O maratón que comezou en febreiro para o Atlético Guardés está a piques de rematar. Este mércores, 3 de marzo, as galegas viaxan a Lanzarote para recuperar o duelo contra o Puerto del Carmen (20:00 hora insular), comezando así a súa última semana de dobre compromiso.
Este partido, correspondente á oitava xornada da Liga Guerreras Iberdrola, tivo que ser adiado no seu día por casos de COVID-19. Unha vez esta se celebre, as de A Guarda xa estarán ao día na competición.
Este duelo enfronta ás galegas co colista do Grupo A; un equipo que non sumou ningunha vitoria nos once partidos que disputou. Nas filas das canarias estará unha ex xogadora do Guardés, Rosa Álvarez.
O encontro poderá seguirse vía streaming nesta ligazón.
Equilibrio entre traballo e descanso no Guardés
Malia ter só tres encontros por diante dentro desta apretada axenda, o adestrador do Guardés, José I. Prades, recalca a importancia dun equilibrio entre o descanso e o traballo. “O domingo tocou descanso tras o partido contra San José Obrero, o luns adestramos pola tarde; na mañá do martes houbo sesión voluntaria e pola tarde completamos traballo con pista, vídeo e ademais os test de antíxenos”, explica.
O Guardés segue dando esquinazo á COVID-19, e cun pleno de resultados negativos está listo para competir. Para o partido ante o Puerto del Carmen, Prades contará con todo o seu plantel agás Martina Mazza.
Así marcha a clasificación
O Atlético Guardés é actualmente segundo, con 20 puntos, aínda que ten máis encontros xogados que os seus rivais directos.
Os dous puntos en xogo neste partido non serán relevantes para ningún dos dous conxuntos polas súas posicións tan dispares na táboa.
Despois desta cita, a expedición galega voa a Madrid para viaxar en autobús ata Antequera, onde se aloxarán e adestrarán de cara ao partido do sábado contra o Rincón Fertilidad Málaga.
