- O equipo miñoto fixo unha extraordinaria primeira metade (17-10) que deixou o choque co Beti-Onak visto para sentenza.
- A falta de saber a data exacta do regreso á Sangriña, a escuadra guardesa ha completado un pleno de triunfos en Tui: tres de tres.
Os equipos non se fan da noite para a mañá. Requiren dun proceso. Máis aínda cando hai sete caras novas na pista e un novo adestrador no banco. Por iso, independentemente da súa vitoria de onte, o que máis queda no padal do afeccionado do Mecalia Atlético Guardés é a extraordinaria primeira parte que asinou o seu equipo. A mellor no que vai de tempada. Trinta minutos nos que as xogadoras que prepara o técnico Abel González maniataron a un Gurpea Beti-Onak que chegaba como revelación do curso con tres vitorias en catro choques e que se volveu a Navarra sen ningunha opción de rascar algo positivo (29-19).
Desta forma, o Mecalia Atlético Guardés confirmou o seu idilio co pavillón de Tui, no que conta por vitorias os seus tres partidos disputados. A falta de saber a data de regreso á Sangriña e de se este foi o último partido no recinto tudense, o que queda claro é que o equipo miñoto irase ao parón polo Europeo de seleccións invicto como local. Quedan dous choques ligueiros a domicilio ata entón para mellorar as súas prestacións como visitante –Bera Bera e Aula Valladolid-.
O caso é que a posta en escena foi magnífica. En apenas seis minutos, as de vermello gañaban 6-2 grazas a unha saída en tromba con Pauli Fernández como titular no seu debut en casa. Xunto á verticalidade da paraguaia, destacou a dirección de Patrícia Lima, o peso goleador de Sandra Santiago -cinco tantos ao descanso- e o acerto de Ángela Nieto desde o extremo.
Unha vez establecida a vantaxe, o Mecalia Atlético Guardés soubo mantela e ampliala. A defensa raiou a un nivel extraordinario, con Carla Gómez exercendo de líder no centro do 6:0. E se as navarras atopaban algunha físgoa, Marisol Carratú xa se encargaba de pechar o paso. A capitá asinou varias paradas de mérito, que axudaron a correr ás súas compañeiras e obter goles fáciles.
O Mecalia Atlético Guardés deixo encamiñado o partido co 17-10 da primeira parte
Só o bocinazo do descanso freou ás da Guarda, que se foron ao vestiario con sete goles de vantaxe (17-10) e a sensación de xogar os mellores 30 minutos do que vai de competición. Á volta, a dinámica mantívose. As locais ampliaron a renda ata os dez goles (23-13, min. 44), que desterraban definitivamente calquera esperanza do conxunto visitante.
O mínimo respiro que se tomou o Mecalia Atlético Guardés tentouno aproveitar o conxunto navarro. Dous goles de Aileen Ripa e unha exclusión de Carla Gómez motivaron o tempo morto de Abel González. Un parada oportuna e certeira, que deixou nun espellismo o intento do Beti-Onak de recortar distancias.
O equipo miñoto xogou con seriedade os últimos compases e recuperou a renda de dez goles coa que concluíu o encontro. Sandra Santiago incrementou a súa renda goleadora con nove dianas que a sitúan como máxima anotadora do choque. María Sancha e Ángela Nieto secundárona á primeira liña portuguesa con catro tantos cada unha, que axudaron a selar a terceira vitoria en tres partidos no exilio de Tui. Quen sabe se tamén a última.
FICHA TÉCNICA
29) MECALIA ATLÉTICO GUARDÉS (17+12): África Sempere (1), Sandra Santiago (9), Giselle Menéndez (1), Ángela Nieto (4), Pauli Fernández (2), Míriam Sempere (p.), Cristina Cifuentes (2), Patrícia Lima (3), Celia López (1), Elena Amores, Carla Gómez (1), María Sancha (4), Marisol Carratú (p.), Daniela Moreno (1) e Aroa Fernández.
19) GURPEA BETI-ONAK AZPARREN GESTIÓN (10+9): Patri Encinas (p.); Adriana Mallo (2), Ainhoa García, Naiara Retegui, Mariángeles Uriarte (2), Graciela García (3), Lyndie Tchaptchet (2), Eider Hernández (1), Lucía Zamora (2), Olaia Luzuriaga (p.), Natalia Montilla (2), Macarena Sans, Paula García, Aileen Ripa (3), Valeska Lovera (2) e Kassia César.
EQUIPO ARBITRAL: Abel Juncal e Ángel Mateos. Excluíron dous minutos ás xogadoras locais Carla Gómez, Patrícia Lima, Pauli Fernández e África Sempere; e ás visitantes Ainhoa García, Macarena Sans, Paula García e Kassia César.
MARCADOR CADA CINCO MINUTOS: 5-2, 7-4, 11-6, 15-6, 17-7, 17-10 – descanso- 20-11, 20-13, 23-13, 26-17, 26-18, 29-19
INCIDENCIAS: Partido da quinta xornada da Liga Guerreras Iberdrola, disputado no pabellón Municipal Novo Tui.
