- O Mecalia Atlético Guardés visita a un equipo catalán, o Handbol Sant Quirze, que pese a estar descendido, deixou moi boas sensacións neste curso.
- José Ignacio Prades: “Reencontrámonos coa competición con moitas ganas”.
- Carolina Silva pérdese o partido por unha lesión no talón e Sandra Santiago viaxa co grupo aínda que ten complicado participar
Pasaron case dúas semanas desde que o Mecalia Atlético Guardés sucumbiu fronte ao Costa del Sol Málaga na final da Copa da Raíña de Donostia. Aos poucos, a dor da derrota foi deixando paso ao orgullo de facer historia do club e do balonmán en Galicia con ese primeiro subcampeonato copeiro dun equipo feminino galego. Pero, como calquera deportista, as xogadoras do conxunto miñoto queren recuperar sensacións facendo o que mellor saben facer. E aínda que sexa unha semana máis tarde do estipulado, este sábado terán a oportunidade na pista do Sant Quirze (18:00, Xala. cat https://xala.cat/page/en-directe).
O partido que tiña que enfrontar a semana pasada na Liga Guerreras Iberdrola ás de negro e amarelo co Rocasa Gran Canaria aprazouse debido á final da European Cup que as canarias están a disputar fronte ao Costa del Sol Málaga -o domingo pasado tivo lugar a ida en Telde e esta fin de semana será a resolución en Málaga-. Así pois, o equipo que dirixe José Ignacio Prades tivo unha semana extra de recuperación. Pero tamén de concienciación. Porque quedan catro partidos para terminar o curso e a posibilidade de volver clasificarse para xogar en Europa a próxima tempada está en xogo.
O Guardés é quinto con 30 puntos. Mantén tres -cun partido menos- sobre o Elxe (6º), está a un do Rocasa (4º) -que ten que visitar A Sangriña o 25 de maio- e a catro do Málaga (2º) -que o fará o día 21-. Ademais, Gijón (3º) supéralle en tres unidades pero cun partido máis. É dicir, a escuadra miñota ten posibilidades ata de ser segunda e repetir posto e participación na European League, segunda competición continental. Con todo, ata o quinto posto dá billete europeo para a próxima tempada -terceiro, cuarto e quinto xogarán a European Cup a condición de que o Málaga non caia das catro primeiras posicións-.
A primeira desas catro finais para o Mecalia é hoxe, sábado 15 de maio. En fronte, un Sant Quirze xa descendido, que unicamente sumou seis puntos ao longo do curso. A pesar dos malos resultados, a realidade é que o equipo catalán ha deixado momentos de bo balonmán, cuns ataques corais ben construídos, moita velocidade e bo criterio. A mocidade do seu persoal e a inexperiencia na máxima categoría foron laxas demasiado grandes pero, sen ir máis lonxe, o conxunto que dirixe Dolores Martín deixou moi boa impresión no choque da primeira volta na Sangriña (28-23).
Por todo iso, a expedición miñota acode sen ningún tipo de confianza á localidade barcelonesa nunha viaxe por estrada de 12 horas. O equipo partiu da Guarda o xoves ás 22:30 horas para arribar á comarca do Vallès ao día seguinte. Alí adestrará e fará noite para chegar o máis descansado posible ao encontro do sábado.
No capítulo de baixas, Carolina Silva entra no parte médico cunha lesión de talón pendente de evolución que lle impide viaxar coas súas compañeiras. Quen si o fará será o seu compatriota Sandra Santiago. A primeira liña está na fase final da recuperación da luxación que sufriu no seu ombreiro esquerdo xogando coa selección portuguesa e, aínda que ten moi complicado participar, forma parte da expedición. O resto do grupo está citado para tratar de sumar dous puntos que reactiven competitivamente ao Guardés e achéguenlle a unha nova clasificación europea.
