ABANCA que se colocan segundas na táboa clasificatoria da segunda categoría do futfem estatal. Confirman así as galegas a súa firme candidatura a o ascenso. O premio está loitado, pero as coruñesas están la lea.
A próxima cita das Nosas na Primera Federación Iberdrola RFEF será o domingo 12 de marzo ás 18:00 no Estadio La Hoya do Pozo (O Médano) fronte ao UDG Tenerife B.
FICHA TÉCNICA
4) DÉPOR ABANCA: Yohana, Cris Martínez, Inés Altamira, Raquel García (Lorena Reina, min. 77), Monteagudo (Samara, min. 66), Paula Gutiérrez (Letti, min. 77), Henar, Ainhoa Marín, Laura Fernández (Eva Dios, min. 71), Charle (Carlota Sánchez, min. 66) e Millene.
0) RCD ESPANYOL: María Pi, Mellado, Nayadet Opazo, Cristina Baudet (Pixu, min. 69), Adriana Martín, Sara (Judith, min. 59), Chini, Carol, Guerra, Caracas (Aina, min. 84) e Ari Márquez (Judit Pablos, min. 59).
GOLES: 1-0 Millene (min. 6); 2-0 Millene (min. ); 3-0 Ainhoa Marín (min. 57); 4-0 Millene (min. 64).
EQUIPO ARBITRAL: López Osorio (c. Estremeño). Amoestou a Carol (min. 47), Nayadet Opazo (min. 50) e Carol Miranda -adestradora- (min. 59).
INCIDENCIAS: Partido correspondente á 21ª Xornada da Primera Federación Iberdrola da RFEF disputado na Cidade Deportiva de Abegondo ante uns 400 espectadores na bancada.
