Un total de once medallas conquistadas polos corredores galegos no Campionato de España de Ciclocrós 2020. A encargada de poñer a guinda no pastel na fantástica competición feita polas mulleres foi a marinense, Irene Trabazo.
A Illa das Esculturas superouse a si mesma acollendo por segundo ano consecutvo a gran cita do ciclismo invernal. Ademais de conseguir o récord de participantes nas probas. O plantel galego sembrou unha histórica colleita de metais. As ciclistas femininas acadaron un total de sete medallas: tres de ouro, dúas de prata e dous bronces.
A pesar do contratempo de inicio, Trabazo sube ao podio no ciclocrós
O undécimo e definitivo metal do total acadouno a sub-23 Irene Trabazo. Corría a poucos quilómetos da súa casa, pois é de Marín. Ela mesma desquitouse do mal resultado do ano pasado. Un problema mecánico afastouna do podio.
A pesar de volver a sufrir un contratempo nos inicios, non deixou escapar a segunda praza na súa categoría. A sexta na táboa absoluta. “Viña polo ouro e lévome a prata”, recoñeceu a corredora do XSM. Medio minuto separouna de Sofía Rodríguez (Valencia), a outra gran candidata á coroa sub-23.
“Tiña que estar todo o rato con ela, se non ía ser complicado alcanzala. Comecei cun contratempo e despois tiven unha picada na segunda volta. Aínda así seguín para adiante. Recorteille algo de tempo, pero non nos deu para alcanzala. A afección estivo a tope animando e as sensacións foron boas”, afirmou Trabazo.
O podio sub-23 completouno a vasca, Paula Suárez. Carla Fernández na sétima posición, con Zaida González, na décima e Marta Vila na duodécima foron as outras representantes da selección autonómica na clasificación.
O mellor posto galego na categoría júnior é o de Noela Saa na sétima a 4:24 da gañadora Lucía Gómez (Baleares). Ademais das galegas Laura Capa (16ª), Aida González (17ª), Zaira Vila (21ª) e Aroa Mediavilla (22ª) que tamén finalizaron a proba por parte da selección.
Celebración da 1º edición da carreira inclusiva
A cita na cidade do Lérez vai a ser recordada por moito máis que os méritos. Este ano, por primeira vez celebrouse unha carreira inclusiva para deportistas con capacidades diferentes. A iniciativa resultou un éxito. Reuniron a máis de medio cento de corredores. Borja Gómez, o rapaz que animou a realizar esta iniciativa, capitaneou o pelotón da superación.
Pontevedra despediu os campionatos cunha cerimonia de podio. Nela estiveron presentes autoridades como o alcalde Miguel Anxo Fernández Lores; a concelleira de Promoción e Grandes Eventos, Anabel Gulías; o secretario xeral para o Deporte da Xunta de Galicia, José Ramón Lete; o deputado provincial da Deputación de Pontevedra, Gregorio Agís; o concelleiro de Deportes de Melgaço, Jose Ricardo Lima; o presidente da Federación Española de Ciclismo, José Luis López Cerrón; e o presidente da Federación Galega de Ciclismo, Juan Carlos Muñiz.
