- O sorteo da fase final da Copa da Raíña volveu emparellar ao Mecalia Atlético Guardés en cuartos de final co seu rival da pasada edición, o Replasa Beti-Onak navarro, contra o que caeu eliminado
- As cadetes loitarán polo pase á final da Minicopa cos seus rivais do Grupo A: KH-7 Granollers, Oyonesa Sporting A Rioxa e Rocasa Gran Canaria
O Mecalia Atlético Guardés xa coñece o seu destino para a fase final da Copa da Raíña 2026. Destino perigosamente similar ao da pasada edición, pois o sorteo da fase final da competición celebrado este martes en San Sebastián emparellou ao equipo miñoto en cuartos de final co seu mesmo rival de 2025: o Replasa Beti-Onak, quen foi capaz de eliminalo e avanzar ata a final da competición.
Nesta ocasión, o conxunto da Guarda espera cambiar o seu rumbo nesta primeira eliminatoria prevista para o venres 8 de maio no multiusos de Illunbe.
Tras vencer con esforzo ao Balonmán Morvedre na segunda fase do torneo copeiro (25-27) o pasado 4 de febreiro, as de Ana Seabra prepáranse xa para o próximo banzo.
O novo obxectivo en cuartos de final da Copa da Raíña é un vello coñecido, un Replasa Beti-Onak perigoso que o ano pasado fixo historia chegando á final da competición na primeira ocasión que lograba pasar da segunda rolda.
Foi o subcampeonato, obtido tras caer naquel encontro definitivo contra o Super Amara Bera Bera, o que este ano lle outorgou unha praza directa na fase final, polo que a súa cita co Guardés o vindeiro venres 8 de maio supoñerá a súa estrea na Copa da Raíña 2026.
Na edición 2025 da Copa da Raíña eliminaron ao Guardés
Precisamente a pasada edición, o equipo de Villava foi responsable de poñer un amargo final ao soño copeiro miñoto do Mecalia Atlético Guardés . Aquel primeiro encontro de cuartos de final foi moi esixente e incómodo para as guardesas, que non acabaron de atopar o seu sitio diante un rival que chegaba sen nada que perder e terminou por gañalo case todo (26-22).
Este ano, o obxectivo será sacarse a espiña diante un conxunto que ameaza con ser o talón de Aquiles das xogadoras que prepara Ana Seabra, e contra o que xa demostrou un desempeño máis favorable no curso actual.
Aprazado o encontro de décimo novena xornada ligueira previsto precisamente para a pasada fin de semana, a última cita entre ambos os conxuntos remóntase ao mes de outubro na Sangriña, culminando cunha folgada vitoria local tras dominar todo o partido (29-21).
Pero desde aquel momento, coa nova Liga con apenas seis xornadas de vida, as cousas puideron cambiar moito en ambos os bandos, polo que o partido pendente que se xogará o próximo 10 de marzo achegará información moi valiosa de fronte ao decisivo duelo copeiro. Dous meses despois, o único seguro é que ambos chegarán con ganas de seguir facendo historia.
O gañador do encontro atopará rival para semifinais no vencedor da parella formada por Rocasa Gran Canaria e KH-7 BM Granollers, protagonistas do terceiro partido de cuartos de final e cos que comparten a marxe dereita do cadro da competición.
Os catro emparellamentos, por tanto, son os seguintes:
- Super Amara Bera Bera – Caixa Rural Aula Valladolid
- Elda Prestixio – Grafometal Sporting A Rioxa
- Rocasa Gran Canaria – KH-7 BM Granollers
- Replasa Beti-Onak – Mecalia Atlético Guardés
Granollers, A Rioja e Rocasa, rivais do Grupo A de as cadetes na Minicopa
Ao sorteo da XLVII Copa da Raíña celebrado esta mañá precedeuno o sorteo de grupos da Minicopa, competición paralela que disputan os homólogos de categoría cadete dos equipos participantes no torneo.
O Mecalia Atlético Guardés foi enmarcado no Grupo A, que comparte con KH-7 BM Granollers, Oyonesa Sporting A Rioja e Rocasa Gran Canaria; mentres que o Grupo B confórmano Atarrabia Beti-Onak, Lacturale Bera Bera, Cavidel Aula Valladolid e Elda Prestigio.
A mecánica da competición cadete é a seguinte: os rivais dun mesmo grupo enfrontaranse entre si a partido único, con tres encontros repartidos entre o venres 8 e o sábado 9 de maio.
O domingo 10, os líderes de cada grupo xogarán a final polo título da Minicopa 2026, que se celebrará no mesmo multiusos de Illunbe antes da gran final das maiores.
Ana Seabra: “O Beti é un equipo que nos custa sempre moito e está a crecer”
