- As galegas da Guarda acadaron un meritorio pase ás semifinais da Copa da Raíña froito dun altísimo nivel defensivo que sustentou a súa vitoria 26-31.
- O triunfo ante o conxunto do Granollers foi moi traballado por todo o equipo en bloque.
- Salvo unha desconexión de dez minutos ao comezo do segundo acto, o conxunto miñoto foi claramente superior ás catalás nesta eliminatoria.
O Mecalia Atlético Guardés está entre o mellores catro equipos da Copa da Raíña 2022. Iso ninguén llo vai a quitar xa. Porque superou ao Granollers nun partido traballado, sufrido nalgúns momentos e moi gozado noutros, para clasificarse para semifinais. Un recital de Paula Arcos, que asinou nada menos que nove goles. A xogadora internacional foi a punta de lanza dun enorme labor colectivo sustentada na defensa e o contraataque, as armas predilectas do equipo que prepara José Ignacio Prades.
Se queremos buscar un lunar no xogo das galegas neste cruce da Copa da Raíña só se lles podería achacar unha desconexión ao comezo do segundo acto, que levou ao cadro catalán a neutralizar unha desvantaxe de cinco goles (20-20) ameazou o triunfo. A posterior reacción da galegas, cun parcial de 0-6, e o anterior desempeño confirmaron a superioridade do conxunto da Guarda, que o sábado loitará por meterse na primeira final copeira da súa historia.
Foron os nervios os protagonistas dos primeiros compases. Os axustados aos que ninguén quere na súa festa, pero que sempre se acaban coando. Froito das súas cadeas, os primeiros compases transcorreron con imprecisións e perdas. Aos cinco minutos, o marcador de Illumbe reflectía un escaso 1-1 a modo de proba.
Pero a medida que as xogadoras romperon a suar, o balonmán comezou a fluír. E o Guardés empezou a xurdir. A súa receita favorita de defensa e carreira deixouse notar. O equipo de José Ignacio Prades explotou as súas principais virtudes e cun parcial de 0-3 tomou vantaxe no marcador. A partir de aí, a xestionar. Porque o férreo 6:0 limitaba ao máximo os ataques do Granollers e axudaba a Carratú a producir na portería.
E diante, Paula Arcos estaba ao seu mellor nivel. E o mellor nivel desta xogadora internacional é un nivel altísimo, expectacular. A de Petrer defendeu, fintó, penetrou, asistiu á liña. Ademais, culminouno con media ducia de goles na primeira parte. Gañou a pulso ser elixida a MVP do partido.
O conxunto miñoto foise a eses seis tantos de vantaxe, pero nun último minuto algo errático pasou de poder poñerse a sete a terminar 12-17. Unha renda, con todo, máis que substanciosa.
Un parcial que puxo en perigo o pase a semis da Copa da Raíña para o Guardés
Pero custa gañar encontros. Moito. E á volta do vestiario, Granollers apertou. Recuperou o 6:0 defensivo en vistas de que o 5:1 non lle funcionou no primeiro acto. E a partir de aí picou pedra. Picotazo a picotazo, ía recurtando. Así ata o 20-20. Un parcial de 8-3 que poñía en xaque ao Mecalia Atlético Guardés. A inercia convidaba a pensar nun cambio de garda na iniciativa do marcador. Pero cando peor o estaba pasando, o equipo galego levantouse. Un parcial de 0-6 volvía poñerlle á fronte.
Pero, como xa se escribiu anteriormente, custa moito gañar os partidos e máis nesta disputada Copa da Raíña. Aínda que se gañan. O conxunto catalán tratou de reaccionar, pero esta vez a lección estaba ben aprendida: a defensa das xogadoras de negro e amarelo non llo permitiu. Tampouco Carratú, con varias paradas de mérito. Diante, Paula Arcos seguiu desatando o seu ciclón para irse aos nove goles e adxudicarse o premio de MVP do partido. O primeiro día, está superado. Agora, a semifinais e a soñar con facer historia e preguntar ese “Que se debe?”
#QueSeDebe@CopadelaReina22 pic.twitter.com/ckbJ3nrQgp
— Mecalia Atlético Guardés (@Atlguardes_ofic) April 21, 2022
FICHA TÉCNICA
26) KH7 GRANOLLERS: Nicole Wiggins (p.), Marta Mera (p.); Ben Chayhab (1), Kofler (3), Lora Sarandeva (1) María Monllor, Gulia Guarieiro, Ona Veguè (6), Carmen Prelchi (2), Paula Herce (3), Ana González, Jana Castañera (2), Yumi Tamada, Janna Sobrepera (1) y Martina Capdevila (7).
31) MECALIA ATLÉTICO GUARDÉS: Marisol Carratú (p.), Míriam Sempere (p.) Marián Mera (p.); Nazaret Calzado (2), Carolina Silva (1), Lorena Pérez (3), Ángela Nieto (3), Estefanía Descalzo (1), Patrícia Lima (3), Paula Arcos (9), Carla Gómez, María Sancha (1), Gabriela Pessoa (7), Daniela Moreno (1), Aroa Fernández y Yaiza Alonso.
MARCADOR CADA 5 MINUTOS: 1-1, 4-5, 5-9, 8-12, 10-16, 12-17 (descanso) 14-18, 18-20, 20-23, 20-26, 24-28, 26-31.
EQUIPO ARBITRAL: Tania Rodríguez e Lorena García (Comités valenciano e aragonés). Excluíron dous minutos a Carmen Prelchi, del Granollers, así como a Paula Arcos (2) e Patrícia Lima, del Mecalia Atlético Guardés.
INCIDENCIAS: Partido de cuartos de final da Copa da Raíña, disputado no Donostia Arena de Illumbe en San Sebastián.
Mini copa de España
