O Atlético Guardés visitará hoxe por primeira vez esta tempada o Pavillón Insular Antonio Moreno. Farao para medirse ao Rocasa Gran Canaria (20:00 h insular) na segunda xornada do grupo polo título da liga Guerreras Iberdrola.
Este partido, desprazado da súa data inicial, será a primeira toma de contacto para o equipo galego co escenario da fase final da XLII Copa de SM a Raíña: Telde acolle do 21 ao 23 de maio o torneo do ko. O Guardés xa sabe quen será o seu primeiro rival nunha competición que sempre se lle atraganta: o Liberbank Gijón. Agora, queda coñecer o horario do cruzamento para o venres 21 de maio.
O Atlético Guardés, que encadea tres vitorias consecutivas e é terceiro con 12 puntos, visita a un conxunto canario que ostenta a segunda praza da táboa cun punto máis e unha derrota nesta fase contra o Super Amara Bera Bera. Un duelo de altura. E así o presenta o adestrador do Atlético Guardés: “É un partido moi atractivo, dos que a todas as xogadoras lles gusta disputar”.
Ademais, José Ignacio Prades desfaise en eloxios cara ao rival de mañá, o conxunto de Carlos Herrera: “Creo que están a facer unha tempada excepcional, teñen un equipo moi compensado, moi traballado e sacan un rendemento brutal”, valora. E como non, Prades e todo o seu equipo é consciente do reto que ten diante: “Teremos que facer valer a nosa serie e regularidade, a loita por Europa está igualadísima, así que todo o que sexa sumar viranos fenomenal”, apunta.
O Gijón, primeiro rival na Copa
“Van o oito mellores da competición, que ademais son os presentes no grupo polo título”, apunta Prades en relación á complexidade do torneo do ko que reunirá aos conxuntos máis destacados nesta Liga Guerreiras Iberdrola 20/21.
A parte positiva para o técnico do Guardés foi “evitar ás cabezas de serie, quizais os grandes favoritos” nunha fase final da XLII Copa de SM a Raíña que se disputará en Telde do 21 ao 23 de maio. Iso si, “os favoritismos minimízanse ao máximo, non hai rival sinxelo”, considera José Ignacio Prades.
“Será unha eliminatoria dura, pero apaixonante e oxalá podamos seguir adiante nesta Copa da Raíña”, desexa o técnico do Atlético Guardés, que xa esta mesma tempada, a consecuencia do coronavirus, disputará dúas fases finais copeiras: a primeira delas en Málaga en setembro.
En caso de superar ao equipo de Cristina Cabeza, o Atlético Guardés cruzarase co gañador do Rocasa Gran Canaria – Aula Alimentos de Valladolid.
Polo outro lado do cadro, buscarán avanzar Super Amara Bera Bera – Recuncho Fertilidade Málaga e Bm. Elche visitelche.com-KH-7 Bm. Granollers.
