- O Mecalia Atlético Guardés sobrepúxose a un mal inicio (7-1 no primeiros oito minutos) para gañar por quinta vez noutros tantos partidos na European Cup.
- Unha extraordinaria Míriam Sempere impulsou ao conxunto miñoto cara á remontada.
A estrea da adestradora Ana Seabra á fronte do banco do Mecalia Atlético Guardés saldouse cunha boa vitoria. O conxunto miñoto superou a domicilio ao Madeira SAD Andebol (26-30) no partido de ida dos cuartos de final da European Cup e obtivo unha valiosa renda de catro goles que debe confirmar no choque de volta do próximo domingo 19 na Sangriña.
E iso que o conxunto vermello empezou con dúbidas debido ao explosivo inicio da escuadra lusa. Empuxadas polo seu animoso pavillón, as xogadoras locais desarbolaron ao Mecalia Atlético Guardés cun demoledor parcial de 7-1 en oito minutos. Ana Seabra parou o partido cun tempo morto e, aínda que a reacción non foi inmediata, si que supuxo o xerme do que se produciu despois.
Míriam Sempere relevou a Marisol Carratú na portería, a defensa axustouse mellor (coa reestrea de Fanny Descalzo no centro do 6:0) e a partir dunha dobre exclusión do equipo local desatouse a tormenta.
Era o minuto 12 e o marcador do Pavilhao do Funchal reflectía un contundente 10-4. Pero o Mecalia Atlético Guardés soubo xogar a superioridade numérica e obter un parcial de 0-3 que volvía metelo no duelo. E así, ata o descanso. Porque o rendemento da porteira alacantina, combinado co traballo defensivo de todas as súas compañeiras, mantivo ao Madeira SAD Andebol en dez tantos durante 14 minutos. Mentres, os goles caían un tras outro na portería local ata lograr unha boa renda de tres dianas ao descanso (11-14).
A segunda metade certificou o triunfo do Guardés
Pero ese resultado era só o da primeira das catro partes da que consta esta eliminatoria. Quedaba moita pedra que picar. E aínda que o Mecalia Atlético Guardés logrou irse ata os seis goles nun bo inicio, o Madeira SAD Andebol nunca se rendeu. Nunha especie de efecto espello, unha dobre exclusión do conxunto miñoto permitiu ás locais enchufarse e poñerse a un tanto (21-22).
Aí foi cando volveu aparecer o mellor Mecalia Atlético Guardés. E a mellor Míriam Sempere. A de Santa Pola seguía encadeando paradas para frear o impulso madeirense. Aos poucos, o ataque tamén se tranquilizou. Lima axigantouse na dirección e da súa conexión coa liña empezaron a caer os goles.
Nazaret Calzado tamén debutou co Mecalia Atlético Guardés e ata asinou un gol. Así, a pesar de sufrir dúas exclusións máis, o cadro miñoto garantiuse unha vitoria valiosísima (24-30) que debe facer valer o vindeiro domingo na Sangriña.
FICHA TÉCNICA
26) MADEIRA SAD ANDEBOL (11+15): Isabel Gois (p.), Suelma Soares (p.); Neide Duarte (7), María Duarte (5), Marilene Souza (4), Rissia Oliveira (4), Joana Pires (3), Erica Tavares (2), Patrícia Rodrigues (1), Catarina Silva, Joana Ribeiro, Francisca Araújo, Patrícia Morais e Luana Jesús.
30) MECALIA ATLÉTICO GUARDÉS (14+16): Marisol Carratú (p.); África Sempere (1), Sandra Santiago (3), Nazaret Calzado (1), Giselle Menéndez, Carolina Silva, Fanny Descalzo (1), Pauli Fernández (9), Míriam Sempere (p.) (1), Cris Cifuentes (1), Patrícia Lima (5), Celia López, Elena Amores, Carla Gómez, María Sancha (7) e Daniela Moreno (1).
MARCADOR CADA CINCO MINUTOS: 5-1, 7-2, 10-5, 10-8, 10-10, 11-14 – descanso – 14-18, 15-24, 19-21, 21-24, 24-28 e 26-30.
EQUIPO ARBITRAL: Yves Schols (Países Bajos) y Stephen Martens (Bélgica). Excluíron con dous minutos ás xogadoras locais Marilene Souza (2) e Rusia Oliveira (2), así como ás deportistas visitantes Elena Amores (2), Patrícia Lima, Cris Cifuentes, Fanny Descalzo e Nazaret Calzado.
INCIDENCIAS: Partido de ida dos cuartos de final da European Cup, disputado no Pavilhao do Funchal (Madeira, Portugal). Antes do choque gardouse un minuto de silencio en memoria das vítimas do tremor de terra en Turquía e Siria.
