Non foi un partido nada doado. O Guardés, na súa casa, venceu por dous goles de diferenza ao Rincon Fertilidad de Málaga (26-24). As galegas tiveron que remontar un parcial inicial de 0 a 3 que lles fixeron as malagueñas nada máis arrincar ó encontro. Grazas a esta vitoria, xa encarrila tres consecutivas na Guerreras. Agora só queda pensar na volta dos cuartos de final da Challenge Cup. O domingo reciben na Sangriña ao Aula Alimentos de Valladolid.
Na pista gardesa, quémase, súfrese e rémase a contraxeito. O que sexa necesario para gañar. E así o demostraron na súa cancha as xogadoras de José I. Prades repoñendo unha renda malagueña de 0 a 3. Ao descanso lograron empatar: 12-12. Campos foi a protagonista local dun primeiro acto con oito tantos. Carratú e Fernandez protagonizaron un bonito duelo. A nota negativa, o mal xiro da pivote África Sempere.
Os goles consecutivos das xemelgas López, Sole primeiro e Espe despois, sumáronse á parada de Fernandes, á exclusión de Lorena Pérez e a un tanto de Paula García desde o pivote para o 0-3. Foi a máxima renda visitante, xa que aos poucos as locais empezaron a espabilarse. Parou Carratú, aínda lanzou lonxe Santiago e detivo un novo balón a García a porteira arxentina.
Campos anotou o primeiro para as locais (1-3) en toda unha declaración de intencións, xa que a primeira liña madrileña asinaría na primeira parte sete goles. E aínda que dous Santos recuperou a renda de tres (1-4), o Guardés xa non deixaría que o Málaga volvese mandar con comodidade. A porteira do Rincón Fertilidad Málaga fíxose notar.
Amargou especialmente ao extremo Rosario Urban, á que deixou no primeiro acto con tan só un gol en catro intentos. Pérez puxo o 2-4, Campos o 3-4 desde os 7 m e o partido comezou a moverse nuns algarismos máis equilibrados. Doiro anotou o quinto para o Málaga, Borges e García non fallaron tampouco e do 5-7 o Guardés foi capaz de repoñerse ata o 7-7.
Carmen Campos, do Guardés, foi a encargada en poñer as primeiras pedras para a vitoria
Con Campos tirando do carro, as de Prades comezaron a igualar forzas. O protagonismo que estaba a asumir Carmen Campos quería ser anulado polo Málaga, e o técnico Suso Gallardo colocaba a Espe López marcando á madrileña. No Guardés entraban Mazza e Descalzo para desafogar á primeira liña, pero o Málaga era capaz de irse ao 9-11.
Houbo tempo morto de Prades e unhas cantas paradas máis de Fernandes que evitaron que as locais aproveitasen todas as súas oportunidades de poñerse por diante no marcador. O Málaga, dirixido pola ex do Guardés Estela Doiro, atopábase incómodo e sufría a amoestación e exclusión do seu adestrador Suso Gallardo polas súas constantes protestas aos árbitros do encontro. Tamén Prades foi amoestado.
O oitavo tanto de Campos pechou a primeira parte (12-12), aínda que o Málaga tivo o lanzamento directo de Espe López co tempo finalizado e que acabou estrelado na cara de África Sempere. Unha acción moi protestada pola bancada ao non recibir ningún tipo de sanción.
E o Guardés non quería máis sustos. Parcial de 3-0 á volta de vestiarios e novo guion para os seguintes 30 minutos. Foi excluída Bravo, pero no seu regreso a pista asinou dúas tantos consecutivos para elevar a renda local ata os catro goles (17-13).
África Sempere tivo que retirarse da pista nos últimos minutos
Gallardo pediu un tempo morto que serviu para poñer as pilas ás súas xogadoras (17-16) e foi Prades quen tivo que deter o partido para facer reaccionar ao seu equipo. Nas alternancias os detalles empezaron a marcar as diferenzas e aínda que o Málaga non cegaba no seu esforzo con Sole López e Espe López como referentes, o Guardés empregábase a fondo para manter o control do partido (22-19).
De novo, Gallardo deu indicacións ás súas xogadoras, López achegou ao Málaga ata o 22-21 e ambos os conxuntos entraron nunha dinámica de accións imprecisas -tivérona as locais para volver irse no marcador e mesmo as andaluzas para empatar-. Houbo exclusión a García, Valero colocou o 23-21, Pérez foi sancionada con dous minutos e Bravo anotou o 24-21.
Carratú salvou un balón de Doiro, Santiago non fallou (25-21) e as xemelgas López tiveron a última palabra (25-22, 25-23). Chegou o feo xesto de Sempere nun xiro e a súa retirada da pista. Campos anotou desde o 7 m o seu noveno gol e a capitá do Málaga pechou o partido co 26-24.
FICHA TÉCNICA
Mecalia Atl. Guardés (12+14): Ezbida, Sempere (2), Sandra Marqués (4), Martina Mazza, Carmen Campos (9), Lorena Pérez (2), Sara Bravo (5), Estefanía Descalzo, Paulina Pérez (2), Patrícia Lima, Cristina Barbosa, Rosario Urban (1), Carla Gómez, Sarah Valero (1) e Marisol Carratú.
Rincón Fertilidad Málaga (12+12): Fernandes da Silva, Martin, de Almeida, Estela Doiro (4), Gómez (1), Sole López (7), Castell, CAmpigli, María Pérez, Espe López (6), Isabelle dos Santos (2), Marta Vidal, Rocío Rojas, Paula García (2) e Juliana Borges (1).
Marcador cada 5′: 1-3, 5-6, 7-8, 9-11, 11-12, 12-12 (descanso), 15-12, 17-15, 20-17, 22-19, 23-21,26 -24 (final).
Árbitros: Andrés Rosendo y Sergio Estévez (Galicia). Excluiron por parte das locais a Campos, Pérez (2), Bravo e Gómez (2) e das visitantes a Espe López e Paula García (2).
Incidencias: Partido correspondente a xornada 16 da Liga Guerreras Iberdrola disputada na Sangriña entre o Mecalia Atlético Guardés e o Rincón Fertilidad Málaga ante 450 espectadores.
