- O Mecalia Atlético Guardés acusou o esgotamento físico e mental da final da Copa Europea.
- O gran nivel de Carratú e Pauli Fernández non foi suficiente para superar a eliminatoria que rematou cun tanteo global de 53-49.
- O equipo miñoto pecha unha tempada na que finalizou sexto en Liga, alcanzou as semifinais en Copa da Raíña e foi subcampión da Copa Europea.
O Mecalia Atlético Guardés quedou eliminado da loita polo título da liga Guerreras Iberdrola en Telde (Gran Canaria). Alí, no Pavillón Insular Antonio Moreno, o Rocasa fixo valer a súa condición de favorito, de local e, sobre todo, de equipo máis descansado. Porque o enorme desgaste físico e psicolóxico derivado da final da Copa Europea terminou por lastrar a un Mecalia que, con todo, mantivo as súas opcións ata os compases finais do choque. Esta derrota pon punto e final á tempada cun sexto posto en Liga, unhas semifinais de Copa da Raíña e un subcampeonato continental.
O duelo empezou igualado, con intercambio de goles e, sobre todo, de paradas Tanto Marisol Carratú como Ana Palomino raiaron a unha altura sobresaliente durante todo o partido, empezando por uns primeiros compases nos que ningún quería ceder.
Con todo, Rocasa atopou a arrancada que buscaba mediado o primeiro tempo. Un parcial de 5-1 levou o marcador desde o 4-3 ao 9-4. Co esgotamento acumulado que o Mecalia Atlético Guardés tiña nas pernas e, sobre todo, na cabeza, parecía a dentellada definitiva. Non foi así. O carácter competitivo deste grupo volveu saír a relucir para devolver o parcial (1-5) e irse só un tanto por baixo ao descanso (10-9).
Á volta do vestiario, o partido rompeu no xogo pero non no marcador. Moitos goles, pero tamén bastantes perdas en ambos os equipos. Os nervios deixábanse notar. Principalmente en Rocasa, que sentía a presión de ser favorito, xogar en casa e ter que gañar si ou si a un equipo que estaba a xogar o seu cuarto partido en dez días e viña de perder unha final cunha longa viaxe ao lombo. Finalmente, ese desequilibrio produciuse a dez minutos para o final.
O Guardés colocouse por diante no marcador
O Mecalia Atlético Guardés, que chegou a poñerse por diante en dúas ocasións, cedía diante o empuxe do conxunto grancanario e perdía coa cabeza ben alta en Telde.
Desta forma concluíu a tempada do Mecalia Atlético Guardés . Este resultado no play-off fai que a súa posición final na liga Guerreras Iberdrola sexa a mesma que obtivo na competición regular: sexta.
Así mesmo, o equipo que primeiro dirixiu Abel González e despois Ana Seabra alcanzou as semifinais da Copa da Raíña e a final da Copa Europea, competición da que se proclamou subcampión, un fito nunca antes alcanzado por ninguén no balonmán galego.
FICHA TÉCNICA
Rocasa Gran Canaria-Mecalia Atlético Guardés (25-21, 53-49 en el global)
25) ROCASA GRAN CANARIA (10+15): Lulu Guerra (p.), Ana Palomino (p); Melania Falcón (3), Manuela Pizzo (4), Arinegua Pérez (2), Marta Mangué, Alba Spugnini, Sayna Mbengue (8), María Gomes (3), Jennifer Lopes (1), Marta Siñol, María González, Nerea Guerra, María Zaldúa (3) Jenni Toledo y Rebeca López.
21) MECALIA ATLÉTICO GUARDÉS (9+12): Marisol Carratú (p.), Míriam Sempere (p.); África Sempere (1), Sandra Santiago (1), Nazaret Calzado, Giselle Menéndez (2), Carolina Silva, Pauli Fernández (5), Cris Cifuentes (2), Patrícia Lima (4), Estefanía Descalzo, Celia López, Elena Amores (3), Carla Gómez, María Sancha y Daniela Moreno (3).
MARCADOR CADA CINCO MINUTOS: 3-2, 5-3, 6-4, 9-4, 10-7, 10-9 (descanso); 13-11, 14-14, 16-16, 20-18, 23-20, 25-21.
EQUIPO ARBITRAL: José Carlos Friera e Alberto Murillo. Os colexiados excluíron con dous minutos ás xogadoras locais Rebeca López e Manuela Pizzo, así como ás deportistas visitantes Pauli Fernández, Carolina Silva, Cris Cifuentes y Estefanía Descalzo.
INCIDENCIAS: Partido de volta dos cuartos de final do ‘play-off’ polo título de Liga Guerreras Iberdrola, disputado noi Pabellón Insular Antonio Moreno da localidade grancanaria de Telde.
