Enorme éxito das halteras femininas galegas no Campionato de España junior que tivo lugar esta fin de semana no Pavillón Polideportivo da Sagrada Familia, na cidade da Coruña con importantes medidas de prevención da transmisión da COVID-19. Irene Blanco levou os tres ouros na categoría de 87 kg, mentres que Ruth Fuentefría Sánchez (45 kg), Jennifer Tocuyo Mayorga (49 kg), Amy Abelleira (71 kg) e Vega García Pernas (55 kg) proclamáronse subcampionas nos seus respectivos pesos. A participación galega estivo conformada por seis rapazas e dous rapaces.
É campioa do mundo xuvenil, competía na Coruña, na casa, no Campionato de España Junior e non defraudou a ninguén. A haltera Irene Blanco Tarela voltouno facer. Acadou o triple ouro na súa categoría, 87 quilos. Mandou na arrancada, en dous tempos e no total olímpico. Resumindo: incontestable.
A coruñesa Irene Blanco Tarela, @IBlancoPodium, campioa de España júnior de halterofilia na categoría de 87 kg. de peso corporal. Levantou 95 kg. en arrancada y 110 kg. en dous tempos. O campionato celébrase ata mañá na Coruña. pic.twitter.com/rnecfKJlaS
— A Coruña Deportes (@coruna_deportes) October 17, 2020
Irene Blanco, a mellor haltera do campionato polo sistema Sinclair
A deportista do CH Coruña subíuse ao máis alto do podio no Campionato de España e rematou por levar tamén a mellor marca individual de todas as categorías según a puntuación do sistema Sinclair. A galega obtivo un resultado de 230 puntos Sinclair. Irene Blanco levantou 95 quilos en arrancada, 110 quilos en dous tempos e fixou o total olímpico en 205.
Hai que destacar que no caso de Ruth Fuentefría, a haltera batiu oito récords galegos, entre deles o de Sub17 en arrancada superando en 7 quilos a marca previa na categoría de 45 kg. As súas marcas, todas merecedora de prata foron 57 arrancada, 61 dous temos e 118 no total olímpico.
Récord galego sub 17 en arrancada de Ruth Fuentefría. A coruñesa levantou 7 kilos máis que a súa anterior marca na categoría de 45 kilos de peso corporal. Proclámase subcampioa de España Junior na Coruña. pic.twitter.com/9qbkw7PhcN
— A Coruña Deportes (@coruna_deportes) October 17, 2020
Jennifer Tocuyo (49 kg) do CH Coruña, e Amy Abelleira (71 kg) do C.H. Vigo foron tamén subcampionas nos seus pesos. As súas marcas foron, no caso de Tocuyo: 49 arrancada (prata), 57 dous tempos (prata) e 106 no total olímpico (prata). E no caso de Amy: 63 arrancada (prata), 79 dous tempos (prata)e 142 no total olímpico (bronce).
E na última xornada de competición, hoxe domingo 18 de outubro, na categoría de 55 quilos, competía a galega Vega García, que realizou unha excelente actuación. A deportista coruñesa, con tan so 14 anos, foi quen de facerse coas tres medalla de prata na súa categoría.
Hai que lembrar que a categoría Junior alcanza até os 20 anos de idade, polo que a rapaza, promete. A marcas desta triple subcampioa estatal, Vega García, foron 60 kg en arrancada, 71 kg en dous tempos, e 131 kg no total olímpico.
Tamén competiu nesta recta final do campionato a coruñesa Dariana Arancibia, segundo explican desde o CH Coruña esta haltera tamén “fixo unha boa competición na categoría de 59 quilos. Mellorou a súa marca persoal e finalizou sexta en arrancada con 57 kg, quinta en dous tempos con 73 kg e sexta no total olímpico con 130.
