Broche de ouro do Pescados Rubén Burela á maratón que de futsal que se viviu esta fin de semana na pista de Vista Alegre. As Guerreiras Laranxas reecontráronse co triunfo fronte a Móstoles FSF (6-0), tras o empate co Alcorcón FSF (3-3). As futbolistas do equipo da Mariña ofreceron unha grande imaxe nunha cita moi completa, con intensidade, presión, dominio e sobre todo acerto goleador fronte a un equipo que vai pelexar polo título.
Abriron as mariñás o luminoso no minuto 5 de partido, cun disparo de Cami ao segundo pau, que meteu Sara Santos en propia despois da pugna con Lara Balseiro.
Sen tregua, o Pescados Rubén ampliou a renda no 8 como minuto de ouro. Tras o 2-0 de M. Cortés en lanzamento cruzado, Jane volveu ver a porta nun contragolpe. Elena Aragón a punto estivo acadar o cuarto tanto con 15 segundos para o ecuador do primeiro acto, cun pase ao segundo pau que se paseou moi preto da liña de meta.
Ale de Paz interveu, moi oportuna, para cortar a Benete á contra, no minuto 13. Foi aí cando o Móstoles FSF gozou dose seus mellores momentos de xogo. A de Neda volveu tela pouco despois, a pase de Jane, con Silvia novamente como protagonista.
Non puideron aproveitar as futbolistas que adestra Julio Delgado o dobre penalti de Peque, no 18, e Jozi estivo perfecta para manter a distancia de 3-0, ante Celia e Inma; xa gañara antes o man a man ante Benete.
Volveu a avalancha laranxa. Tras as as tentativas de Ale de Paz e Dany, Peque rubricou o 4-0, aproveitando o rexeite de Leti (minuto 23).
O brillo da capitá volveu facer acto de presenza tan só dous minutos despois rozando o quinto nunha picada. Desencadeando no ecuador chegou o traballo para Jozi baixo paus. A hispano-brasileira gañou a serie de rexeites ante Desi Godoy; o pau freou a Patri Chamorro e de novo a meta local fíxose grande por partida dobre ante Benete.
Traballou o Pescados Rubén Burela merecendo o quinto, que chegou no minuto 33, con Ale de Paz, nunha asistencia de Lara. O Móstoles topouse unha e outra vez con Jozi como verdugo, que tamén fixo cachizas as intencións visitantes no dobre penalti de Patri Chamorro na recta final. Peque selou o definitivo 6-0 a falta de 39 segundos para a bucina, apoiada en Jane á contra.
A segunda fase da competición dará inicio o vindeiro sábado 27
Á espera da resolución da Real Federación Española de Fútbol (RFEF) ao respecto do partido aprazado na xornada 16ª co conxunto do Rayo Majadahonda FS, as Guerreiras Laranxas xa se poñerán a mans á obra para preparar o inicio da segunda fase da competición.
As da Mariña lideran Grupo B, no que tamén se clasifican Torreblanca Melilla, AD Alcorcón FSF e Móstoles FSF, o seu rival desta xornada.
No Grupo A, pelexarán polo play-off os equipos do Futsi Atlético Navalcarnero (44), STV Roldán FSF (37), Poio Pescamar FSF (35) e Ourense Envialia (26).
Deste xeito, haberá tres equipos galegos na pugna polo entorchado estatal: Pescados Rubén Burela (actuais campioas), Poio Pescamar e Ourense Envialia FS.
FICHA TÉCNICA
PESCADOS RUBÉN BURELA FS: Jozi Oliveira, Dany, Peque, Ale de Paz e M. Cortés – quinteto inicial -. Tamén xogaron: Cami, Lara Balseiro, Jane, Bea Mateos, Elena Aragón e Luísa Mayara.
MÓSTOLES FSF: Silvia Milla, Patri Chamorro, Celia, Ina e Benete – quinteto inicial -. Tamén xogaron: Shiori, Sara Santos, Desi Godoy e Ari
GOLES: 1-0, minuto 5, Sara Santos ( propia porta); 2-0, minuto 8, M. Cortés; 3-0, minuto 8, Jane; 4-0, minuto 23, Peque; 5-0, minuto 33, Ale de Paz; 6-0, minuto 40
ÁRBITROS: Colexiados Rodríguez Rendal e Muñoz García do Colexio Asturiano. Amonestaron polo Pescados Rubén Burela con carton amarelo á futbolista Lara Balseiro (minuto 34). Mentres que polo Móstoles FSF viu cartón amarelo Sara Santos no minuto 24 de partido.
INCIDENCIAS: Partido correspondente á xornada 12ª da Primeira División Feminina de fútbol sala RFEF disputado no pavillón de Vista Alegre no Concello de Burela (Lugo).
