- Partido intelixente do Mecalia Atlético Guardés que, así e todo, tivo que pelexar polo triunfo até o final do encontro con H71 Hoyvík.
- O equipo das Faroe Islands xamais se rendeu e presentou batalla en todo momento.
O Mecalia Atlético Guardés pechou o seu billete aos cuartos de final da EHF European Cup tras completar cunha nova vitoria a eliminatoria fronte ao H71 Hoyvík das Faroe Islands, disputada integramente na Sangriña. Tras impoñerse por tres goles no encontro de ida do sábado, no que exerceu de visitante (31-34), o equipo que prepara Abel González completou a faena cun novo triunfo o domingo, esta vez como locais. Aínda que, está claro, ese rol é unha simple formalidade porque o recinto guardés exerceu a súa maxia durante os 120 minutos dos oitavos de final.
O apoio da afección, de feito, foi diferencial. O conxunto miñoto completou tres partidos en apenas catro días, co enorme desgaste incluído de gañar ao Costa del Sol Málaga na súa pista, cunha viaxe de punta a punta da Península como engadido. No tramo final do encontro do sábado, as xogadoras de vermello e branco notaron o cansazo. Pero o domingo fixeron de tripas corazón, repuxéronse e foron capaces de volver superar ás nórdicas para coarse na antepenúltima rolda da competición.
O seu custou. O conxunto feroés demostrou ter un nivel moi superior ao esperado e vendeu cara a súa derrota. Desde o primeiro minuto ofreceu unha resistencia notable, que obrigou a dar o máximo ás guardesas. Patrícia Lima asumiu a responsabilidade nos primeiros compases e das súas accións chegaron goles que poñían ao Mecalia Atlético Guardés con dous goles de renda (7-5, min. 10). Carratú facía o seu parte, con varias paradas de mérito.
Pero a resistencia nórdica era irredutible. Foi unha tónica durante toda a eliminatoria que o equipo miñoto tentase despegarse no marcador e atopase a resposta dun H71 Hoyvík que sempre neutralizaba. Así, lograron reducir a un o marcador ao descanso (13-12).
Á volta dos vestiarios, a historia repetiuse. O Mecalia Atlético Guardés apertou en busca dunha vantaxe que resolvese a eliminatoria, pero as visitantes nunca baixaban os brazos. A velocidade de María Sancha deu un plus aos ataques locais e Dani Moreno afinaba desde o extremo para poñer unha pequena terra polo medio (18-15, min. 37). A resposta do H71 Hoyvíkchegou do seu mellor xogadora, unha Janna Mittún que deixou un moi bo sabor de boca durante toda a fin de semana.
Esta reacción prolongouse ata o punto de que a escuadra das Faroe Islands logrou vantaxe nos últimos minutos (23-24). Mesmo tivo unha bóla para poñerse a dúas. Neses momentos, as mozas xogadoras nórdicas notaron a presión da Sangriña e Carratú fíxose xigante para negarlles en gol en varias ocasións. As súas compañeiras responderon diante e puideron pechar unha vitoria que custou o seu pero que sabe a gloria: o Guardés está en cuartos de final.
FICHA TÉCNICA
28) MECALIA ATLÉTICO GUARDÉS (13+15): Marisol Carratú (p.); África Sempere, Sandra Santiago (9), Giselle Menéndez, Carolina Silva, Ángela Nieto (2), Pauli Fernández (2), Míriam Sempere (p.), Cris Cifuentes (2), Patrícia Lima (6), Celia López, Elena Amores, Carla Gómez, María Sancha (1), Daniela Moreno (6) y Ángela Portela.
26) H71 HOYVÍK (12+14): Rúna Larsen (p.), Elsa Egholm, Brynhild Palsdottir (2), Vár Bentsdottir (2), Bjork Brimnes, Maria Weyhe (7), Marita Mortensen, Lukka Arge (1), Alda Skardi (p.), Inga Maria Joensen, Christina Arge (1), Lív Bentsdottir (1), Sára Jacobsen (1),Anna Halsdottir (3), Janna Mittún (4) y Guorio Borg (4).
MARCADOR CADA CINCO MINUTOS: 3-3, 6-5, 7-5, 7-7, 11-9, 13-12 – descanso – 16-14, 19-18, 20-19, 20-20, 23-24 e 28-26.
EQUIPO ARBITRAL: Sabien Weber e Denis Weinguin (Luxemburgo). Expulsaron por triple exclusión a Vár Bentsdottir, del H71 (min. 58). Excluíron con dous minutos ás locais Ángela Nieto, Pauli Fernández, Carla Gómez e Daniela Moreno e á visitante Brynhild Palsdottir.
INCIDENCIAS: Partido de volta dos octavos de final da EHF European Cup, disputado no pavillón da Sangriña na Guarda. Na previa do choque fíxoselle unha homenaxe ás xogadoras Aroa Fernández (xuvenil) e Carmen Magallanes (cadete), así como ao técnico Fabio Lima pola súa actuación coa Selección Galega no CESA de balonmán celebrado en Alicante.
