Despois do sorteo dos cuartos de final da EHF European Cup o Atlético Guardés xa ten rival e data para estrear a competición europea. Será na fin de semana do 13 e 14 de febreiro, nun partido ante o ucraíno HC Galychanka Lviv.
Se nada o impide, principalmente a COVID-19, as galegas enfrontaranse en menos dun mes ás ucraínas, debutando así na competición internacional esta tempada. O Atlético Guardés pasou de fase en dúas ocasións ante a imposibilidade de xogar contra os seus rivais o LK Zug e o Club Balonmano Elche nas roldas anteriores.
Así, despois de máis de dez meses, as galegas poderán volver á competición europea. Non xogan nesta categoría desde que caeron eliminadas nos cuartos de final da Challenge Cup contra o Aula Alimentos de Valladolid.
O Galychanka Lviv tamén é un conxunto habitual neste tipo de competicións continentais, ao que as da Guarda deberán vencer na ida, no 13-14 de febreiro e na volta, prevista para a semana seguinte.
Non será doado, xa que as ucraínas contan no seu palmarés con seis campionatos, cinco subcampionatos e sete terceiros postos na Super Liga de Ucraína, ademais de gañar en tres ocasións a copa ucraína e en catro a supercopa. Tamén son bicampioas da Liga Báltica.
De pasar a semifinais, as de Prades enfrontaríase ao gañador do duelo entre o BM Málaga e o AC PAOK, nun encontro programado para marzo.
#EHFEuropeanCup 🏆 | En unas hipotéticas semifinales, nos cruzaríamos con el ganador de la eliminatoria entre el @BMMalagaCosta y el AC PAOK 🇬🇷 ya en el mes de marzo. https://t.co/HeN2SQB31i
— Club Bm. Atl. Guardés (@Atlguardes_ofic) January 19, 2021
Así queda o calendario do Guardés:
- Liga Guerreras Iberdrola | Grupo A | Xornada 9 | Club Bm. Atlético Guardés – Super Amara Bera Bera | Sábado 23 de xaneiro, ás 19 horas. Pav. de A Sangriña (A Guarda) | Árbitros: Jesús Álvarez Menéndez e José Carlos Friera Cavada (Asturias).
- XLII Copa da Raíña | IDA Segunda fase | Zubileta Evolution-Bm. Zuazo – Club Bm. Atlético Guardés | Mércores 27 de xaneiro, ás 20:15 horas. Lasesarre (Barakaldo) | Árbitros: Jorge Monjo Ortega e Óscar Gutiérrez Sobrino (Madrid).
- XLII Copa da Raíña | VOLTA Segunda fase | Club Bm. Atlético Guardés – Zubileta Evolution-Bm. Zuazo | Sábado 30 de xaneiro ás 19 horas. A Sangriña | Árbitros: Pedro Eiras Abalde e Lucas Crespo Gómez (Galicia).
- Liga Guerreras Iberdrola | Grupo A | Xornada 8 | Lanzarote-Puerto del Carmen – Club Bm. Atlético Guardés | Mércores 3 de febreiro ás 20:00 hora insular. Pavillón municipal de Tías.
